Read lubukusu 2 Sam. 5 Bible Online

2 Sam. 5 - lubukusu bible

2 Sam. 5

¹Nio chikholo choosi cha Isiraeli chacha khu Daudi e Heburoni mala bamuboolela bali, “Efwe khuli babaandu be kamafuki kowo.

²Mu biise bibiabira, Saulo nasiili omwami wefwe, niwe owemeelelanga babaandu ba Isiraeli mwiie. Ne Wele Omunyali Owa Bioosi akhuboolela ali, ‘Ewe okhabe omwaayi lundi omwami owe babaandu base Isiraeli.’ ”

³Nio basaakhulu boosi ba Isiraeli bacha khu mwami Daudi e Heburoni. Ne Daudi akhola endakaano ne nabo e Heburoni ebweeni wa Wele Omunyali Owa Bioosi. Bamuchukhakho kamafura nga omwami owa Isiraeli.

⁴ Daudi aba ne bukhulu bwe kimiiko kamakhumi kataru narakikha khuuba omwami. Amiia khu miiko kamakhumi kane.

⁵Amiia Yuda ne ali mu Heburoni khu miiko saba ne kimieesi sita. Ne amiia Isiraeli ne Yuda nali mu Yerusalemu khu miiko kamakhumi kataru na kitaru.

⁶ Omwami Daudi ne babaandu bewe bacha Yerusalemu khukhwibwaakala Bayebusi ba bamenyangayo. Bayebusi baboolela Daudi bali, “Socha khunyala khukhwingila muno tawe. Akhaba babofu ne baleme banyala bakhukhiingilila.” Bebaasia bali Daudi se anyala engila mu lukoba lwabwe tawe.

⁷Ne kakhaba kario Daudi aamba lukoba lwabwe lusire lwa Sayuni, lulwecha lwamanyikhana nga Lukoba lwa Daudi.

⁸Endaalo ng'eneyo Daudi aboolela babaandu bewe ali, “Omundu yesi yesi onyala aula Bayebusi akhoya aniinile khu ngila eye kameechi nio mala ebwaakale babofu ne baleme nibo Daudi abiila.” Liakila lialomekha lili, “Omubofu no muleme se banyala bengila munju eya Wele Omunyali Owa Bioosi tawe.”

⁹Daudi nga amala khutiila lukoba, aalumenyamo ne khulutiuukha lisina ali, “Lukoba lwa Daudi.” Ombakha alubotookhelesia khurakikhira mu maloba ke kimiliinda khucha mukari.

¹⁰Nio Daudi atasa khuuba ne kamaani sikila Wele Omunyali Owa Bioosi, Wele owe bunyali aba ne naye.

¹¹Omwami Hiramu owe Tiro aruma barume be kimilimo khu Daudi. Baba ne kimirongooro kimitarakwa kie khukhwombakha, alala nende babeechi ne babombakhi barumikhira kamabaale, babombakha enju eya Daudi.

¹²Liakila Daudi amanya ali Wele Omunyali Owa Bioosi amwimiisie niye nga omwami owa Isiraeli lundi akaliisie bubwami bwewe sikila babaandu bewe Isiraeli.

¹³Enyuma we khuuyila Yerusalemu khukhwama Heburoni, Daudi akhwa bakhasi ne khutasakho babaandi nibo aamenyia mu Yerusalemu nga basaale mala asaala babaana basoleeli ne bakhaana babaandi.

¹⁴Kano niko kamasina ke babaana nibo asaala ne ali mu Yerusalemu: Siamua, Siobabu, Nasani, Solomoni

¹⁵Ibihari, Elishua, Nefeei, Yafia

¹⁶Elisiama, Eliata ne Elifeleti.

¹⁷Nga Bafilisiti ne baulila bali Daudi achukhilwekho kamafura khuuba omwami owa Isiraeli, boosi barakikha khumuyiima. Ne kakhali nga Daudi ne aulila lino, acha mu bwikisi.

¹⁸Bafilisiti baba bechile mala basalaaniile mwitooma lia Refaimu.

¹⁹Daudi areeba Wele Omunyali Owa Bioosi ali, “Nje nibwaakale Bafilisiti? Ocha khumbelesia bukhili?” Wele Omunyali Owa Bioosi amukobosia ali, “Yee, cha! Nja khu khuelesia bukhili khu nibo.”

²⁰Nio Daudi aacha e Baali-perasimu ne ebweeneyo niyo aulila Bafilisiti. Aloma ali, “Wele Omunyali Owa Bioosi abirire mu basiku base nga kameechi kakechuule.” Nio liakila abuundu ao alaangwa bali Baali-perasimu.

²¹Bafilisiti nga ne belukha, balekha enyuma bifwaani biabwe, mala Daudi ne babaandu bewe babisuta.

²²Nio Bafilisiti bakobola sie tooma lia Refaimu, basalanila lundi.

²³Ne nga Daudi areeba Wele Omunyali Owa Bioosi lundi, amukobosia ali, “Okhabeluungikha tawe. Babotookhelele, mala obebwaakale khukhwichila lubeka lwe kimirongooro kia misorisati.

²⁴Ne noulila chindiri che khukeenda angaaki we kimirongooro, khola khangu. Sikila Wele Omunyali Owa Bioosi akhakhuraangirire khukhwira banamae be Bafilisiti.”

²⁵Daudi akhola nga nilwo Wele Omunyali Owa Bioosi amulaka, mala atimania Bafilisiti khukhwama e Keba khukhwola e Keseri.