Read lubukusu 2 Sam. 7 Bible Online

2 Sam. 7 - lubukusu bible

2 Sam. 7

¹Nono omwami Daudi amenya mu lichipi liewe mala Wele Omunyali Owa Bioosi amuelesia kumuleembe ne basiku bewe boosi ba bamubotookhelela.

²Nio omwami aboolela omung'oosi Nasani ali, “Ese namenyile ano munju eyombakhwa ne kimirongooro kimitarakwa ne kakhali Lisanduku lie Ndakaano eya Wele liabikhwa mu Liiema.”

³Nasani akobosia omwami Daudi ali, “Cha okhole liosi liosi lili mu mwoyo kwowo, sikila Wele Omunyali Owa Bioosi ali ne nawe.”

⁴Ne kakhali siilo esio Wele Omunyali Owa Bioosi aboolela Nasani ali,

⁵“Cha oboolele omukholi wase Daudi oli, Wele Omunyali Owa Bioosi aloma ali, ‘Se oli ewe ounjombakhila ese enju emenyemo tawe.

⁶Khukhwama mu biise nibio nasikulilamo Baisiraeli khukhwama e Misiri khukhwola luno, khamenyakho munju tawe. Nakeendile buli abuundu nendi mu bwikhalo mu liiema.

⁷Buli abuundu niio nacha ne Baisiraeli boosi khareebakho mulala khu bemeelesi Baisiraeli nibo narobora khuliinda babaandu base Baisiraeli ndi siina sikila ne mukhanjombakhila enju eye kimitarakwa tawe.’

⁸“Khwako boolela omukholi wase Daudi oli, ‘Omwami Wele Omunyali Owa Bioosi we banamae aloma ali, nakhurusia khukhwama mu bwayi bwe kamakheese mala nakhukhola khuba omwami owe babaandu base Baisiraeli.

⁹Nabeele ne nawe buli abuundu niio wachilenge ne khukhuulila basiku bowo boosi ebweeni wowo. Nja khu khukhola omanyikhane nga babemeelesi bamanyikhaane lukali mu sibala.

¹⁰Kharoborere babaandu base Baisiraeli abuundu mala mbare abwenao. Bacha khumenyao ne se bakhanaanisibwe lundi tawe. Babaandu bamayaanu se bakhabapie sibi nga ne bakhola ekhunyoa tawe.

¹¹Babaandu bamayaanu bachiililile khukhola bario khukhwama nga naroborera babaandu base Baisiraeli babemeelesi. Ne ndabaelesia kumuleembe khukhwama khu basiku babwe boosi.

¹² Khutasa khwako, Wele Omunyali Owa Bioosi aloma ali niye omwene akhamiie enju yowo. Nokhafwe mala osiikhwe, khamiisie mulala khu basoleeli bowo ne khaandalasie bubwami bwewe.

¹³Niye okhanjombakhile enju ne nja khukhola bubwami bwewe bubeeo khulwa mindali.

¹⁴ Khabe raraawe ne niye akhabe omwana wase. Ne akhola bubi, khamuukuume nga paapa ne aelesia omwana wewe siiukuumo.

¹⁵Se nja khumurusiakho busiime bwase nga nakhola khu Saulo tawe, niye narusia ebweeni wowo nio ewe waaba omwami.

¹⁶ Enju yowo, nende bubwami bwowo bucha khubao kimiiko kioosi.’ ”

¹⁷Nasani aboolela Daudi kano koosi ne buloli buno bwoosi.

¹⁸Nio omwami Daudi engila mu Liiema lia Wele Omunyali Owa Bioosi, ekhala ebweeni wa Wele Omunyali Owa Bioosi mala aloma ali, “Yee Omwami WELE, ese se khoyela niko ewe wakholeele ese nende be nju yase tawe.

¹⁹Omwami WELE, sino siabeele sisiindu sitiiti mumoni chowo, waanile lisuubisia khu lisaaye liase mu miiko kikiicha. Omwami WELE, lundi walomaloome ke chindaalo chichiicha khunju yase, omukholi wowo.

²⁰Omwami WELE ese Daudi khuboolele siina! Ewe umanyile ese omukholi wowo.

²¹Sikila lisuubisia liowo ne khuloondekhana ne lilienya liowo, wakholile bibiindu biboofu bino bioosi nio ese omukholi wowo mbimanye.

²²Khwako Wele Omunyali Owa Bioosi ewe oli omukali. Mbao ooli nga ewe tawe, se aliio wele okundi tawe. Buli lwosi khwamanya khuli ewe weng'ene niwe Wele.

²³ Mbao ekholo ekiindi mu sibala eeli nga Baisiraeli tawe. Ewe wabaonia khukhwama mu burumwa ne khubakhola khuuba babaandu bowo. Bibiindu bikali lundi bie liukia nibio wabakholela biasalanisie efuma yowo mu sibala sioosi. Watimania chikholo chichiindi ne ba wele babwe ebweeni we babaandu bowo.

²⁴Wakhola Isiraeli khuuba babaandu bowo khulwa mindali na mindali, lundi Wele Omunyali Owa Bioosi ewe wabeele Wele wabwe.

²⁵“Nono Wele Omunyali Owa Bioosi, aandalasia endakaano niyo wakholela ese ne lisaaye liase. Khola niko waloma oli okhakhole.

²⁶Efuma yowo echa khubao buli lwosi. Ne babaandu bakhalome bali, ‘Omwami Owe Banamae niye Wele owa Isiraeli.’ Okhaliinde lisaaye liase buli lwosi.

²⁷Sikila ewe Omwami Owe Banamae, Wele owa Isiraeli, wamboolela ese oli ‘Nja khukhwombakhila enju. Niko kakila ese omukholi wowo, ne khusaba ndio.’

²⁸“Nono Omwami WELE, ewe oli Wele, ne kamakhuwa kowo kali ka ng'ali. Ewe wasuubisia ese omukholi wowo bibiindu bilayi bino.

²⁹Khureeba ewe umbiitile chikhabi lisaaye liase nio lichiililile khuba ne chikhabi chowo. Ee Omwami WELE, ewe wasuubisie oli, olabiita chikhabi lisaaye liase buli lwosi.”