Read lubukusu 2 Sam. 13 Bible Online

2 Sam. 13 - lubukusu bible

2 Sam. 13

¹Abusolomu okhwa Daudi aba no mukooko wewe bali Tamari owe lukoondo lulayi. Enyuma we siise, Amunoni, mulala khu ba okhwa Daudi, amusiima.

²Amusiima lukali khukhwola nga elwasia sikila Tamari. Tamari aba owe yabwana nono bwaba buandalafu khu Amunoni khuuba naye.

³Amunoni aba no musaale wewe bali Yonatabu okhwa Simea, wandaaye owa Daudi. Yonatabu aba omundu omukesikesi.

⁴Yonatabu aboolela Amunoni ali, “Ewe oli omwana wo mwami, ne buli mutikhinyi oli omusulunyu. Makhuwa siina?” Aamukobosia ali, “Nasiimile Tamari, omukooko owa wandaayase Abusolomu.”

⁵Yonatabu aamuboolela ali, “Yikhola nga olwaala mala okone khu sitanda. Raraao ne eecha khu khubona, muboolele oli, ‘Nosiima boolela omukooko wase Tamari eche ambe siakhulia ndie. Lekha aakholele siakhulia niio enyala namubona, mala omwene ambelesie mala ndie khukhwama mu makhono kewe.’ ”

⁶Nio Amunoni ekholesia nga oolwaala mala aakona khu sitanda. Omwami Daudi aacha khumubona. Amunoni amuboolela ali, “Nosiima lekha Tamari omukooko wase eche akholele kimikaati mikeekhe kiri ne ndoleleele, mala ndie khukhwama khu makhono kewe.”

⁷Khwako Daudi aruma likhuwa khu Tamari ne aloma ali: “Cha munju eya Amunoni mala omukholele siakhulia.”

⁸Nio Tamari acha munju mwa wandaaye Amunoni nimwo aba nakonile. Abukula bufu, abung'oona, mala amukholela kimikaati ne aloleleele.

⁹Aabukula sifuria aamuchukhululila kimikaati alie, ne kakhali se akilia tawe. Aloma ali, “Oona babaandu boosi bache bandureo,” mala boosi bamururao bacha.

¹⁰Nio Amunoni aboolela Tamari ali, “Reera kimikaati abulili ano mala ndie khukhwama khu makhono kowo.” Tamari abukula kimikaati mala acha nakio niio wandaaye Amunoni aaba.

¹¹Nga amuyilila alie, Amunoni amutiila mala amuboolela ali, “Yiicha okone ne nase mwana wefwe.”

¹²Tamari amukobosia ali, “Tawe mwana wefwe. Okhambiingilila khukhola sisiindu sie chisoni nga sino siri tawe. Sisiindu nga sino siri se siekholekhanga mu Isiraeli tawe.

¹³Ese nja khuyila waena chisoni chase? Ne ewe olaba mulala khu be biyiingwa mu Isiraeli. Nono khusaba, nosiima, boolela omwami. Ne ndi na ng'ali ndi anyala ambaana ese khwiwe.”

¹⁴Ne kakhali Amunoni se amurekeeresia tawe. Khubeela aba ne kamaani khumukhila, amuyingiilila mala amukwakho.

¹⁵Nio Amunoni amubiila lukali, mala amubiila khukhila nga aaba ne amusiima ekhunyoa. Mala Amunoni amuboolela ali, “Yinyokha oche.”

¹⁶Tamari aamukobosia ali, “Tawe mwana wefwe. Khu khumboona nje khuli khuubi lukali khukhila niko ukholeele.” Ne Amunoni se amurekeeresia tawe.

¹⁷Amunoni alaanga omukholi wewe mala amuboolela ali, “Yinyosia omukhasi yuno mu moni chase! Mumwaate enje mala okhomekhe lulwiki.”

¹⁸Omukholi aamwaata Tamari enje mala akhomekha lulwiki. Tamari aba efwaranga engubo endeeyi eye kamakhono kamaleeyi. Engubo yino niyo bakhaana beyabwaana bo mwami befwaranga mu ndaalo ng'enecho.

¹⁹Tamari echukhakakho likokhe khumurwe, etabula engubo niyo aaba ne afwarire, mala acha ne alila lukali ne eambile kamakhono khumurwe.

²⁰Nga wandaaye Abusolomu ne amubona, amureeba ali, “Wandaayo Amunoni abele nawe? Nosiima mukooko wase, okhabeelela lukali tawe. Ali wandaayo niye, khwako okhaboolelakho yesi yesi tawe.” Tamari aamenya munju mwa Abusolomu, mu busulunyu ne khukhweumba.

²¹Omwami Daudi nga ne aulila sisiekholeekhe, aambwa lirima likali.

²²Ne kakhali Abusolomu se alomalomakho likhuwa liosi liosi khu Amunoni tawe. Abiila Amunoni lukali nga ne afwolobia omukooko wewe Tamari.

²³Enyuma we kimiiko kibili, Abusolomu aba nende baabeka kamakheese kewe e Baali-Hasori, ambi ne lukoba lwa Efuraimu. Alaanga babaana basoleeli bo mwami Daudi boosi.

²⁴Abusolomu aacha khu mwami Daudi mala aamuboolela ali, omwami ndikho nja khubeka kamakheese kase, nono khusaaya wiche ne bakholi bowo.

²⁵Ne kakhali omwami aamukobosia ali, “Tawe, mwana wase. Bucha khuba busiro bukali khwiwe khwaaba ne khucha fweesi.” Abusolomu amuyingilila ne omwami se afukiilila tawe, ne kakhali abiita Abusolomu chikhabi.

²⁶Ne Abusolomu aloma ali, “Waaba nokhacha ne nafwe tawe, lekha wandaayase Amunoni eche ache ne nafwe?” Omwami aamureeba ali, “Siina sikila ache nanywe?”

²⁷Ne kakhali Abusolomu anialilisia Daudi khukhwola nga afukiilila Amunoni ne babaana bewe babaandi basoleeli bacha ne Abusolomu.

²⁸Nio Abusolomu alaka bakholi bewe ali: “Ba na ng'ali muli Amunoni anywele endali engali, mala mumwiire, mukharia tawe. Ba ne kamaani lundi banyindaafu.”

²⁹Mala bakholi ba Abusolomu bakhola Amunoni nga Abusolomu ne ababoolela. Ba okhwa Daudi ba barama boosi baniina khu nyumbu chabwe mala belukha.

³⁰Ne basiili khwola engo tawe, burume bwolela Daudi buli, “Abusolomu eerire babaana bowo basoleeli boosi mbao oramire tawe!”

³¹Omwami eema etabulaka chingubo mu bubeeleli, mala akona asi. Bakholi ba babao boosi betabula chingubo chabwe.

³²Ne kakhali Yonatabu, okhwa Simea wandaaye owa Daudi, aamuboolela ali, “Omwami, se beerire babaana bowo be sisoleeli boosi tawe. Amunoni yeng'ene niye ofwiile. Abusolomu arekekha kano khukhwama mu biise nibio Amunoni akwila khu mukooko wewe Tamari.

³³Nono okhasuubila chimboolelwa oli babaana bowo be sisoleeli boosi bafwiile tawe. Amunoni yeng'ene owiriirwe.”

³⁴Mu biise bienebio Abusolomu elukha. Ne asiiloma, omunamae owaba khu milimo abona sipupu sikali sie babaandu khu sikulu khu muyila kukwama Horonaimu.

³⁵Yonatabu aboolela Daudi ali, “Babecha abo bali babaana bowo be sisoleeli, nga ndomile.”

³⁶Nga ne amala khuloma busa ari, basoleeli ba Daudi baulukha. Nga ne boola boosi ne barakikha khulila. Daudi ne bakholi bewe boosi barakikha khulila lukali.

³⁷ Ne kakhali Abusolomu elukha, mala aacha wa Talimai okhwa Amihudi omwami owa Keshuri. Daudi achiililila khulila omwana wewe khu ndaalo chingali.

³⁸Abusolomu elukha aacha Keshuri mala amenyayo kimiiko kitaru.

³⁹Ne kakhali omwami ne malile khuola khu lifwa lia Amunoni, Daudi arakikha khukhwikoomba omwana wewe Abusolomu.