Read lubukusu 2 Sam. 23 Bible Online

2 Sam. 23 - lubukusu bible

2 Sam. 23

¹Nono kano kali kamakhuwa ka Daudi kamamaliilisi: Buno nibwo burume bwa Daudi okhwa Chesi. Burume bwo mundu niye Wele aniinia, niye Wele owa Yakobo achukhakho kamafura khuuba omwami, niye owaba omwiimbi omulayi owe kimienya kia Isiraeli:

²Roho owa Wele Omunyali Owa Bioosi alomalomela mwise, elomo yewe eli khu lulimi lwase.

³Wele owa Isiraeli alomaloome, omuliindi owa Isiraeli aamboolela ali: “Omundu ne aamiia babaandu mu bung'ali, ne amiia mu khuria Wele,

⁴ali nga buwaanga bwe nyanga erura, enyanga ekhola bunyaasi bwamela efula ne ekwile.”

⁵Lisaaye liase lili lirio ebweeni wa Wele. Sikila aakhola Endakaano eya mindali na mindali ne nase, eli eya ng'ali lundi esuubilwa bulayi. Akhanjeete ne khukhwichusia liliekoomba liase.

⁶Ne babaandu bakhali ne Wele bali nga kamawa kamwaatwa, se kangalibwa ne kamakhono busa tawe.

⁷Omundu okaangala akhoya arumikhira sichuuma, namwe ebwooki we lifumo, ne kosebwanga elala mu mulilo abwene ne abwene.

⁸Kano niko kamasina ke banamae ba Daudi omwimeelesi owe khunyoa aba Yosiebu Basiebeti khukhwama Takimoni, owaba omwimeelesi owa “Bataru.” Aapanila lifumo liewe mala era babaandu be siseecha chimia munaane bosi mwiie lilala.

⁹Oloondakho owamanyikhana khu bataru aba Eliesa okhwa Dodo, omwana owa Ahohi. Aba ne Daudi nga bebwaakala Bafilisiti. Baba ne bebuusiisie khulwe liie. Baisiraeli belukha.

¹⁰Niye eema busa, mala apania Bafilisiti khukhwola kumukhono kwewe kwaluilila. Ne kumukhono kwewe se kwalekhakho embalu yewe tawe. Wele Omunyali Owa Bioosi abaa bukhili bukali endaalo ng'eneyo. Enyuma we liie, Baisiraeli bakobola niio Eliesa aba mala babukula bulwaani khukhwama khu bafu.

¹¹Oloondakho khu bataru aba Shama okhwa Akee, khukhwama Harari. Bafilisiti yaba babuusiaane e Lehi, niio kumukuunda kwe siikhubi kwaba. Baisiraeli belukha Bafilisiti.

¹²Ne Shama eema mu mukuunda, akuliinda, mala eera Bafilisiti. Wele Omunyali Owa Bioosi areera bukhili bukali endaalo ng'eneyo.

¹³Mu biise bie likesa babemeelesi bataru be babemeelesi be banamae Kamakhumi kataru bacha niio Daudi aba mwibina lia Atulamu. Sipupu sie Bafilisiti siaba siamenyile mwitooma lie Barefaimu.

¹⁴Mu biise bienebio yaba Daudi ali mu lukoba lusire ne baliindi be Bafilisiti baba mu Betelehemu.

¹⁵Daudi aba ne bulesia mala aloma ali, “Khola ndiena omundu yesi yesi andeererakho kameechi ke khunywa khukhwama mu sebele eye mu silibwa sia Betelehemu!”

¹⁶Banamae bataru bakhulu babira ne kamaani mu kambi eye Bafilisiti. Bataa kameechi khukhwama mu sebele, mala bakareerera Daudi. Ne se aakanywa tawe, ne kakhali akachukha enje nga siianwa khu Wele Omunyali Owa Bioosi.

¹⁷Ne aloma ali, “Wele Omunyali Owa Bioosi ambeele khanywa kameechi kano tawe! Ne nganywa aba ndi nga onywa kamafuki ke babaandu batibiisie bulamu bwabwe!” Khwako aloba khu kanywa. Ebio biaba bikholwa bie bunyindaafu bie banamae bataru bakhulu.

¹⁸Abisai wandaaye owa Yoabu ba okhwa Seruya niye owaba omwimeelesi owe babaandu ba bamanyikhana kamakhumi kataru. Aapanila lifumo liewe mala eera babaandu chimia chitaru mala amanyikhana nga babaasie bataru.

¹⁹Niye owamanyikhana lukali mu boosi kamakhumi kataru abo, aba komanda wabwe, ne kakhali se amanyikhaane nga bataru abo tawe.

²⁰Benaya okhwa Yeoyata, khukhwama Kabuseeli, aba omunamae omunyindaafu, akhola bibiindu bikali bie liiukia. Eera banamae babili ba Arieli owe Moabu be liiuka. Lulala eekha mwiloo khu ndaalo eye barafu mala eera etalang'i.

²¹Lundi eera Omumisiri owaba omundu owe lukoondo lulayi. Omumisiri aba ne lifumo mukhono. Benaya aamuseera. Benaya aba ne eruungu mala ebwaakala Omumisiri, amunuula lifumo mala amwirira lifumo liewe liliene.

²²Ebio nibio bibiaba bikholwa bie bunyindaafu bwa Benaya, owaba mulala khu Banamae babemeelesi bataru.

²³Aba amanyikhana mu banamae kamakhumi kataru ne se amanyikhana lukali nga bataru tawe. Daudi amukhola khuuba omuliindi wewe.

²⁴Mu makhumi kataru abo, abamo Asaeli wandaaye owa Yoabu. Eliamani okhwa Dodo owe Betelehemu, Shama nende

²⁵Elika khukhwama Haroti, Helesi khukhwama Paliti.

²⁶Ira okhwa Ikesi khukhwama Tekoa.

²⁷Abiaseri khukhwama Anatoti, Mebunai khukhwama Husia.

²⁸Salimoni khukhwama Ahohi, Maharai khukhwama Netofa.

²⁹Helebu okhwa Baana khukhwama Netofa, Itai okhwa Rabai khukhwama Kibea mu Benjamini.

³⁰Benaya khukhwama Piratoni, Hitai khukhwama mu matooma ambi ne Kaasi.

³¹Abieliboni khukhwama Araba Asimaweti khukhwama Baurimu

³²Eliaba khukhwama Siaaliboni, babaana ba Yasieni ne Yonasani,

³³ne Shama khukhwama Harari, Aiamu okhwa Siarari khukhwama Harari.

³⁴Elifeleti okhwa Ahasibai, khukhwama Maaka. Eliamu okhwa Aitiofeli khukhwama Kilo.

³⁵Hesiro khukhwama Karineli, Paarai khukhwama Arabu.

³⁶Ikali okhwa Nasani khukhwama Soba, Bani khukhwama Kati.

³⁷Seleki khukhwama Amoni, Naarai okhwa Seruya khukhwama Beeroti, Omusuti we bulwaani bwa Yoabu.

³⁸Ira ne Karebu khukhwama Itiri.

³⁹Ne Uria Omuhiti. Banamae ba bamanyikhana boosi alala baba kamakhumi kataru na saba.