Read lubukusu 2 Sam. 24 Bible Online

2 Sam. 24 - lubukusu bible

2 Sam. 24

¹Wele Omunyali Owa Bioosi lundi aambila Baisiraeli lirima, Wele Omunyali Owa Bioosi akhola Daudi khubareerera butinyu, ne amuboolela ali, “Cha obale babaandu ba Isiraeli ne Yuda.”

²Nio Daudi aaboolela Yoabu ne bakomanda be kamae kewe ali, “Cha ne bakholi bowo obire mu kholo choosi cha Isiraeli khukhwama Dani khukhwola Beerisheba, mala obale babaandu. Nenya emanye baliyo benga.”

³Ne kakhali Yoabu akobosia omwami ali, “Omwami, lekha Wele Omunyali Owa Bioosi, Wele wowo atase babaandu ba Isiraeli khukhwola emia babe bakali khukhila luno ewe nosiili omulamu. Siina sikila omwami ne wenya khukhola ori?”

⁴Ne kakhali omwami ayingilila Yoabu ne bakholi bewe bakhola nga ne enya. Yoabu ne babemeelesi be banamae barekukha bacha babala babaandu ba Isiraeli.

⁵Bambukha Yoritani mala baapa ekambi e Aroeri, lukoba luuli akari we litooma, mu sibala sia Kati. Khukhwama eyo bacha ebunaswa owa Yaseri,

⁶mala bacha e Kileati nende e Kadeshi, mu maloba ke Bahiti. Nio bacha e Dani mala babotookha bacha Sidoni.

⁷Nio bacha mu lukoba lusire lwa Tiro, ne mu chingoba choosi che Bahiti ne Bakanaani. Mala ekhumaliilikha bacha e Beerisheba nende ebunafubo owa Yuda.

⁸Khwako ne bamalile khukeenda mu maloba koosi bakobola e Yerusalemu enyuma we kimieesi tisa ne chindaalo kamakhumi kabili.

⁹Yoabu aaboolela omwami bukali bwe babaandu ba baaba ne babaliilwe. Mu Isiraeli baba banamae chielefu chimia munaane, ne mu Yuda chielefu chimia chiraano.

¹⁰Ne nga Daudi na amala khubala babaandu, omwene aarakikha khukhwebiiya. Aaboolela Wele Omunyali Owa Bioosi ali, “Naboone bubwoni bukali mu niko kholile. Nosiima Wele Omunyali Owa Bioosi mbeele ese omukholi wowo kholeele mu busilu.”

¹¹Nga Daudi ne enyokha makhelebeende, Wele Omunyali Owa Bioosi aaboolela elomo yewe Kati omung'oosi owa Daudi ali,

¹²“Cha mala oboolele Daudi oli ndikho muelesia bibiindu bitaru aroboorekho silala. Nja khukhola siosi siosi nisio aroboore.”

¹³Kati aacha niio Daudi ali amuboolela niko Wele Omunyali Owa Bioosi amuboleele. Areeba ali, “Siina nisio wenya siekholekhe? Enjala khuuba mu sibala siowo khu miiko kitaru, namwe kimieesi kitaru kie khukhwilukha basiku bowo, namwe chindaalo chitaru che lufu luubi mu sibala siowo? Luno yibaasia mala umboolele nilio ngoboseliayo oundumire.”

¹⁴Daudi aakobosia Kati ali, “Ese ndi mu butinyu! Ne se nenya ngwe mu bunyali bwe babaandu tawe. Lekha ngwe mu bunyali bwa Wele Omunyali Owa Bioosi, sikila niye ali owe siisa sikali.”

¹⁵Khwako Wele Omunyali Owa Bioosi aaruma lufu luubi mu Isiraeli. Khukhwama kumutikhinyi okwo khukhwola mu siise nisio aroboreramo. Khukhwama Dani khukhwola Beerisheba babaandu chielefu kamakhumi saba bafwa.

¹⁶Nga Malaika owa Wele Omunyali Owa Bioosi aba ne ali ambi khunaaya kumukhono khukhwonaka Yerusalemu, Wele Omunyali Owa Bioosi ebiiya khu siiukuumo siewe sie khubunia babaandu. Aaboolela malaika owaba ne alikho abeera ali, “Wanyaliile ao!” Malaika aba abuundu e khuulila biakhulia owa Arauna, Omuyebusi.

¹⁷Daudi nga ne abona malaika owaba ne alikho eera babaandu, aboolela Wele Omunyali Owa Bioosi ali, “Ese niise omumayaanu. Ese niye owakholile kamabi kano. Ne kamakheese kano kakholile siina? Okhoyeele umbunie samwene ne lisaaye liase.”

¹⁸Endaalo ng'eneyo Kati aacha khu Daudi mala aamuboolela ali, “Cha abuundu e khuulila biakhulia wa Arauna omuyebusi mala wombakhileo Wele Omunyali Owa Bioosi alutare.”

¹⁹Daudi aria lilaka lia Wele Omunyali Owa Bioosi mala acha aakhola nga Kati ne amuboolela.

²⁰Arauna aabona omwami ne bakholi bewe balikho becha niio ali. Arauna aacha ebweeni aasikamila omwami Daudi bubweeni bwewe bwetiila asi mu buriaani.

²¹Arauna amureeba ali, “Omwami siina sikila ne wichile owo mukholi wowo?” Daudi aamukobosia ali, “Nechile khukula abuundu wowo e khuula biakhulia mala nombakhileo Wele Omunyali Owa Bioosi alutare, nio lufu luubi luno luwe khu baandu.”

²²Arauna aaloma ali “Mwami wase, bukula, siosi nisio wenya. Chieeyi chili ano khulwe siianwa sie khukhwosia khu alutare. Bibiindu bie khuula biakhulia ne kamachooki ke chikhaafu kabe chiikhu.”

²³Arauna abielesia bioosi khu mwami mala aamuboolela ali, “Khuelesia bino bioosi. Wele Omunyali Owa Bioosi, Wele wowo akhoya asiimisibwa ne nawe.”

²⁴Ne kakhali omwami Daudi aakobosia Arauna ali, “Tawe, enja khu khukulakho. Sikila se nja khuaanila Wele Omunyali Owa Bioosi, Wele wase biianwa bie khukhwosia nibio khakulile siosi siosi tawe.” Nio Daudi aakula abuundu e khuulila biakhulia ne chikhaafu khulwe chirupia kamakhumi karaano.

²⁵Nio ombakhila Wele Omunyali Owa Bioosi alutare ne khumuaanila biianwa bie khukhwosia nende biianwa bie kumuleembe. Nio Wele Omunyali Owa Bioosi aakobosia lireeba lia Daudi mala lufu luubi lwawa mu Isiraeli.