Read lubukusu 2 Sam. 18 Bible Online

2 Sam. 18 - lubukusu bible

2 Sam. 18

¹Omwami Daudi abuusia alala babaandu bewe, mala abakaba mu bipupu bie emia ndala ne bie eelefu, mala abaelesia babemeelesi babwe.

²Nio Daudi abaruma mu bipupu bie banamae bitaru: Sipupu silala asi owa Yoabu, sisiindi asi owa Abisai okhwa Seruya wandaaye owa Yoabu ne sisiindi asi owa Itai omukiti. Omwami Daudi aboolela babaandu bewe ali, “Ese samwene ndacha ne nanywe.”

³Bamukobosia bali, “Ewe sokhoyeele wacha ne nafwe tawe. Kaaba bali efwe khwilukha mbao olakhweendekhelela efwe tawe. Akhaba babaandu enusu mwifwe khwakherwa, mbao okhweendekhelela tawe. Ne kakhali ewe oli ne bukhala khukhila efwe eelefu ndala. Bwakhabeele bulayi abanga wikhala mu lukoba muno mala okhurumire buyeeti.”

⁴Omwami aabakobosia ali, “Nja khukhola liosi liosi nilio mwibaasia muli lili lilayi.” Nio omwami eema andulo we silibwa banamae bewe ne barura ne bali mu bipupu bie elefu ndala ne chimia.

⁵Omwami Daudi aana kamalaka khu Yoabu, Abisai ne Itai ali: “Khulwase, mukhaumisiakho omusoleeli Abusolomu tawe.” Mala babaandu boosi baulila Daudi ne arusia lilaka lino khu bemeelesi be kamae bewe boosi khuloondekhana ne Abusolomu.

⁶Nio banamae ba Daudi barura bacha bapana ne banamae Baisiraeli mu musiru kwa Efuraimu.

⁷Banamae Baisiraeli baulilwa ebweeneyo ne banamae ba Daudi. Endaalo eyo babaandu berwa baboola chielefu kamakhumi kabili.

⁸Khu khuupana khwamalatana khu sibala sioosi, mala babaandu bakali bafwila mu musiru khukhila babeererwa mwiie.

⁹Abusolomu aatundubikhana ne babaandu ba Daudi. Abusolomu aba alikho atimia enyumbu, ne nga ne yabirira asi we kumurongooro kumuboofu kwe kumukhoonge, kumurwe kwa Abusolomu kwaambwa mu sakia. Enyumbu yatima mala Abusolomu arama ne alikho asungwacha mu sakia.

¹⁰Mulala khu baandu ba Daudi aamubona mala aboolela Yoabu ali, “Omwami, mboone Abusolomu ne alikho asungwachila khu mukhoonge!”

¹¹Yoabu amukobosia ali, “Waaba nomuboone, siina sikila nokhamwirireo? Ese nakhasangaalile ne khukhuelesia chirupia likhumi ne kumusiipi kwo omunamae.”

¹²Ne omundu oyo amukobosia ali, “Wakhamba abele chirupia elefu ndala, abele se nyala nasuta akhaba lulwala lwase lwong'ene naara khu mwana wo mwami tawe. Fweesi khwaulila nga omwami ne akhulaka ewe ne Abisai ne Itai ali, ‘Khulwase mukhaumisiakho omusoleeli Abusolomu tawe.’

¹³Ne abanga se nariire omwami tawe mala neera Abusolomu, mala omwami aulile koosi, ewe se wakhanyalile khu khungaya tawe.”

¹⁴Yoabu aloma ali, “Se nja khumala biise bikali ne nawe tawe.” Aabukula kamafumo kataru mala aunakila Abusolomu mu sifuba ne asiili omulamu, khu mukhoonge.

¹⁵Nio banamae ekhumi babasutilanga Yoabu bulwaani babotookhelela Abusolomu bamupa mala bamwiira.

¹⁶Yoabu aapa ekhoombi khukaania banamae balekhe khutimania Baisiraeli.

¹⁷Babukula kumubili kwa Abusolomu bakumwaata mwiloo lileeyi mu sichiimi, mala bakuraakho kamabaale kamakali. Baisiraeli boosi belukha, buli mundu acha engo wewe.

¹⁸Abusolomu ne asiili omulamu aba asimikha enjeko mwitooma mwo mwami, sikila se aba no mwana omusoleeli olangilwa khu lisina liewe tawe. Khwako elaangila khu mwene. Khukhwola endaalo yino, emanyikhaane nga Enjeko eya Abusolomu.

¹⁹Nio Aimaasi okhwa Satoki aboolela Yoabu ali, “Lekha ese ndime nje mboolele omwami elomo endayi ndi Wele Omunyali Owa Bioosi amuonisie khukhwama khu maani ke basiku bewe.”

²⁰Yoabu amukobosia ali, “Okhayila elomo endayi luno tawe. Onyala wakhola orio mu ndaalo ekiindi. Ne kakhali luno omwana wo mwami afwiile.”

²¹Nio Yoabu aboolela omukushi ali, “Cha oboolele omwami niko oboone.” Omukushi enama ebweeni wa Yoabu mu buriaani mala atima acha.

²²Aimaasi okhwa Satoki lundi aboolela Yoabu ali, “Kakhaba karie ndekhe sesi nonde khu mu Kushi.” Yoabu amureeba ali, “Sikila siina ne wenya khukhola orio, mwana wase? Socha khunyoolakho kumuruuru khu kano tawe.”

²³Aimaasi amukobosia ali, “Kakhaba karie, ndatima.” Yoabu amukobosia ali, “Nono tima.” Nio Aimaasi atima ekha khu muyila abirira mwitooma lia Yoritani, mala abira omukushi.

²⁴Daudi aba ekhaale akari we bilibwa bie lukoba. Omuliindi aniinila khwisiisi mala eema khungaaki khwe silibwa. Alola mala abona omundu alikho atima yeng'ene.

²⁵Omuliindi alanga mala aboolela omwami. Omwami aloma ali, “Aaba nali yeng'ene aba alikho areera elomo endayi.” Ne omundu oyo achiililila khukhwimbiya lukoba.

²⁶Lundi omuliindi abona omundu okundi alikho atima yeng'ene, alanga omuliindi owe silibwa mala amuboolela ali, “Lola! Omundu okundi alikho atima yeng'ene!” Omwami amukobosia ali, “Yuno yesi alikho areera elomo endayi.”

²⁷Omuliindi aloma ali, “Nibaasia ndi omundu oli ebweeni atima nga Aimaasi okhwa Satoki.” Omwami akobosia ali, “Aimaasi ali omundu omulayi, lundi alikho areera elomo endayi.”

²⁸Aimaasi aboolela omwami ali, “Buli siindu sili silayi busa.” Enama ebweeni wa Wele Omunyali Owa Bioosi bubweeni bwetiila asi mu buriaani mala aloma ali, “Wele Omunyali Owa Bioosi, Wele wowo afume, akhuuliile babaandu babakhukaluukhanakho, omwami.”

²⁹Omwami amureeba ali, “Omusoleeli Abusolomu omulamu?” Aimaasi akobosia ali, “Omwami, nga omukholi wowo Yoabu ne anduma, naulila luyoka lukali, ne kakhali se namanya lwaba siina tawe.”

³⁰Omwami amuboolela ali, “Cha wime ao,” mala acha emao.

³¹Nio omurumwa omukushi ola mala aboolela omwami ali, “Omwami ndi ne lomo endayi khwiwe! Luno Wele Omunyali Owa Bioosi akhuuliile abo ba baaba ne bakhwaukhakho boosi!”

³²Omwami areeba Omukushi ali, “Omusoleeli Abusolomu omulamu?” Omukushi amukobosia ali, “Omwami, basiku bowo boosi ne babaandu bakhwaukhakho boosi bakhoya babe nga omusoleeli oyo.”

³³Omwami esiindukha. Acha mu lusiro lubeka lwe silibwa mala alila. Acha ne alila ali, “Mwana wase! Mwana wase Abusolomu! Abusolomu mwana wase! Ese owakhafwiile mu bweyaangu bwowo, mwana wase! Abusolomu, mwana wase! Mwana wase!”