Read lubukusu 2 Sam. 8 Bible Online

2 Sam. 8 - lubukusu bible

2 Sam. 8

¹Enyuma we siise, omwami Daudi aseera Bafilisiti mala abaula, ne khubukula lukoba lwabwe lwa Metekama.

²Daudi lundi aula Bamoabu. Akhola baboe bakona asi mala mu nyilili chitaru eera chinyilili chibili khu chitaru. Nio Bamoabu baba barumwa bewe ne khuruunga busuuru khu niye.

³Akhaba lundi Daudi aula Hatateseri okhwa Rehobu omwami ne sibala sie Soba nga aaba ne ali khu ngila ne acha khukobosia bubwami bwewe engaaki we luluuchi lwa Efurati.

⁴Daudi aamunuula babaandu eelefu ndala ne chimia saba batimia chifarasi ne banamae be khu bikele chielefu kamakhumi kabili. Aabiikha chifarasi chicholaana ne kamakaari emia ndala ne khulemasia chichiindi choosi.

⁵Nga Bashamu ba Damasika ne becha khuyeeta Hatateseri omwami owa saba, Daudi eera babaandu be Bashamu chielefu kamakhumi kabili.

⁶Nio Daudi aaraayo chikambi che banamae mu Aramu e Damasika. Mala Bashamu baaba bakholi bewe ne khuruunga busuuru khu niye. Wele Omunyali Owa Bioosi akhola Daudi khuuba omuuli buli osi niio acha.

⁷Daudi abukula chingabo che sahabu chichaba ne chasutwa ne babemeelesi ba Hatateseri mala aachiyila e Yerusalemu.

⁸Lundi abukula sikelo sikali sie kumukasa khukhwama Beta ne Berotai, chingoba cha Hatateseri.

⁹Omwami Toi owa Amati nga aulila ali Daudi aulile banamae boosi ba Hatateseri,

¹⁰aaruma omwana wewe Yoramu khukheesia omwami Daudi ne khumusiima nga aapana ne Hatateseri mala amuula. Hatateseri ne Toi baba bapaane khulwe biise bikali. Yoramu ayilila Daudi bibiindu bie efwesa, bie esahabu nende bie kumukasa.

¹¹Omwami Daudi abiaana khu Wele Omunyali Owa Bioosi alala ne efwesa ne sahabu nibio amia mu kholo choosi nicho aula.

¹²Chikholo chino chaba Edomu, Moabu, Amoni, Filisiti, ne Amaleki akhaba nende bie bunuuli nibio anuula khukhwama khu Hatateseri.

¹³ Daudi akhola lisina liewe liamanyikhana lukali nga ne akobola khukhwama mwitooma lia chumbe ne amalile khukhwira Baedomu chielefu ekhumi na munaane.

¹⁴Ombakha chikambi mu Edomu mwoosi, mala Baedomu boosi baaba bakholi bewe. Omwami Wele Omunyali Owa Bioosi akhola Daudi aula buli abuundu niio acha.

¹⁵Daudi amiia Isiraeli yoosi, mala emeelela mu bung'ali ne mu buluungi babaandu bewe boosi.

¹⁶Yoabu okhwa Seruya, aba omwimeelesi owe banamae. Yehoshafati okhwa Ahiludi aba omuandiki.

¹⁷Satoki okhwa Ahitubu ne Ahimeleki okhwa Abiatari baba basaayi. Siausia yesi aba omuandiki.

¹⁸Benaya okhwa Yehoyata aba omwimeelesi owe Bakeleti ne Bapeleti, nende ba okhwa Daudi baba basaayi.