Read lubukusu Lir. 50 Bible Online

Lir. 50 - lubukusu bible

Lir. 50

¹Nio Yosefu akwa khu raraawe amulililakho ne amwekwayila.

²Mala alaka bakholi bewe basilikhi, baakhe raraawe kamalesi ke khukhwoomia kumubili. Nio basilikhi bomisia Isiraeli.

³Chindaalo kamakhumi kane chawa, chichenyekha khukhwoomia omundu. Mala Bamisiri balila Isiraeli khu ndaalo kamakhumi saba.

⁴Nga chindaalo che khumulila ne chawa, Yosefu alomaloma khu be nju eya Farao ali, “Naaba luno ne nyoola kumwalaalo mumoni chenywe, musaba mulomalome khu Farao muli,

⁵ paapa wase anjechubia aloma ali, ‘Ese ndi siimbi khufwa, ne mu lisiikha mu siliindwa nisio samwene neyabila sili mu sibala sia Kanaani.’ Khwako khusaba umbe kumunwa nje siikhe paapa mala khakobole.”

⁶Farao amukobosia ali, “Paapa wowo nga akhwechubia, cha omusiikhe.”

⁷Nio Yosefu aniina acha khusiikha raraawe. Bakholi ba Farao boosi ne basaakhulu be munju mwewe, ne basaakhulu be mu sibala sia Misiri,

⁸akhaba be munju mwa Yosefu boosi, ba wandaaye, be munju mwa raraawe bacha ne naye. Ne kakhali babaana bong'ene, kiminyele, ne kamatuuli niko kakarama mu sibala sia Kosieni.

⁹Mala baniina bachayo ne naye, alala ne kamakaari ne batimia chifarasi. Siaba sipupu siboofu lukali.

¹⁰Nga bola aluyia lwe khuula lwa Atati, luli ebweeni owa Yoritani, baliila ne bubeeleli bukali lukali, mala Yosefu akhola kamasika ka raraawe kaba chindaalo saba.

¹¹Nga bamenywa be mu sibala sia Kanaani, babona kamasika khu luuya lwe khuulilakho lwa Atati, baloma bali, “Kano kali kamasika ke bubeeleli bukali khu Bamisiri.” Khwako abuundu ao alaangwa lisina ali Abeli-misiraimu,[65] aali, ebweeni wa Yoritani.

¹²Babaana ba Yakobo bamukholela bario nga aba ne abalaka,

¹³ sikila babaana bewe bamusuta bamuyila mu sibala sia Kanaani, mala bamusiikha mu libina lie mu mukuunda e Makipela, ebukwe owa Mamure, nilio Aburahamu akula mu mukuunda khukhwama khu Efuroni Omuhiti, abe awewe ekhusiikhao.

¹⁴Enyuma wa Yosefu khusiikha raraawe, akobola e Misiri ne bawandaaye ne nabo boosi ba baba ne bachile ne naye khusiikha raraawe.

¹⁵Nga bawandaaye ba Yosefu babona paapa wabwe afwiile baloma bali, “Wakana Yosefu alakhubiila mala akhuruungie khulwe kamabi niko khwamukholela.”

¹⁶Nio baruma likhuwa khu Yosefu ne baloma bali, “Paapa wowo ne akhafwa tawe akhulaka efwe ali,

¹⁷Boolela Yosefu muli, ‘Khusaba obeele bawandaayo bubwoni bwabwe ne kamabi kabwe sikila bakhukholela kamamayaanu.’ Ne nono luno khukhusaba obeele bubwonaki bwe bakholi ba Wele owa paapa wowo.” Yosefu alila lukali nga ne bamulomalomakho.

¹⁸Bawandaaye becha basikama ebweeni wewe mala baloma bali, “Lola, efwe khuli nasioobi bowo.”

¹⁹Ne kakhali Yosefu abakobosia ali, “Mukharia tawe, ese se nyala nabukula bubweyaangu bwa Wele tawe.

²⁰Enywe mwenya khukhukholela kamabi, ne kakhali Wele akakhola khuba kamalayi, khukakhola kabe ke khuonia babaandu bakali nga ne kali luno.

²¹Mukharia tawe, ndamuua biakhulia enywe ne bakeekhe benywe.” Abeyikinia ario mala abaoleelesia kimiooyo.

²²Nio Yosefu amenya mu Misiri, niye nende be munju eya raraawe. Ne Yosefu amenya kimiiko emia ndala ne ekhumi.

²³Mala abona babaana ba Efuraimu be eselukho ekhola khataru, akhaba babaana ba Makiri okhwa Manase bosi balelwa ne Yosefu.

²⁴Nio Yosefu aboolela bawandaaye ali, “Ese ndi siimbi khufwa, ne Wele alimukhebulila mala amurusie mu sibala sino, amuyile mu sibala nisio echubila Aburahamu, Isaaka ne Yakobo.”

²⁵ Nio Yosefu echubia babaana Baisiraeli ne aloma ali, “Wele alimukhebulila, mala mulisuta bikuumba biase muche nabio.”

²⁶Nio Yosefu afwa ne ali ne bukhulu bwe kimiiko emia ndala ne ekhumi. Bamuakha kamalesi ke khumwomia mala bamura mwisanduku lie bafu mu sibala sia Misiri.