Read lubukusu Lir. 5 Bible Online

Lir. 5 - lubukusu bible

Lir. 5

¹ Luno luli lunyilili lwe lisaaye lia Adamu. Nga Wele ne abuumba omundu, amubuumba mu lukoondo lwewe omwene.

² Abuumba omuseecha no mukhasi, ababiita chikhabi mala abatiuukha ali babaandu.

³Nga Adamu ne amenya ola kimiiko emia ndala ne kamakhumi kataru, asaala omwana owe sisoleeli owe lukoondo lwewe lundi omufwaana, mala amutiuukha ali Seti.

⁴Enyuma we khusaala Seti, Adamu amenya kimiiko chimia munaane mala asaala babaana babaandi be sisoleeli ne sikhaana.

⁵Adamu aamenya kimiiko chimia tisa ne kamakhumi kataru mala afwa.

⁶Nga Seti aamenya ola kimiiko emia ndala na kiraano asaala Enosi.

⁷Enyuma we khusaala Enosi, Seti amenya kimiiko chimia munaane ne saba, mala asaala babaana babaandi be sisoleeli nende be sikhaana.

⁸Seti aamenya kimiiko chimia tisa ne kimiiko ekhumi na kibili, mala afwa.

⁹Nga Enosi aamenya ola kimiiko kamakhumi tisa, asaala Kenani.

¹⁰Enyuma we khusaala Kenani, Enosi aamenya kimiiko chimia munaane ne ekhumi na kiraano mala asaala babaana babaandi be sisoleeli nende be sikhaana.

¹¹Khwako Enosi amenya kimiiko chimia tisa na kiraano mala afwa.

¹²Nga Kenani aamenya ola kimiiko kamakhumi saba asaala Mahalaleli.

¹³Enyuma we khusaala Mahalaleli, Kenani aamenya kimiiko kikiindi chimia munaane ne kamakhumi kane mala asaala babaana babaandi be sisoleeli nende be sikhaana.

¹⁴Khwako Kenani amenya kimiiko chimia tisa ne ekhumi mala afwa.

¹⁵Nga Mahalaleli amenya ola kimiiko kamakhumi sita ne kiraano asaala Yareti.

¹⁶Enyuma we khusaala Yareti, Mahalaleli aamenya kimiiko chimia munaane ne kamakhumi kataru, mala asaala babaana babaandi be sisoleeli nende be sikhaana.

¹⁷Khwako Mahalaleli amenya kimiiko chimia munaane ne kamakhumi tisa na kiraano mala afwa.

¹⁸Oli Yareti amenya ola kimiiko emia ndala ne kamakhumi sita na kibili asaala Enoka.

¹⁹Enyuma we khusaala Enoka, Yareti amenya kimiiko chimia munaane mala asaala babaana babaandi be sisoleeli nende be sikhaana.

²⁰Khwako Yareti aamenya kimiiko chimia tisa ne kamakhumi sita na kibili, mala afwa.

²¹Nga Enoka amenya ola kimiiko kamakhumi sita na kiraano asaala Metusela.

²²Enyuma we khusaala Metusela, Enoka amenya mu busaangi ne Wele khulwe kimiiko chimia chitaru mala asaala babaana babaandi be sisoleeli nende be sikhaana.

²³Khwako Enoka amenya kimiiko chimia chitaru ne kamakhumi sita na kiraano.

²⁴ Enoka aakeenda ne Wele mala akoriokha busa khubao tawe, sikila Wele aamubukula.

²⁵Nga Metusela amenya ola kimiiko emia ndala ne kamakhumi munaane ne saba, asaala Lameki.

²⁶Enyuma we khusaala Lameki, Metusela amenya kimiiko chimia saba ne kamakhumi munaane ne kibili mala asaala babaana babaandi be sisoleeli nende be sikhaana.

²⁷Khwako Metusela amenya kimiiko chimia tisa ne kamakhumi sita na tisa mala afwa.

²⁸Nga Lameki amenya ola kimiiko emia ndala ne kimiiko kamakhumi munaane na kibili asaala omwana owe sisoleeli,

²⁹amutiuukha lisina ali, “Noa.”[22] Sikila aloma ali, “Khukhwama mu maloba niko Wele Omunyali Owa Bioosi alaama, omwana yuno alakhuoleelesia kimiooyo khukhwama khu milimo kiefwe kimiandalafu kioosi.”

³⁰Enyuma we khusaala Noa, Lameki amenya kimiiko chimia chiraano ne kamakhumi tisa na kiraano mala asaala babaana babaandi be sisoleeli nende be sikhaana.

³¹Khwako Lameki amenya kimiiko chimia saba ne kamakhumi saba na saba, mala afwa.

³²Enyuma wa Noa khukhwosia kimiiko chimia chiraano, asaala Shemu, Hamu ne Chafwesa.