Read lubukusu 2 Sam. 14 Bible Online

2 Sam. 14 - lubukusu bible

2 Sam. 14

¹Yoabu okhwa Seruya amanya ali omwami Daudi enya omwana wewe Abusolomu lukali.

²Nio Yoabu aalaanga omukhasi omukesi owamenya e Tekoa. Nga ola, amuboolela ali, “Yikhola nga oli mu masika, mala wifware chingubo chowo che kamasika. Ne okheakhakho kamafura tawe. Yikhola khuuba nga omukhasi omenyile mu masika khulwe siise sileeyi.

³Nio oche khu mwami mala omuboolele kamakhuwa niko khuboolela kano.” Ne Yoabu amuboolela niko aloma.

⁴Omukhasi owa Tekoa oyo nga oola wo mwami, amwinamila bubweeni bwewe bwetiila asi, khukhwekesia buriaani mala aaloma ali, “Omwami njeete!”

⁵Omwami amureeba ali, “Butinyu bwowo buli siina?” Amukobosia ali, “Omwami, ese ndi namulekhwa. Omuseecha wase afwa.

⁶Omwami, naba ne babaana base be siseecha babili. Endaalo ndala balomanila mundaa. Se abao yesi yesi owabakaya tawe, mala mulala apa owasie eera.

⁷Ne luno, omwami, balebe base boosi bambiile. Baloma bali, ‘Reera omundu owerire wandaaye mala yesi eerwe nga niye ne eera wandaaye.’ Bacha khwonaka lilieyikina liase limaliilisi. Bacha khulekha omuseecha wase nakhali no mwana owe siseecha oliinda lisina liewe tawe.”

⁸Nio omwami aboolela omukhasi oyo ali, “Kobola engo, nja khumanya butinyu bwowo.”

⁹Nio omukhasi owa Tekoa oyo aloma ali, “Omwami, Bumayaanu bukhoya bwaaba khu samwene ne khu be nju eya paapa wase. Ne kakhali omwami, ewe ne bubwami bwowo mukhoya mwaba balekhuule khukhwama khu bumayaanu.”

¹⁰Omwami aamuboolela ali, “Omundu yesi yesi nakhunaania mureere khwise, ne se acha khukhunaania lundi tawe.”

¹¹Omukhasi oyo aaloma ali, “Omwami, nosiima saba Wele Omunyali Owa Bioosi, Wele wowo. Nio omulebe wase ooli ne bunyali bwe khukhwiyacha akhera omwana wase okundi oyo tawe.” Daudi amukobosia ali, “Ng'ali nga Wele Omunyali Owa Bioosi ne amenyile mindali, sisiindu siosi siosi se sicha khwekholekhakho khu mwana wowo tawe.”

¹²Omukhasi oyo aloma ali, “Nosiima omwami, lekha ndomekho likhuwa lilala liong'ene.” Aamukobosia ali, “Loma.”

¹³Omukhasi oyo aamuboolela ali, “Siina sikila ne okholela babaandu ba Wele kamabi? Se wafukiilila omwana wowo omwene khukobola khukhwama mu mbaambe tawe! Khwako wekhalakiile kumusaango wamwene khuloondekhana nende niko wama khulomaloma.

¹⁴Fweesi khuli bekhufwa. Khuli nga kameechi kachichukha asi, kakhabuusibwa lundi tawe. Aakhaba Wele se aukhanianga babaandu tawe. Ne kakhali ayiima chingila che khukobosia omundu khukhwama mu mbaambe.

¹⁵Nono omwami, sifuno sikilile ne nicha khulomaloma ne nawe sili sino. Babaandu bandikhirisia mala nebaasia ndi nolomaloma ne nawe wakana ukholela nilio khureeba.

¹⁶Nibaasiisie ndi onyala wandekeeresia mala wambonia khukhwama khuyo owenya khukhwira omwana wase ne nase mala akhurusie efwe khu sibala nisio Wele aelesia babaandu bewe.

¹⁷ Ne ndomile ndi endakaano yowo omwami, echa khuniinda ese. Sikila ewe, omwami oli nga malaika owa Wele, lundi onyala waukhasia bulayi ne bubi. Wele Omunyali Owa Bioosi, Wele wowo abe nawe!”

¹⁸Omwami aboolela omukhasi oyo ali, “Ndikho enja khu khureeba lireeba, mala okhoyele umboolele bung'ali bwoosi.” Nio omukhasi oyo aloma ali, “Omwami, ndeebe siosi siosi.”

¹⁹Omwami aamureeba ali, “Yoabu niye okhuboolele kano?” Amukobosia ali, “Omwami wase, nga nomenya, ng'ali mbao engila yosi yosi ekhiingilila khukobosia lireeba liowo tawe. Ng'ali omukholi wowo Yoabu niye owamboolela niko khola nende niko ndomaloma.

²⁰Ne akhola ario khulwe khukaluukhasia kaliio. Ne kakhali omwami ewe oli omukesi nga malaika owa Wele lundi omanyile buli siindu siili khu sibala.”

²¹Enyuma wa kano, omwami aboolela Yoabu ali, “Nakhalake khukhola nilio wenya. Cha oreere omusoleeli Abusolomu.”

²²Yoabu enama asi ebweeni wa Daudi bubweeni bwetiila asi khukhwekesia buriaani mala aloma ali, “Luno namanyile ndi nakhusiimiisie, sikila wafukiiliile lireeba liase.”

²³Nio Yoabu enyokha acha e Keshuri mala akobosia Abusolomu e Yerusalemu.

²⁴Abwenao omwami arusia kamalaka ali Abusolomu se akhoyeele amenya mu lukoba tawe. Omwami aloma ali, “Se nenya mubonekho tawe,” khwako Abusolomu amenya munju yewe omwene mala se abonekhakho ebweeni wo mwami tawe.

²⁵Lundi se abao omundu mu Isiraeli owamanyikhana mu lukoondo lulayi nga Abusolomu tawe. Khukhwama khu siikhandakilo khukhwola khu murwe se abakho ne libi liosi liosi tawe.

²⁶Lichuune liewe liaba likali mala alibekanga lulala khu mwiiko ne lileyile lundi ne libeele liisiro. Ne alibekile liaba liola busiro bukhila chikiilo chibili khuloondekhana ne sikelo sie bubwami.

²⁷Abusolomu aba ne babaana basoleeli bataru no mukhaana mulala owalaangwa bali Tamari. Tamari aba ne lukoondo lulayi.

²⁸Abusolomu amenya mu Yerusalemu kimiiko kibili ne akhabonekhakho ebweeni wo mwami tawe.

²⁹Nio alaanga Yoabu amuyile wo mwami. Ne kakhali Yoabu se eecha tawe. Abusolomu aamulaanga lundi ne kakhali lundi Yoabu aloba khukhwicha.

³⁰Abusolomu aboolela bakholi bewe ali, “Lola, kumukuunda kwa Yoabu kuloondekhana ne kukwase mala kulimo eshayiri. Cha mukwosie.” Khwako bakholi bacha mala boosia kumukuunda.

³¹Yoabu acha owa Abusolomu mala amureeba ali, “Siina sikila bakholi bowo ne boosiisie kumukuunda kwase?”

³²Abusolomu amukobosia ali, “Sikila se wecha nga nakhulaanga tawe. Nenya oche wo mwami mala omuboolele oli Abusolomu areeba ali, ‘Siina sikila ne nalekha Keshuri mala necha ano? Liakhabeele lilayi ese khuchilila khumenya ebweeneyo.’ Nono ese nenya unjeete mbone omwami. Ne naba ne ndi ne bubi, lekha anjire.”

³³Khwako Yoabu aacha wo mwami mala amuboolela niko Abusolomu aloma. Omwami alaanga Abusolomu, mala Abusolomu aacha niio ali, enama bubweeni bwewe bwetiila asi mu buriaani, omwami ekwayila Abusolomu.