Read lubukusu 2 Sam. 6 Bible Online

2 Sam. 6 - lubukusu bible

2 Sam. 6

¹Lundi Daudi abuusia alala babaandu barobore boosi Baisiraeli chielefu kamakhumi kataru.

² Daudi enyokha mala aacha ne babaandu nibo aba nabo boosi khukhwama e Baala mu Yuda. Bacha khurusiayo Lisanduku lie ndakaano eyo Omwami Wele Omunyali Owa Bioosi, owikhaale khu kerubi.

³ Basutila Lisanduku lie Ndakaano khu likaari liiya nilio babukula khukhwama munju eya Abinatabu eyaba khu sikulu. Usia ne Ahio, ba okhwa Abinatabu, nibo babatimia likaari elio ne Lisanduku lie Ndakaano eya Wele.

⁴Ahio aba ebweeni we Lisanduku lie Ndakaano.

⁵Daudi ne Baisiraeli boosi baba balikho bakhina ne beemba ne kamaani kabwe koosi ebweeni wa Wele Omunyali Owa Bioosi. Baapa biilili, kamatuungu, chitamburini, ching'oma ne bibiindu bie khu khuupania alala mu mienya.

⁶Nga ne boola abuulilo bwa Nakoni, chieeyi chetuya, mala Usia atiila Lisanduku lie Ndakaano.

⁷Wele Omunyali Owa Bioosi aambila Usia lirima mala amwiira sikila atiila Khwisanduku lie Ndakaano. Usia aafwiila ebweeneyo khu ndulo e Lisanduku lie Ndakaano.

⁸Daudi aba ne lirima sikila Wele Omunyali Owa Bioosi eera Usia. Nio abuundu ao alaangwa Peresi-usa khukhwola luno.

⁹Daudi aba ne buuri khu Wele Omunyali Owa Bioosi endaalo eyo, mala aloma ali, “Ndabukula ndiena Lisanduku lie Ndakaano?”

¹⁰Nono Daudi se enya khuyila Lisanduku lie Ndakaano eya Wele Omunyali Owa Bioosi mu lukoba lwewe tawe. Ne kakhali aliausia mala aliyila munju mwa Obedi-Edomu, omukiti.

¹¹ Liamenyayo kimieesi kitaru, mala Wele Omunyali Owa Bioosi abiita chikhabi Obedi-Edomu nende be nju yewe boosi.

¹²Omwami Daudi aulila ali Wele Omunyali Owa Bioosi aeleesie be nju eya Obedi-Edomu chikhabi ne bibiindu bioosi nibio aba ne nabio sikila Lisanduku lie Ndakaano eya Wele. Nio Daudi acha akobosia Lisanduku lie Ndakaano eya Wele khukhwama munju eya Obedi-Edomu mala aliyila mu Lukoba lwa Daudi ne khoyo.

¹³Nga abo baba ne basutile Lisanduku lie Ndakaano eya Wele Omunyali Owa Bioosi ne bamala khucha bikele sita, Daudi mala aanila Omwami embosio eye euunwa ne moosi enefu.

¹⁴Daudi, efwara engubo elaangwa efodi eya katani mu sibuno mala akhina ne kamaani kewe koosi, ebweeni wa Wele Omunyali Owa Bioosi.

¹⁵Khwako Daudi ne Baisiraeli boosi bayila Lisanduku lie Ndakaano e Yerusalemu ne chingalakala che busangaafu ne luyoka lwe chikhoombi.

¹⁶Nga Lisanduku ne liaba ne lireerwa mu lukoba, Mikali, omukhaana owa Saulo, alengelelela munuma abona Daudi ne akhina ne khusuna ebweeni wa Wele Omunyali Owa Bioosi mala amubonela bubi.

¹⁷Bareera Lisanduku lie Ndakaano mala balira abuundu walio mu liiema nilio Daudi alikholela. Nio aana biianwa bie khukhwosia ne biianwa bie kumuleembe khu Wele Omunyali Owa Bioosi.

¹⁸Ne Daudi nga na amala khuana bianwa bie kumuleembe, abiita babaandu mu lisina lia Omwami Wele Omunyali Owa Bioosi.

¹⁹ Akaba biakhulia khu baandu boosi. Aelesia buli mundu owe siseecha nende we siikhasi mu Isiraeli sitonyi sie kumukaati, sitonyi sie nyama enjosie, ne kimisabibu kimiomu. Nio buli mulala acha engo wewe.

²⁰Enyuma wako, nga Daudi akobola engo khukheesia be nju yewe, Mikali omukhaana owa Saulo arura enje khumwakaanila. Aaloma ali, “Omwami owa Isiraeli luno eelesie lukoosi luboofu po! Eyanikhiliile nga omusilu ebweeni we bakhaana be bakholi bewe!”

²¹Daudi aamukobosia ali, “Khinile khusiimisia Wele Omunyali Owa Bioosi, owandobora ese khukhila raraao, ne khu khukhola ese omwimeelesi owe babaandu bewe Baisiraeli khukhila lisaaye lia Saulo. Ne nja khuchiililila khukhina khusiimisia Wele Omunyali Owa Bioosi.

²²Ne nja khwiambia chisoni khukhilakho. Bakhaana nibo olomile abo bacha khumbelesia lukoosi khukhilakho.”

²³Mikali, omukhaana owa Saulo, se abaakho no mwana tawe khukhwola khufwa khwewe.