Read lubukusu 2 Sam. 11 Bible Online

2 Sam. 11 - lubukusu bible

2 Sam. 11

¹ Mu ndaalo che khumiicha mu biise nibio babaami buli lwosi bachilangamo liie, Daudi aruma Yoabu alala ne bakholi bewe ne banamae Baisiraeli boosi. Baula Baamoni ne khutiila lukoba lwa Raba. Ne kakhali Daudi arama mu Yerusalemu.

²Endaalo ndala ekolooba, Daudi enyokha khukhwama khu ndebe yewe eye khuuluukha mala acha khu ngaaki khwenju yewe. Nga ne aba ne alikho ne akeenda khu ngaaki okhwo, abona omukhasi alikho esiinga. Omukhasi oyo aba ne lukoondo lulayi.

³Nio arumania amanye omukhasi oyo naanu niye. Bamuboolela bali, “Ali Batisheba, omukhaana owa Eliamu, mukha Uria Omuhiti.”

⁴Nono Daudi arumania barume khureera Batisheba. Bamureerera mala akona ne naye. (Batisheba aba nio aamalile khuuba mu ndaalo chewe chimbi.) Enyuma wako Batisheba akobola engo wewe.

⁵Ekhumaliilikha emanya ali aesiisie mala aruma burume khu Daudi khumumanyisia.

⁶Nio Daudi aaruma burume khu Yoabu ali, “Ndangile Uria Omuhiti eche.” Nio Yoabu aaruma Uria khu Daudi.

⁷Uria nga ne oola, Daudi aamureeba Yoabu ne banamae ne bali balamu, lundi nga khu khuupana ne khulikho khuchiililila.

⁸Nio aboolela Uria ali, “Cha engo wisiinge bikele.” Uria aarekukha, ne Daudi amuloondiakho siianwa.

⁹Ne kakhali Uria se acha engo tawe. Akona amuliango kwenju yo mwami alala ne baliindi bo mwami.

¹⁰Daudi nga aulila ali Uria se acha engo tawe, amureeba ali, “Ewe wama lukeendo luleeyi busa siina sikila nokhachiile munju mwowo?”

¹¹Uria aakobosia Daudi ali, “Baisiraeli ne Bayaudi bali aleeyi mwiie. Bakona mu bisali alala ne Lisanduku lie Ndakaano. Omukhulu wase Yoabu ne babemeelesi bowo, omwami bapile ekambi mundaa. Nyala nacha ndiena engo, nalia lundi nanywa, mala ngone no mukhasi wase? Nosiili omulamu ese ne chuba ndi se khoyeele nakhola ndio tawe!”

¹²Khwako Daudi aaloma ali, “Yikhala ano endaalo yoosi ne kumutikhinyi nio khulekhe okoboleyo.” Nio Uria ekhala mu Yerusalemu endaalo ng'eneyo nende eloondakho.

¹³Daudi alaanga Uria khu siakhulia sie ekolooba mala aamuliisia ne khumunywesia mala aamumeesia. Akhaba siilo esio Uria se acha engo tawe. Ne kakhali akona ne bakholi bo mwami munju niyo baliindilangamo.

¹⁴Oli kumutikhinyi Daudi aandika ebarwa khu Yoabu akielesia Uria khumuyilila.

¹⁵Mu barwa omwo aandika ali, “Ra Uria khu mbongi, abuundu niio khu khuupana khuli khutinyu, mala mwile enyuma mu mulekhe bamwire.”

¹⁶Khwako nga Yoabu neerekekha khutiila lukoba, aruma Uria abuundu niio omusiku ali ne kamaani.

¹⁷Banamae bo musiku barura enje we lukoba mala baapa banamae ba Yoabu. Balala khu bakholi ba Daudi berwa, akhaba Uria yesi.

¹⁸Nio Yoabu aruma elomo khu Daudi aamuboolela nga liie ne lili.

¹⁹Ne ekesia omurume ali, “Enyuma nomalile khuboolela omwami khuloondekhana ne liie,

²⁰mala obone ne aambwa lirima, lundi ne akhureeba ali, ‘Siina sikila ne mwacha khu khuupanila alukoba? Se mwamanya muli banyala bamulasila khu masiisi tawe?

²¹Naanu owera Ebimeleki okhwa Yerubesieti? Se aba, omukhasi owamumwaatila lususi asi khukhwama khwisiisi mala amwiira nio afwila e Tebesi?’ Siina sikila ne mwacha siimbi ne lisiisi? Nio okhamukobosie oli, ‘Omukholi wowo Uria omuhiti yesi afwiile.’ ”

²²Nio omurumwa acha khu Daudi mala amuboolela koosi niko Yoabu amuboolela.

²³ Omurumwa aboolela Daudi ali, “Basiku befwe baba ne kamaani khukhukhila efwe mala barura enje we lukoba khu khuupana nafwe asiangalaamwe. Ne kakhali khwabatimania khukhwola asilibwa sie lukoba.

²⁴Nio bakhulasa buembo khukhwamila khwisiisi. Ne balala khu bakholi bowo bafwiile, akhaba omukholi wowo Uria omuhiti yesi afwiile.”

²⁵Daudi aboolela omurumwa ali, “Boolela Yoabu oli ‘Kamakhuwa kano kakhakhunaania tawe. Sikila sonyala wamanya naanu onyala afwila mwiie tawe. Muboolele arakikhe liliibwaakala lie kamaani khu lukoba mala aluule.’ Muboolele kano mala omureemo kumwoyo.”

²⁶Nga Batisheba ne aulila ali omuseecha wewe afwiile, aamulila.

²⁷Nga biise bie kamasika ne biawa, Daudi arumania areerwe munju mwewe. Aaba omukhasi wewe mala amusaalila omwana owe sisoleeli. Ne kakhali Wele Omunyali Owa Bioosi se asangaalila niko Daudi akhola tawe.