Read lubukusu 2 Sam. 10 Bible Online

2 Sam. 10 - lubukusu bible

2 Sam. 10

¹Mu biise bikeekhe omwami Nahasi okhwa Amoni afwa. Mala omwana wewe owe sisoleeli Hanuni eela mu bwami bwewe.

²Omwami Daudi aloma ali, “Khoyeele nekesie buriaani khu Hanuni, nga raraawe Nahasi ne akholela.” Nio Daudi aruma barume khumuoleelesia khulwe lifwa lia raraawe. Ne bakholi ba Daudi bacha mu sibala sie Baamoni.

³Nga ne bolayo, babemeelesi ba Amoni baboolela omwami wabwe Hanuni bali, “Ewe wibaasia oli nga Daudi ne arumire babaandu bano khu khuoleelesia abeele ne buuri khu raraao ku? Abarumire ano nga bayooti khuyama lukoba, nio bakhuule.”

⁴Hanuni aamba barume ba Daudi mala aababeka lubeka lulala lwe bunwanwa bwabwe. Aakhalaka chingubo chabwe khukhwola khu nduukhu, mala aabatimania bacha.

⁵Baba ne chisoni khukobola engo. Ne nga Daudi ne aulila kakekholeekhe, aarumania bababoolele barame e Yeriko khukhwola nga bunwanwa bwabwe ne bumela nio bakobole.

⁶Baamoni nga bamanya bali bakholile Daudi khuuba omusiku wabwe, basaba banamae Bashamu chielefu kamakhumi kabili khukhwama e Beti-rehobu ne Soba, babakeendelanga bikele. Lundi basaba banamae chielefu likhumi na chibili khukhwama e Tobu, ne khukhwama khu mwami owa Maaka, eelefu ndala.

⁷Daudi nga aulila aruma Yoabu ne banamae be kamaani.

⁸Baamoni barura enje berekekhera liie esilibwa sie lukoba. Ne Bashamu ba Soba nende ba Rehobu ne babaandu be Tobu nende e Maaka, baba busa bong'ene mu chingoongo.

⁹Nga Yoabu ne abona ali basiku banyala bamwibwaakalila khukhwama ebweeni ne nyuma, arobora banamae Baisiraeli balala barana ne khubara mu bweyaangu berekekhele Bashamu.

¹⁰Banamae bewe babarama abara mu bunyali bwa wandaaye Abisai, owabara mu bweyaangu bwe khu khupana ne Baamoni.

¹¹Yoabu aamuboolela ali, “Waaba nobona oli Bashamu balikho bambula, yiicha unjeete, ne Baamoni baaba ne balikho bakhuula, ndeecha khuyeete.

¹²Ba ne bunyindaafu! Lekha khupane ne kamaani sikila babaandu befwe, chingoba cha Wele wefwe. Ne lilienya lia Wele Omunyali Owa Bioosi likhoya liekholekhe.”

¹³Yoabu ne babaandu bewe babebwaakala, mala Bashamu belukha.

¹⁴Baamoni nga ne babona Bashamu ne belukha, bosi belukha Abisai ne khukobola mu lukoba lwabwe. Nio Yoabu akobola khukhwama mu khuupana ne Baamoni mala aacha Yerusalemu.

¹⁵Ne nga Bashamu ne bemanya bali bakhililwe ne Baisiraeli, babuusania bosi alala.

¹⁶Omwami Hatateseri arumania barera Bashamu ba baaba engelekha we luluuchi lwa Efurati. Becha e Helamu asi we lilaka lia Siobaki komanda owe banamae bo mwami Hatateseri khukhwama Soba.

¹⁷Daudi nga ne aulila ario, abuusia Baisiraeli boosi, bambukha luluuchi lwa Yoritani, mala bacha e Helamu. Bashamu baba berekeekhe khu khuupana ne Daudi mala bukhupani bwarakikha.

¹⁸Daudi eera Bashamu chimia saba be kamakaari nende be chipunda chielefu kamakhumi kane mala baunaka Siobaki, komanda owe banamae be Bashamu mala afwila ebweeneyo. Nio Bashamu belukha Baisiraeli.

¹⁹Babaami ba baaba bakholi ba Hatateseri nga ne bamanya bali baulilwe ne Baisiraeli, bakhola kumuleembe ne nabo mala baaba bakholi be Baisiraeli. Khwako Bashamu baria khuabina Baamoni lundi.