Read lubukusu 2 Sam. 3 Bible Online

2 Sam. 3 - lubukusu bible

2 Sam. 3

¹Liie liabao akari wenju eya Saulo ne Daudi khu siise sileeyi. Ne enju eya Daudi yachiililila khunyoola kamaani ne eya Saulo nayo yachiililila khuuba endekhele.

²Daudi asaala babaana be siseecha sita nga ne baloondana, basalilwa e Heburoni. Omubele aba Amunoni, ne maawe aba Ahinoamu khukhwama e Yesireeli.

³Owe khabili aba Kileabu ne maawe aba Abikaili ngwa Nabali, khukhwama e Karimeli. Owe khataru aba Abusolomu ne maawe aba Maaka omukhaana owa Talimai omwami owa Keshuri.

⁴Owa khane aba Atoniya ne maawe aba Hakiti. Owa kharaano aba Shefatia, ne maawe aba Abitanda.

⁵Owa sita aba Itireamu ne maawe aba Egila. Babaana bano boosi basaalilwa mu Heburoni.

⁶Nga khu khuupana ne khwachiililila akari we nju eya Daudi ne eya Saulo, Abuneri anyoolanga kamaani munju mwa Saulo.

⁷Saulo aba no mukhasi niye aamenyia busa nga omusaale bali Risipa omukhaana owa Aya. Endaalo ndala Ishibosheti okhwa Saulo areeba Abuneri ali, “Siina sikila nokonile ne mukha paapa?”

⁸Lino liabeelesia Abuneri. Mala aamukobosia ali, “Wibaasia oli ese ndi kumurwe kwembwa khukhwama Yuda? Mu siise sileeyi khukhwola luno nabeele omweyikinwa khunju eya raraao Saulo, bawandaaye ne basaale bewe. Lundi namuoniisie enywe khulekha khuulwa ne Daudi, ne luno umbiiya sikila omukhasi!

⁹ Wele akhoya aelesie Abuneri kumunaanio, ne lukali ese naba bali se kholela Daudi niko Wele Omunyali Owa Bioosi amwechubila tawe.

¹⁰Kharusie bubwami khukhwama munju eya Saulo ne khukhwimikha bubwami bwa Daudi khu Isiraeli ne Yuda, khukhwama Dani khukhwola Beerisheba.”

¹¹Ishibosheti se akobosia Abuneri likhuwa liosi liosi tawe sikila amuria.

¹²Abuneri aruma barume khu Daudi, e Heburoni, ne aloma ali, “sibala sino sia naanu? Khola endakaano ne nase, ne nja khu khuyeeta khureera Isiraeli sioosi sibe asi wowo.”

¹³Daudi akobosia ali, “Bulayi. Nja khukhola endakaano ne nawe. Ne kakhali khwenyakho sisiindu silala: okhambonekhela ne okhareerire omukhaana owa Saulo Mikali tawe.”

¹⁴ Ne Daudi aruma barume khu Ishibosheti okhwa Saulo ne aloma ali, “Ngoboselie omukhasi wase Mikali. Niye nakhwa kamafunga emia ndala ke Bafilisiti.”

¹⁵Nio Ishibosheti amurusia wo museecha wewe Palitieli okhwa Laishi.

¹⁶Palitieli amuloondakho khu ngila nalila khukhwola mu lukoba lwa Baurimu. Ne Abuneri aloma ali, “Kobola engo,” mala aakobolayo.

¹⁷Abuneri acha khu basaakhulu ba Isiraeli mala ababoolela ali, “Khulwe siise sileeyi mwenyile Daudi abe omwami wenywe.

¹⁸Nono khola murio. Khebulila muli Wele Omunyali Owa Bioosi aalaka Daudi ali, ‘nja khurumikhira omukholi wase Daudi khuonia babaandu base Isiraeli khukhwama khu Bafilisiti ne khukhwama khu basiku babwe babaandi.’ ”

¹⁹Abuneri yesi abolela ekholo eya Benjamini. Nio acha e Heburoni khuboolela Daudi niko babaandu ba Benjamini ne ba Isiraeli bafukiilile khukhola.

²⁰Abuneri acha niio Daudi ali e Heburoni, ne babaandu be siseecha kamakhumi kabili. Mala Daudi abakholela bukeni.

²¹Abuneri aboolela Daudi ali, “Luno ndacha mala khubuusilie Isiraeli yoosi nio bakhole endakaano ne nawe. Ne ewe ocha khwamiia abo boosi nibo wenya.” Daudi alekha Abuneri acha khu lukeendo lwewe ne kumuleembe.

²²Musise sitiiti, Yoabu ne bakholi babaandi ba Daudi bakobola khukhwama mu khuseera. Bareera bibiindu bikali nibio bayaayile. Kakhaba kario, Abuneri se abao ne Daudi e Heburoni tawe. Sikila Daudi aba ambuukhe achiile lukeendo lwewe ne kumuleembe.

²³Yoabu ne banamae nibo aba nabo nga becha Heburoni baboolela Yoabu bali, “Abuneri echile khu mwami Daudi. Ne omwami amulekha acha mu muleembe.”

²⁴Nio Yoabu acha niyo omwami ali ne khumureeba ali, “Okholile siina sino? Abuneri echile niio oli ne siina sikila nomulekhile aacha?

²⁵Omanyile oli echile ano khukhubea ne khumanya koosi niko okhola ne oosi niio ocha.”

²⁶Enyuma we khulekhana ne Daudi, Yoabu aruma barume khutiila Abuneri mala bamuyusila khu sebele eya Sira. Daudi se amanyakho siosi siosi tawe.

²⁷Abuneri nga ne akobola mu Heburoni, Yoabu amuyila alubeka asilibwa, nga owenya khukhwikutakho naye. Abwenao amuuna kumubano munda. Khwako Abuneri eerwa sikila eera Asaeli wandaaye owa Yoabu.

²⁸Enyuma wako, nga Daudi ne aulila kano, aaloma ali, “Ese ne bubwami bwase se khuli ne kamabi ebweeni wa Wele Omunyali Owa Bioosi khuloondekhana ne khukhwirwa khwa Abuneri okhwa Neri tawe.

²⁹Kumunaanio kube khu Yoabu ne lisaaye liewe! Buli mu selukho lisaaye liewe likhabemo omundu ooli ne bulwaale bwa kisonono namwe bulwaale bwe kamakele, namwe omuleme okeendela khu siimbo, namwe niye beera mwiie, namwe owe njala!”

³⁰Khwako Yoabu ne wandaaye Abisai beera Abuneri sikila eera wandayaabwe Asaeli mwiie liliaba e Kibeoni.

³¹Nio Daudi aboolela Yoabu ne babaandu bewe khutabulaka chingubo chabwe, befware kamakunia mala balile Abuneri. Omwami Daudi omwene akeendela enyuma we lisanduku lio mufu.

³²Basiikha Abuneri e Heburoni. Ne omwami Daudi aapa lulwang'a mala aalilila khu siliindwa sia Abuneri, mala babaandu boosi balila.

³³Omwami alila Abuneri ne aloma ali: “Abuneri akhoyela afwe nga omusilu ku?

³⁴Kamakhono kowo se kabowa tawe, ne bikele biowo se biabowa kimikoye tawe. Wakwile nga omundu okwa ebweeni we bamayaanu,” mala babaandu boosi bamulila lundi.

³⁵Nio babaandu boosi becha khwikoonjelela Daudi aliekho siakhulia ne kusiili kumuusi. Ne kakhali Daudi echuba naloma ali, “Wele akhoya amba kumunaanio kaaba bali ndia siakhulia namwe sisiindu siosi siosi enyanga ne khakwa tawe!”

³⁶Babaandu boosi babona likhuwa elio, mala liabasiimisia. Buli siindu nisio omwami akhola siasiimisia babaandu boosi.

³⁷Endaalo eyo, babaandu boosi mu Isiraeli yoosi bamanya bali se liaba lilienya lio mwami khukhwira Abuneri okhwa Neri tawe.

³⁸Omwami aaboolela bakholi bewe ali, “Se mumanya muli endaalo eya luno omwami lundi omundu omukali mu Isiraeli amalile khufwa tawe?

³⁹Akhaba ne ndi omwami owachukhwakho kamafura, ndi omutekhele luno. Ba okhwa Seruya bano baba ne kamaani khu khukhila. Wele Omunyali Owa Bioosi akhoya aruunga omumayaanu khuloondekhana ne bumayaanu bwewe.”