Read lubukusu 2 Sam. 12 Bible Online

2 Sam. 12 - lubukusu bible

2 Sam. 12

¹ Wele Omunyali Owa Bioosi aruma omung'oosi Nasani khu Daudi. Nasani amuchakho mala aamuboolela ali, “Babao babaandu babili ba baamenya mu lukoba lulala. Mulala aba omuiinda ne okundi omutaambi.

²Omuyiinda aba ne chikhaafu chingali ne bibiaayo.

³Ne omutaambi aba ne limeeme lilala liong'ene nilio akula. Aliliinda, mala liakhulila mungo mwewe ne babaana bewe. Anyala abele aliliisia ne biakhulia biewe, linyweela mu sikoombe siewe, ne khulilela khu bikele biewe. Limeeme liaba nga omwana wewe owe siikhaana khu niye.

⁴Endaalo ndala omukeni acha mungo mwo mundu omuiinda. Omuyiinda oyo se eenya khukhwira silala khu biaayo biewe khulwe khumukholela siakhulia tawe. Ne kakhali abukula limeeme lio mutaambi oyo mala eerera omukeni wewe”

⁵Daudi aambila omuiinda oyo lirima likali mala aaloma ali, “Nga Wele Omunyali Owa Bioosi ne amenyile mindali, omundu owakhola lino akhoyela aafwa.

⁶Khulwe khukhola sikholwa siibi nga esio, akhoyeele aruunge khukhwola khane sikila akhola lino ne akhali ne siisa tawe.”

⁷Nasani aboolela Daudi ali, “Ewe niye omundu oyo. Wele Omunyali Owa Bioosi, Wele owe Baisiraeli aloma ali, ‘Nakhuchukhakho kamafura obe omwami owa Isiraeli mala nakhusikula khukhwama khu Saulo.

⁸Nakhuelesia enju yewe ne bakhasi bewe. Nakhua enju eya Isiraeli ne Yuda. Abanga bino biaba bitiiti, nakhakhuelesie bibiindi khukhwola khabili.

⁹Siina sikila ne olekelesia likhuwa lia Wele Omunyali Owa Bioosi ne okhola bumayaanu mumoni chewe? Werire Uria omuhiti khulwe khurumikhira Baamoni, mala wabukuule omukhasi wewe khuuba omukhasi wowo.

¹⁰Khwako lifumo se lilirura munju yowo tawe, sikila se wandiire tawe lundi wabukuule mukha Uria omuhiti khuuba omukhasi wowo.

¹¹ Nja khukhola mulala khu be lisaaye liowo liliene khu khureerera butinyu. Ocha khubona nga ne nja khubukula bakhasi bowo khukhwama khwiwe ne khubaelesia omundu okundi. Ne acha khukona nabo kumuusi para.

¹²Ewe wakhola libi mu bwikisi, ne kakhali ese nja khukhola kano kekholekhe kumuusi para nio Baisiraeli boosi babone.’ ”

¹³Daudi akobosia Nasani ali, “Nakholile bumayaanu khu Wele Omunyali Owa Bioosi.” Nasani amukobosia ali, “Wele Omunyali Owa Bioosi akhubeleele, se ocha khufwa tawe.

¹⁴Ne sikila walekeleesie Wele Omunyali Owa Bioosi lukali mu khukhola kano, nono omwana wowo osaalwa acha khufwa.”

¹⁵Nio Nasani aacha engo wewe. Wele Omunyali Owa Bioosi akhola omwana niye Daudi asaala mu mukha Uria aba omulwale lukali.

¹⁶Daudi asaba Wele ali omwana aone. Eyimana khulia buli siindu, ne buli siilo acha mu lusiro lwewe ne khukona asi.

¹⁷Babemeelesi bewe bacha niio ali khumwinyosia ne kakhali aloba ne se aliaakho siakhulia siosi siosi ne nabo tawe.

¹⁸Enyuma we chindaalo saba, omwana aafwa. Ne kakhali bakholi ba Daudi baria khumuboolela bali omwana afwiile. Baloma bali, “Omwana ne asiili omulamu khwalomalomenge khu Daudi ne kakhali se aakhukobosianga tawe. Khulamuboolela khurie khuli omwana afwiile? Akhola ario eumisia.”

¹⁹Daudi nga ne abona bakholi nebalikho bamonyana, amanya busa ali omwana aafwiile. Nio aabareeba ali, “Omwana afwiile?” Bamukobosia bali, “Yee, afwiile.”

²⁰Daudi enyokha asi, esiinga mala eakha kamafura mala efwara chingubo chichiindi. Aacha asaaya munju eya Wele Omunyali Owa Bioosi. Nga akobola mu lukoba, asaba siakhulia bamuelesia mala aalia.

²¹Bakholi bewe bamureeba bali, “Olakholanga siina sino? Omwana ne asiili omulamu, wamulila lundi weyimana khulia. Ne kakhali nga afwiile, ne winyokha olia.”

²²Daudi aakobosia ali, “Yee, neyimana khulia lundi namulila ne asiili omulamu. Nebaasia ndi Wele Omunyali Owa Bioosi anyala aakholela ese siisa alekha omwana akhafwa tawe.

²³Ne luno aafwiile, siina sikila neyimane khulia? Nyala namulamusia aaba omulamu lundi? Endaalo ndala ndicha niio ali, ne niye se anyala aakobola niio ese ndi tawe.”

²⁴Nio Daudi aoleelesia omukhasi wewe Batisheba. Aaba naye, mala basaala omwana omusoleeli, niye Daudi alaanga ali Solomoni. Wele Omunyali Owa Bioosi asiima omwana oyo,

²⁵mala aruma omung'oosi Nasani khutiuukha omwana lisina ali Yetita, sikila Wele Omunyali Owa Bioosi amusiima.

²⁶Yoabu abwenao achiililila khu khuupana ne lukoba lwa Raba, lwe Baamoni, mala aluaamba.

²⁷Yoabu aaruma barume khu Daudi ne aloma ali, “Napaane ne lukoba lwa Raba mala natiilile niio banyoolanga kameechi.

²⁸Nono buusia banamae bowo boosi, mala wibwaakale lukoba mala wamwene oluaambe. Ne busa kholandio naluaamba mala lwalaangilwa khwisina liase.”

²⁹Nio Daudi aabuusia banamae bewe boosi aacha e Raba, alwibwaakala ne khuluaamba.

³⁰Daudi aabukula ekuutwa yo mwami wabwe khukhwama khu murwe khwewe. Busiro bwe kutwa eye esahabu eyo bwaba chikilo kamakhumi kataru na chiraano, ne libaale lie bukusi bwe angaaki liaba mukari mwe kutwa eyo. Babukula mala bakifwara khumurwe kwa Daudi. Lundi aabukula bibiindu bikali bie bunuuli khukhwama mu lukoba olwo.

³¹Ne ayingilila babaandu balwo khukhola kimilimo ne kimisumeno, chisuluulu ne chiaaywa che bichuuma. Abayingiilila khukhola bino bioosi ne khu khuupa kamatifari. Akhola ario akhaba khu baandu be chingoba chichiindi choosi cha Amoni. Nio Daudi ne babaandu bewe bakobola e Yerusalemu.