Read lubukusu 2 Sam. 1 Bible Online

2 Sam. 1 - lubukusu bible

2 Sam. 1

¹Enyuma we lifwa lia Saulo, Daudi aaba akoboole khukhwama khukhwirana ne Baamaleki, mala amenya mu Sikilaki khu ndaalo chibili.

²Endaalo eloondakho omundu echa khukhwama mu kambi ya Saulo. Aba atabulaake chingubo chewe ne khukhwichukhakho liloba khumurwe. Acha niio Daudi aba mala enama ebweeni wewe mu khweboombia.

³Daudi amureeba ali, “Ewe wama waena?” Naye amukobosia ali, “Nelukhe khukhwama mu kambi eye Baisiraeli.”

⁴Daudi aloma ali, “Mboolele! Siina sisiekholeekhe?” Akobosia ali, “Banamae befwe beluukhe liie, ne babaandu befwe bakali bafwiile. Saulo no mwana wewe Yonasani bosi bafwiile.”

⁵Daudi amureeba ali, “Omanyile orie oli Saulo no mwana wewe Yonasani bafwiile?”

⁶ Omusoleeli oyo amukobosia ali, “Lianyoolekhana busa ndi khu sikulu sia Kiliboa, mala nabona Saulo eunile khwifumo liewe. Ne kamakaari ne babaandu be chifarasi che liie baba bamwimbie.

⁷Nio ekhebukha, ambona mala anaanga. Ne nga nafukiilila,

⁸Andeeba ali, ‘Ewe naanu?’, Mala namukobosia ndi ese Omuamaleki.

⁹Nio aloma ali, ‘Yiicha siimbi mala unjire! Naumiie lukali, ne ndi siimbi khufwa.’

¹⁰Khwako nacha niio ali mala namwiira. Sikila namanya ndi nga nakwiile ario alafwa siise siosi siosi. Nio namufuula ekuutwa khu murwe kwewe ne lichaabe khu mukhono kwewe mala nabireerire ebweeni wowo omwami.”

¹¹Daudi etabulaka chingubo, alala ne babaandu bewe boosi.

¹²Basooma ne khukhweyimana khulia khukhwola ekolooba. Bakhola bario sikila Saulo, ne Yonasani ne babaandu ba Wele Omunyali Owa Bioosi ne be nju eya Isiraeli baba bererwe mwiie.

¹³Daudi areeba omusoleeli omurereere elomo ali, “Ewe wama waena?” Amukobosia ali, “Ese Omuamaleki, ne menyile mu sibala siowo.”

¹⁴Daudi amureeba ali, “Siina sikila nokharia omurobore owa Wele Omunyali Owa Bioosi tawe?”

¹⁵Ne Daudi alanga mulala khu basoleeli bewe mala amukobosia ali, “Mwire!” Omusoleeli oyo apa Omuamaleki mala amwiira.

¹⁶Daudi aboolela Omuamaleki ali, “Wamwene werereere kano. Wekhalakila kumusaango wamwene nga ne wafukiilila oli werire oyo niye Wele Omunyali Owa Bioosi aarobora khuba omwami.”

¹⁷Daudi emba bililo bino khu Saulo ne omwana wewe Yonasani,

¹⁸ aaloma ali, lulwimbo luno lukhoya lwekesibwe khu baandu ba Yuda. Lwaandikwa mu sitabu sia Yasiari.

¹⁹“Ee Isiraeli luyali lwowo lwaweleele khu bikulu. Banamae befwe Banyindaafu bakwile barie!

²⁰Mukhaboola kano mu Katihi, namwe khu chingila che lukoba lwa Ashikeloni tawe. Ne busa bakhaana be ba Filisiti bakhola bario bekhoya, bakhaana be basiinde bakhola bario beniinia.

²¹“Efula namwe luume bikhakwakho khu bikulu bia Kiliboa tawe. Buli lwosi kimikuunda kiayo kikhoya kialekha khubamo bibiaamo tawe! Sikila ebweeneyo niyo engabo yo munyindaafu yafwolobisibwa engabo eya Saulo se yaakhwa kamafura lundi tawe.

²²Khukhwama khu sifuki sie babaandu babeerwa, khukhwama khu mibili kie banamae, buyiingo bwa Yonasani se bwakobola tawe, ne embalu eya Saulo se yakobola busa tawe.

²³“Saulo ne Yonasani, balayi lundi basiime, mu bulamu ne mu lifwa baaba alala. Baba babangu khukhila chifuruusi, be kamaani khukhila chitalang'i.

²⁴“Ee bakhaana Baisiraeli lila Saulo, Owamufwara enywe chingubo chimbesemu cha katani chisiimisia, ne khumusaa kamamili ke sahabu khu ngubo chenywe.

²⁵“Banyindaafu bakwile bariena mwiie! Yonasani eriirwe akonile khu bikulu bienywe.

²⁶“Khulila ewe wandaayase, Yonasani nga nilwo yaba asiimisia! Busiime bwowo khwise bwaba bwe liukia bwaba bukhila busiime bwe bakhasi.

²⁷“Banyindaafu bakwile bariena! Bulwaani bwabwe bwalekhilwe lundi buli busa.”