Read lubukusu Lir. 49 Bible Online

Lir. 49 - lubukusu bible

Lir. 49

¹Yakobo alaanga babaana bewe mala aloma ali, “Yibuusia alala mala ese muboolele enywe kacha khumwikholekhakho mu ndaalo chichiicha.

²Yibuusia alala murekeeresie enywe baana ba Yakobo, mala muulile niko paapa wenywe aloma.

³Rubeni, ewe oli omubele wase. Oli kamaani kase, omwana owe khunyoa owe lukoosi lukali khukhila boosi, owe lukoosi lukali khukhila boosi lundi owe bunyali bukali khukhila boosi.

⁴Omaasia busa nga kameechi, ne se olinyoola bukhili khu boosi tawe, sikila wakona ne mukha raraao. Waloba khuria sitanda sia paapa wowo!

⁵Simioni ne Lawi bali bawandaaye, bulwaani bwe sisiayuumba buli chimbalu chabwe.

⁶Ewe mwoyo kwase, okhengila mu muse kwe simoonyo siabwe tawe, ewe mwoyo kwase, okhaambaana mu libuusiana liabwe tawe. Sikila mu lirima liabwe beera babaandu, ne mukhwirania khwabwe, barema chiuunwa kimikotio.

⁷Silaamo sibe khu lirima liabwe, sikila lili lirafu, ne bukhalafu bwabwe, sikila se bulimo siisa ta! Ndabaukhasia mu Yakobo, mala mbasalanisie mu Isiraeli.

⁸Yuda, bawandaayo balikhufumia ewe, kumukhono kwowo kuliba khwikosi khwe basiku bowo, babaana ba paapa wowo balikhusikamila.

⁹ Yuda ali omwana owe talang'i, ebuulilaanga, eera, mala akobola mu libina liewe. Eema, ekolola, akona asi nga e talang'i, ne nga e talang'i ekhasi, naanu onyala amwinyosia?

¹⁰Endebe eye bubwami se elirura mu Yuda tawe, namwe esiimbo eye bubwami se elirura mu lisaaye liewe tawe, khukhwola nga Silo ne echa mala chikholo choosi chilimuria.

¹¹Aliboa epunda yewe eng'ana khu musabibu, khu musabibu kumurobore. Asiinga chingubo chewe mu ndali, ne ekutuusi yewe mu mafuki ke kimisabibu.

¹²Endali elirobia chimoni chewe, ne kameno kewe kaliwangiisibwa ne kamabeele.[59]

¹³Sebuluni alimenya khu sikiingi sie nyanja, ne aliba nga ekambi eye chimeeli, ne lulwakha lwewe luliba e Sidoni.

¹⁴Isakari ali epunda eye kamaani, akonaanga akari we bisutwa nibio asuta.

¹⁵Abona ali abuundu ekhuolela ali alayi, ne kamaloba kaba kamalayi, nio enamia kamabeka, mala akwa nasioobi owe kimilimo kie khuyingiililwa.

¹⁶Dani alikhalakila babaandu bewe nga ekholo ndala eya Isiraeli.

¹⁷Dani aliba endemu khu muyila, nafwo khu ngila eluma ekhukunyu eye farasi, nio okitimia akwe enyuma.

¹⁸Nalindiilila buonia bwowo, ee Wele Omunyali Owa Bioosi.

¹⁹Banamae banuuli balibwaakala Kati, ne kakhali alibebwaakala khukhwama enyuma.

²⁰Biakhulia bia Asieri biliba bilayi, ne aliomolela babaami.

²¹Nafutali ali emboongo, emboongo ekhasi endekhuule, esaala ching'ana chindayi[60].

²²Yosefu[61] ali lusakia lulwaama kamatuunda, lusakia lulwaama a sebele, chisakia chewe chilea chatuma lisiisi.

²³Basiku be buyiingo bamwibwaakala, bamulasa mala bamunaania lukali.

²⁴Ne kakhali luyiingo lwarama busa tati, kamakhono kewe kakholwa ke kamaani sikila kamaani[62] ko Omunyali Owa Bioosi owa Yakobo. (Khulwe lisina lio omwaayi, Lulwanda lwa Isiraeli),

²⁵khulwa Wele owa paapa wowo olikhuyeeta, khulwa Wele Owe Bunyali Bwoosi olikhubiita ewe ne chikhabi che mwikulu mungaaki, chikhabi che mu lusiba chichetiila asi, chikhabi che bibaywa bikali, ne babaana bakali.

²⁶Chikhabi cha paapa wowo,[63] chili che bunyali khukhila chikhabi che bikulu[64] bia mindali na mindali, bibiindu bilayi bie bikulu bia mindali, chikhoya chaba khumurwe kwa Yosefu, ne khu bweeni bwo oyo owaukhasibwa khukhwama khu bawandaaye.

²⁷Benjamini ali sisuuche sirafu, kumutikhinyi alia nibio aayile, ne ekolooba akaba biaambe.”

²⁸Chino choosi chili chikholo ekhumi ne chibili cha Isiraeli. Ne kano kali niko paapa wabwe abaloma nga ne ababiita chikhabi, buli sia mulala khuloondekhana ne chikhabi chikhoyela khu niye.

²⁹Nio abalaka ne aloma ali, “Ndikho nja khufwa, siikhe niio bapaapa base bali, mu libina lili mu mukuunda kwa Efuroni Omuhiti.

³⁰ Mu libina liili mu mukuunda e Makipela lubeka lwe ebukwe owa Mamure, mu sibala sia Kanaani. Elio nilio libina nilio Aburahamu akulila mu mukuunda khukhwama khu Efuroni Omuhiti, nga abuundu e khusiikhao.

³¹ Abwenao niio basiikha Aburahamu ne omukhasi wewe Sara. Abwenao niio basiikha Isaaka ne omukhasi wewe Rabeka. Lundi abwenao niio nasiikha Lea.

³²Kumukuunda ne libina lilimo biakulwa khukhwama khu mu Hiti.”

³³ Nga Yakobo ne amala khulaka babaana bewe, akololosia bikele, abikobosia khu sitanda mala akwiisia kumwoyo, afwa.