Read lubukusu Lir. 8 Bible Online

Lir. 8 - lubukusu bible

Lir. 8

¹Ne kakhali Wele aakhebulila Noa ne chisaang'i ne chisolo choosi nicho aaba nacho mu meeli. Akhola ekhuungu yaucha khu sibala, mala kameechi karakikha khuboomba.

²Chimoni che kameechi ke asi we sibala ne chinuma che mwikulu chekalwa. Efula khukhwama mwikulu yemisibwa,

³mala kameechi kanywelelelwa khu liloba kalaa kalaa. Enyuma we chindaalo emia ndala ne kamakhumi karaano, kameechi kaba kaboombile.

⁴Khu ndaalo eye khumi na saba eye kumwesi kwa saba, emeeli yacha yema khu sikulu sia Ararati.

⁵Kameechi kachiililila khuboomba. Khu ndaalo eye khunyoa eye kumwesi kwe ekhumi, khungaaki khwe bikulu khwabonekha.

⁶Enyuma we chindaalo kamakhumi kane, Noa ekula enuma niyo aakhola khu meeli,

⁷mala aruma khooro kwapurukha eyi ne neyi, nabwila kameechi ne kateenya khu liloba.

⁸Nio Noa aruma liuusi lilole kameechi ne kateenyile khu sibala.

⁹Liuusi se lianyoola niio likwa tawe, sikila kameechi kaba kasiili khu sibala. Liamukobolela mu meeli, arusia kumukhono liakwakho mala aliingisia mu meeli.

¹⁰Alindiilila chindaalo saba chawa mala aruma lundi liuusi.

¹¹Liamukobolela ekolooba ne lisaafu litoro lie kumurongooro kwa miseituni khu munwa kwalio, nio Noa amanya ali kameechi kateenyile khu sibala.

¹²Noa aliinda lundi chindaalo saba, mala aruma liuusi lundi ne luno se liamukobolela tawe.

¹³Noa ne ali bukhulu bwe kimiiko chimia sita na mulala khu ndaalo eye khunyoa eye kumwesi kwe khunyoa, kameechi kaba kateenyile khu sibala. Mala Noa arusia lulama khu meeli, alola mala abona ali sibala siabalakaale.

¹⁴Khu ndaalo eye kamakhumi kabili na saba, eye kumwesi kwa khabili sibala siaba siomeele elala.

¹⁵Wele aboolela Noa ali,

¹⁶“Khorure mu meeli, ewe no mukhasi wowo, ne babaana bowo, ne bakhasi babwe.

¹⁷Khorure nende buli sie bulamu siili nawe, chinyuni ne chisaang'i ne chisolo ne bimoola bioosi, nio bisaalane lukali mala bikuche khu sibala.”

¹⁸Nio Noa arura mu meeli, niye no mukhasi wewe, ne babaana bewe ne bakhasi babwe.

¹⁹Buli esaang'i ne solo, buli siindu simoola, ne chinyuni choosi, biarura mu meeli mu matuuli khuloondekhana ne lukano lwabio.

²⁰Nio, Noa ombakha alutare khulwa Wele Omunyali Owa Bioosi mala aabukula khu buli saang'i engwalaafu ndala, nende khu buli nyuni engwalaafu ndala, mala abiaana nga embosio eye khukhwosia khu alutare.

²¹Esilikakha eye embosio eyo yasiimisia Wele Omunyali Owa Bioosi mala aloma mu mwoyo kwewe ali, “Se ndilaamakho lundi sibala sikila omundu tawe, sikila liliibaasia lie kumwoyo kwewe lili liibi khukhwama mu buele bwewe, lundi se ndibuniakho buli sibuumbe sie bulamu nga ne kholile tawe.

²²Nga sibala ne sisiilio, siise sie khumiicha ne khukesa, sie fula ne siimiyu, sie kumunaane ne siruumbi, kumuusi ne siilo, se biliwao tawe.”