Read lubukusu 2 Sam. 9 Bible Online

2 Sam. 9 - lubukusu bible

2 Sam. 9

¹ Daudi areeba ali, “Aliio yesi yesi owarama mu lisaaye lia Saulo mukholele bulayi khubeela Yonasani ku?”

²Abao omukholi owe lisaaye lia Saulo bali Siba. Alaangwa ache niio Daudi ali. Omwami amureeba ali, “Ewe niwe Siba?” Akobosia ali, “Omwami ese ndi omukholi wowo.”

³ Omwami aamureeba lundi ali, “Aliyo yesi yesi owarama mu lisaaye lia Saulo niye nyala nakholela bulayi bwa Wele?” Siba aamukobosia ali, “Aliio omwana owe sisoleeli owa Yonasani ne kakhali alemala bikele.”

⁴Omwami aareeba lundi ali, “Ali waena?” Siba amukobosia ali, “Ali munju mwa Makiri okhwa Amieli, e Lotebari.”

⁵Nio omwami Daudi arumania bamureera.

⁶Ne Mefibosheti, okhwa Yonasani, omwichukhulu Saulo, nga ne oola ebweeni wa Daudi enama mukhweboombia. Daudi aamulaanga ali, “Mefibosheti.” Naye aakobosia ali, “Omwami, ese ndi omukholi wowo.”

⁷Daudi amuboolela ali, “Okharia tawe. Nja khu khukholela kamalayi sikila raraao Yonasani. Nja khu khukoboselia kamaloba koosi kakaba ka kukaao Saulo. Ne buli lwosi ocha khulia khu mesa yase.”

⁸Mefibosheti lundi enama ebweeni wa Daudi mala aloma ali, “Omwami, siina sikila ukholele bulayi buno mala ese, omukholi wowo ndi busa nga embwa efu?”

⁹Nio omwami alanga Siba, omukholi owa Saulo, mala amuboolela ali, “Ndikho mbelesia Mefibosheti, omwichukhulu owo mwami wowo, buli siindu sisiaba sia Saulo ne lisaaye liewe.

¹⁰Ewe ne babaana bowo be sisoleeli, ne bakholi bowo mucha khumulimilanga kumukuunda. Lundi mucha khumureereranga biakhulia nio omwichukhulu owo mwami wowo abe ne siakhulia. Ne kakhali Mefibosheti omwichukhulu owo mwami wowo buli lwosi acha khulia khu mesa yase.” Siba aba ne babaana basoleeli ekhumi na baraano ne bakholi kamakhumi kabili.

¹¹Siba aboolela omwami ali, “Omwami, nja khukhola buli siindu nisio umboleele.” Nio Mefibosheti aalichanga no mwami nga mulala khu baana be sisoleeli bo mwami.

¹²Mefibosheti aba no mwana omutiiti owe sisoleeli owalaangwa Mika. Babaandu boosi be nju eya Siba baba bakholi ba Mefibosheti.

¹³Nio Mefibosheti, owaba omuleme bikele bioombi, aamenya mu Yerusalemu, ne buli lwosi alia khu mesa yo mwami.