Read lubukusu 2 Sam. 16 Bible Online

2 Sam. 16 - lubukusu bible

2 Sam. 16

¹ Nga Daudi ne amala khubira khu ngaaki khwe sikulu, akaanana ne Siiba omukholi owa Mefibosheti. Siba aba ne chipunda chibili chisutile kimikaati chimia chibili, binywa emia ndala bie kimisabibu kimiomu, kamatuunda emia ndala ke siimiyu, ne eoochwa eye ndali.

²Omwami aamureeba ali, “Oreerire bino biasina?” Siiba aamukobosia ali, “Chipunda chili che babaandu be nju yo mwami khukeendelakho. Kimikaati ne kamatuunda ke siimiyu bili bie baele khulia, ne endali eli eyabo baluwa ne bali mu sichiimi banywe.”

³ Omwami Daudi amureeba ali, “Mefibosheti ali waena?” Siiba amukobosia ali, “Ali mu Yerusalemu. Sikila ali nang'ali ali luno Baisiraeli bacha khumukoboselia bubwami bwa kukaawe Saulo.”

⁴Omwami aboolela Siiba ali, “Buli siindu sisiaba sia Mefibosheti luno sili sisiowo.” Siiba aamukobosia ali, “Ese khuria ewe. Njalaale omwami wase.”

⁵Nga Daudi ne oola e Baurimu, mulala khu balebe ba Saulo, Simei okhwa Kera, arura aamwakaanila, mala achiililila khumulaama ne alikho eecha.

⁶Simei aarakikha khuchukucha Daudi kamabaale ne babaandu bewe boosi. Ne Daudi aba akariirwe ne babaandu bewe bamuliinda.

⁷Simei amulaama ne aloma ali, “Rekukha oche! Rekukha oche! Omwiiri! Owe sipoli!

⁸Wele Omunyali Owa Bioosi alikho akhuukuuma ewe khulwe sifuki sienju eya Saulo, niye wabukula bubwami. Wele Omunyali Owa Bioosi aeleesie bubwami omwana wowo Abusolomu, ne ewe luno wabunile sikila oli omwiiri.”

⁹Abisai okhwa Seruya, aboolela omwami Daudi ali, “Omwami, siina sikila ne olekha embwa efu yino ne ekhulaama? Ndekhe enje ebweeneyo mala murusiekho kumurwe kwewe!”

¹⁰Ne kakhali omwami akobosia Abisai ali, “Ndi na siina nanywe, baana ba Seruya? Aaba ne andaama sikila Wele Omunyali Owa Bioosi amuboleele khukhola ario, naanu ooli ne bunyali bwe khureeba sikila ne alikho akhola ario?”

¹¹Mala Daudi aboolela Abisai ne bakholi bewe boosi ali, “Kaaba bali omwana wase omwene eenya khu khunjira, aba Omubenjamini yuno se alakhola ario khukhilakhoo? Wele Omunyali Owa Bioosi amuboleele khu khundaama, khwako mulekhe akhole niko akhola.

¹²Wakana Wele Omunyali Owa Bioosi alabona butinyu bwase mala anduunge bulayi khulwe silaamo nisio ndikho nyoola luno.”

¹³Khwako Daudi ne babaandu bewe bachiililila ne lukeendo lwabwe. Simei aroonga nabo, ne akeendela khu ndulo khwe sikulu. Abalaama ne abachukucha kamabaale ne khubataamusilia lipukhuulu ne akeenda.

¹⁴Omwami ne babaandu bewe boosi boola e Yoritani ne baluile, mala baolela ebweeneyo.

¹⁵Abusolomu ne Baisiraeli boosi bengila mu Yerusalemu, ne Aitiofeli yesi aba nabo.

¹⁶Nga Hushai omuakiti, omusaale owa Daudi ne akaanana ne Abusolomu, aloma ali, “Omwami oyindile! Omwami oyindile!”

¹⁷Abusolomu amureeba ali, “Buno nibwo buriaani bwowo khu musaale wowo Daudi? Siina sikila ne okhachiile ne naye?”

¹⁸Hushai akobosia Abusolomu ali, “Ese ndi lubeka lwoyo owaroborwa ne Wele Omunyali Owa Bioosi, ne Baisiraeli boosi. Omwenoyo niye ndaba naye lundi niye ndamenya naye.

¹⁹Ne lundi, ndakholela naanu, ne akhali omwana owo mwami wase? Nga ne nakholela raraao, nio nja khu khukholela ewe.”

²⁰Nio Abusolomu aaboolela Aitiofeli ali, “Ewe khukelekele, khukhola siina?”

²¹Aitiofeli amukobosia ali, “Cha okone ne bakhasi ba raraao nibo aamenyia busa nga basaale, nibo alekha khuliinda lichipi lio mwami. Nio buli Omuisiraeli acha khumanya ali ewe wabeele omusiku owa raraao. Ne baloondi bowo bacha khuba ne kamaani.”

²² Nio bombakhila Abusolomu liiema khu ngaaki khwenju, niio buli mundu abona mala Abusolomu engilamo ne khukona ne bakhasi nibo raraawe aamenyia busa nga basaale.

²³Buli likeleka nilio Aitiofeli aboolanga mu ndaalo echo liafukiililwangwa nga elomo eya Wele, Daudi ne Abusolomu boombi baloondangakho.