Read lubukusu 2 Sam. 2 Bible Online

2 Sam. 2 - lubukusu bible

2 Sam. 2

¹Enyuma wa kano, Daudi areeba Wele Omunyali Owa Bioosi ali, “Nyala nacha namiia lukoba lulala lwa Yuda?” Wele Omunyali Owa Bioosi amukobosia ali, “Yee khoche.” Daudi areeba lundi ali, “Lulala siina?” Wele Omunyali Owa Bioosi amukobosia ali, “Heburoni.”

² Khwako Daudi acha Heburoni ne bakhasi bewe boombi, Ahinoamu owe Yesireeli ne Abikaili ngwa Nabali, owama e Karimeli.

³Lundi Daudi abukula babaandu bewe nende be chinju chabwe, mala bamenya mu ngoba chili aembi ne Heburoni.

⁴ Nio babaandu ba Yuda bacha e Heburoni mala bachukha kamafura khu Daudi abe omwami owa Yuda. Nga Daudi ne aulila ali babaandu ba Yabesi-Kileati nibo babasiikha Saulo,

⁵aruma barume khu baandu Yabesi-Kileati ne aloma ali, “Wele Omunyali Owa Bioosi akhoya amuelesie chikhabi, sikila nga mwekesie burie bwenywe khu mwami wenywe ne khumusiikha.

⁶Nono Wele Omunyali Owa Bioosi akhoya amwekesie busiime ne lisuubila. Ese nja khu mukholela kamalayi sikila niko mukholile.

⁷Khwako, ba ne kamaani lundi banyindaafu! Omwami wenywe Saulo afwiile, ne babaandu ba Yuda banjukhilekho kamafura khuba omwami wabwe.”

⁸Abuneri okhwa Neri, aba komanda owe banamae ba Saulo. Abukula Ishibosheti okhwa Saulo bambukha luluuchi lwa Yoritani bacha Mahanaimu.

⁹Ebweeneyo Abuneri akhola Ishibosheti khuba omwami owe bibala bia Kileati, Asieri, Yesireeli, Efuraimu, ne Benjamini, ne khu Isiraeli yoosi.

¹⁰Ishibosheti okhwa Saulo aba ne bukhulu bwe kimiiko kamakhumi kane ne arakikha khukhwamiia Isiraeli, mala amiia khu miiko kibili. Ne ekholo eya Yuda nayo yaloonda Daudi.

¹¹Daudi amiia Yuda ne ali mu Heburoni khu miiko saba ne kimieesi sita.

¹²Abuneri okhwa Neri, ne bakholi ba Ishibosheti okhwa Saulo, bama e Mahanaimu bacha mu lukoba lwa Kibeoni.

¹³Yoabu okhwa Seruya, ne bakholi ba Daudi bacha babakaanila alitiisi lia Kibeoni. Bekhala asi bosi, sipupu silala lubeka lulala lwe litiisi ne sipupu sisiindi nasio lubeka luluundi.

¹⁴Abuneri aboolela Yoabu ali, “Lekha babaana basoleeli benyokhe benyae ebweeni wefwe.” Mala Yoabu akobosia ali, “Lekha benyokhe.”

¹⁵Khwako benyokha mala babala babaandu likhumi na babili ba Ishibosheti ne kholo eya Benjamini, ne likhumi na babili ba Daudi.

¹⁶Buli sia mulala afwakhila omusiku wewe kumurwe ne khumuuna embalu mumbafu nio bakwa asi bafwila khulala. Nio liakila abuundu ao mu Kibeoni alaangwa “Siwanja sie chimbalu.”

¹⁷Liie liaba lirafu lukali endaalo ng'eneyo. Abuneri ne Baisiraeli baulwa ne banamae ba Daudi.

¹⁸Ba okhwa Seruya bataru babaayo: Yoabu, Abisai, ne Asaieli. Asaieli aba anyala atima khangu nga kicheu.

¹⁹Asaeli arakikha khutimania Abuneri, atima ne amwiluungikhe.

²⁰Abuneri ekhebukha mala amureeba ali, “Ewe niye Asaeli?” Aamukobosia ali, “Yee niise.”

²¹Abuneri aamukobosia ali, “Lola lubeka luseecha namwe lukhasi, otiile mulala khu basoleeli mala obukule siosi siosi nisio ali ne nasio.” Ne kakhali Asaeli achiililila khumutimania.

²²Abuneri amuboolela lukhola khabili ali, “Lekha khu khundimania! Siina sikila ne wenya khwiire? Nyala nabonana ne wandaayo Yoabu ndiena?”

²³Ne kakhali Asaheli se alekha khumutimania tawe. Nio Abuneri amuuna engera ye lifumo enda mala yarurira khu mukoongo. Asaeli akwa asi afwa. Ne buli mundu owecha abuundu niio Asaeli afwila emao asila busa.

²⁴Ne kakhali Yoabu ne Abisai barakikha khuyiima Abuneri. Oli enyanga ekwa, bacha khu sikulu sia Ama, e bukwe owa Kia, khu ngila echa mu sichiimi sia Kibeoni.

²⁵Babaandu khukhwama mu kholo eya Benjamini bakara Abuneri lundi bebuusia alala khu sikulu.

²⁶Abuneri alaanga Yoabu mala aamureeba ali, “Khuchiililile ne khu khupana? Se onyala wabona oli ekhumaliilikha bukhabe buchuuni tawe? Olabukula siise siina nio okaanie babaandu bowo balekhe khu khutimania efwe bawandaayabwe?”

²⁷Yoabu aamukobosia ali, “Nga Wele ne amenyile, obanga se olomile tawe, ng'ali andi babaandu base bachiililile ne khu mutimania khukhwola muchuli.”

²⁸Nio Yoabu apa ekhoombi, mala babaandu bewe balekha khutimania Baisiraeli, ne khulekha khu khuupana.

²⁹Abuneri ne babaandu bewe bakeenda babirira khwitooma lia Yoritani siilo esio sioosi. Ne enyuma we khukeenda kumutikhinyi kwoosi, boola e Mahanaimu.

³⁰Yoabu nga ne alekha khutimania Abuneri, abuusia babaandu bewe boosi mala anyoola ali, likhumi na tisa khu bakholi ba Daudi se balikho tawe, alala ne Asaeli.

³¹Babaandu ba Daudi baba berire babaandu chimia chitaru ne kamakhumi sita ba Abuneri khukhwama mu kholo eya Benjamini.

³²Yoabu ne babaandu bewe babukula kumubili kwa Asaeli ne khukusiikha mu siliindwa sienju yabwe e Betelehemu. Nio bakeenda siilo sioosi bwabasiela e Heburoni.