Read lubukusu Lir. 7 Bible Online

Lir. 7 - lubukusu bible

Lir. 7

¹Nio Wele Omunyali Owa Bioosi aboolela Noa ali, “Yingila mu meeli ewe nende be nju yowo boosi, sikila naboone ndi oli omuluungi ebweeni wase mu selukho yino.

²Bukula chisaang'i chingwalaafu, ekhasi ne seecha, khukhwola saba, nende chikhali chingwalaafu tawe, chibili chibili, ekhasi ne seecha.

³Lundi bukula chinyuni, ekhasi ne seecha, chibili chibili, khukhwola saba, oliinde lukano lwacho nio lube lulamu khu sibala.

⁴Sikila enyuma we chindaalo saba ndikho nja khureera efula khu sibala ekwe chindaalo kamakhumi kane, siilo ne kumuusi. Ndabunia buli sie bulamu nisio nabuumba sirure khu sibala.”

⁵Mala Noa akhola buli siindu nga Wele Omunyali Owa Bioosi ne amulaka.

⁶Noa aaba kimiiko chimia sita nga kameechi ne kechula khu sibala.

⁷ Niye no mukhasi wewe ne babaana bewe ne bakhasi be babaana bewe, bamulila mu meeli khukhwilukha kameechi kakechula.

⁸Khu saang'i chingwalaafu ne chikhali chingwalaafu tawe ne chinyuni na buli siindu simoola khu sibala,

⁹bibili bibili, siseecha ne siikhasi biengila mu meeli alala ne Noa nga Wele ne aaba ne amulakile.

¹⁰Enyuma we chindaalo saba, kameechi kecha khu sibala.

¹¹ Khu mwiiko kukhola chimia sita khu mwesi kwa khabili, khu ndaalo eye ekhumi na saba eye limenya lia Noa, chimoni che chisiba chimboofu che kameechi ke mwiloba charundukha, chinuma che mwikulu choosi chekukha.

¹²Efula yakwa khu sibala chindaalo kamakhumi kane, siilo ne kumuusi.

¹³Khu ndaalo eyo Noa no mukhasi wewe ne babaana bewe Shemu, Hamu ne Chafwesa ne bakhasi babwe, bengila mu meeli.

¹⁴Alala ne nabo chisaang'i ne chisolo chingano choosi, chikhaafu khuloondekhana ne chingano chacho, nende buli simoola khuloondekhana ne lukano lwasio, nende buli lukano lwe nyuni,

¹⁵Siseecha ne siikhasi sia buli siindu sie bulamu biengila mu meeli ne Noa.

¹⁶Ne bioosi bibiengilamo, siseecha ne siikhasi, sie bibuumbe bioosi biengilamo nga Wele ne aaba ne alakile Noa. Mala Wele Omunyali Owa Bioosi ekalila Noa mu meeli.

¹⁷Kameechi kachiililila khukhwichula khu sibala khu ndaalo kamakhumi kane. Kaaba kamakali mala kakila emeeli yakelakela khu meechi khungaaki khwe sibala.

¹⁸Kameechi kechula kakucha khu sibala mala emeeli yakelakela khu ngaaki khwako.

¹⁹Kameechi kechula lukali, kafuunikha bikulu bileeyi bie khu sibala sioosi.

²⁰Kameechi katasa khuniina kola bikele ekhumi na biraano angaaki we bikulu bileeyi khu sibala.

²¹Buli siindu sie bulamu khu sibala siafwa, chinyuni, chisaang'i, chisolo, nende buli mundu aafwa. Buli siindu simoola khu liloba siosi siafwa.

²²Buli siindu sisiaba khu sibala sieela kumuuya kwe bulamu siafwa.

²³Wele Omunyali Owa Bioosi abunia buli sibuumbe sie bulamu sisiaba khu sibala, babaandu, chisaang'i, ne bibiindu bimoola bioosi ne chinyuni choosi biabuna biarura khu sibala. Noa ne nabo nibo aaba nabo mu meeli bong'ene barama.

²⁴Kameechi karama ne kechuule khu sibala khu ndaalo emia ndala ne kamakhumi karaano.