Read lubukusu Lir. 48 Bible Online

Lir. 48 - lubukusu bible

Lir. 48

¹Enyuma wa kano Yosefu aboolelwa ali, “Paapa wowo ali omulwale.” Nio abukula babaana bewe babili, Manase ne Efuraimu acha khumubona.

²Nga Yakobo ne aboolelwa ali omwana wewe Yosefu echile khumubona, eandalasia enyokha ekhala khu sitanda siewe.

³ Aboolela Yosefu ali, “Wele Owe Bunyali Bwoosi ambonekhela e Lusi, mu sibala sia Kanaani mala ambiita chikhabi.

⁴Amboolela ali, ‘Ndikhukhola obe ne lisaaye likali mala ndikhutasa babaana ne ndikhukholamo sipupu sie chikholo chingali mala ndiia lisaaye liowo, enyuma wowo sibala sino. Siliba sisiabwe mindali na mindali.’

⁵“Babaana bowo babili, Efuraimu ne Manase, nibo wasaalila mu Misiri ese ne khecha khwiwe tawe, bali babaase. Balaba babaase, nga Rubeni ne Simioni ne bali.

⁶Ne babaana balisaalwa enyuma wabwe baliba babowo balilaangilwa khu lisina lie bawandaayabwe mu khunyoola kumukabwa kwabwe.

⁷ Sikila nga necha khukhwama e Padani-aramu, Raeli, mu bubeeleli bwase, afwila mu sibala sia Kanaani khungila, ne khusilikho aleeyi khukhwola Efurati, mala namusiikha angila echa Efurati.” (Olwo nilwo lukoba lwa Betelehemu.)

⁸Nga Isiraeli ne abona babaana ba Yosefu areeba ali, “Bano naanu nibo?”

⁹Yosefu akobosia raraawe ali, “Bano bali babaana base nibo Wele ambeele mu Misiri muno.” Yakobo amuboolela ali, “Nosiima bareere ano mbabiite chikhabi.”

¹⁰Nono chimoni cha Isiraeli chaba chabofula sikila kamakora, aaba se abona bulayi tawe. Yosefu areera basoleeli bewe siimbi mala Isiraeli abekwayila ne khubekhoyela.

¹¹Isiraeli aboolela Yosefu ali, “Abele se nebaasia ndi ndikhubona tawe, ne bona Wele akholile naboone akhaba ne babaana bowo bosi.”

¹²Nono Yosefu abarusia khu bikele biewe mala asikama, enama bubweeni bwewe bwetiila asi.

¹³Mala Yosefu ababukula boombi, Efuraimu mu mukhono kwewe kumuseecha, nio abe emukhono kumukhasi kwa Isiraeli ne Manase mu mukhono kwewe kumukhasi, nio abe emukhono kumuseecha kwa Isiraeli, mala abareera siimbi khu Yakobo.

¹⁴Ne Yakobo aborania kamakhono, ayila kumuseecha atiila khu murwe kwa Efuraimu owaba omukeekhe, ne kumukhasi atiila khu murwe kwa Manase owaba omubele.

¹⁵Mala abiita Yosefu ne aloma ali, “Wele niye bapaapa base Aburahamu ne Isaaka bakholela, Wele oobeele omwaayi wase mu bulamu bwase bwoosi khukhwola endaalo yino,

¹⁶Malaika owaasikula khukhwama mu busiku bwoosi, biita babaana bano chikhabi, ne mu nibo, lekha lisina liase nende lie bapaapa base Aburahamu ne Isaaka litiuukhwe, mala lisaaye liabwe libe likali khu sibala.”[58]

¹⁷Nga Yosefu abona raraawe atiilile kumukhono kwewe kumuseecha khu murwe kwa Efuraimu se asiimisibwa tawe, mala abukula kumukhono kwa paapa akurusie khu murwe kwa Efuraimu akure khu murwe kwa Manase.

¹⁸Nio Yosefu aboolela raraawe ali, “Se kario tawe paapa, sikila yuno ali omubele, tiila kumukhono kwowo kumuseecha khu murwe kwewe.”

¹⁹Ne kakhali raraawe aloba mala aloma ali, “Namanyile mwana wase, namanyile ndi lisaaye lia Manase liosi likhabe ne babaandu bakali, lundi yesi akhabe omundu omukali. Ne kakhaba kario, wandaaye omukeekhe akhabe omukali khumukhila, ne lisaaye liewe liliba chikholo chingali.”

²⁰ Nio ababiita chikhabi endaalo eyo ne aloma ali, “Baisiraeli balirumikhira kamasina kenywe ne balikho babiita chikhabi. Ne bakhalomenge bali, ‘Wele akhukhole nga Efuraimu ne Manase.’ ” Mu ngila yino ara Efuraimu ebweeni wa Manase.

²¹Isiraeli aboolela Yosefu ali, “Lola ese ndi siimbi khufwa, ne Wele aliba alala ne nanywe. Alimukobosia lundi mu sibala sie bapaapa benywe.

²²Khutuba khwako nakhuele ewe, ne se bali bawandaayo tawe, lubeka lulala lwe Sikulu, nilwo napana nanuula khukhwama khu Baamori ne embalu yase ne buyiingo bwase.”