Read lubukusu 1 Bab. 1 Bible Online

1 Bab. 1 - lubukusu bible

1 Bab. 1

¹Nono omwami Daudi aaba omusaakhulu lukali. Ne akhaba ne bamubiimba kamaruungeti, se anyoolanga luluuya tawe.

²Nio bakholi bewe bamuboolela bali, “omwami, lekha khukhuyimile omukhaana owe yabwana amenye nawe akhuliinde, abe omulesi wowo. Lekha akhweumbekho nio onyoole luluuya.”

³Bayimilisia mu Isiraeli mwoosi omukhaana owe lukoondo lulayi. Banyoola Abisiagi omukhaana Mushunemi mala bamureera khu mwami.

⁴Abishaki aba owe lukoondo lulayi lukali, mala alela omwami ne khumuliinda. Ne kakhali omwami se abaakho ne naye nga omuseecha no mukhasi tawe.

⁵ Nono Atonicha omusoleeli owa Hakiti eeniinia ne aloma ali, “Ndaba omwami.” Eeyiimila omwene kamakaari ne babaandu batimia chifarasi ne babaandu kamakhumi karaano batima ebweeni wewe.

⁶Raraawe Daudi abeele akharafwirakho omwana wewe akhaba lulala lwong'ene khumureeba ali, “Siina sikila ne okholile kano?” Tawe. Atonicha yesi aaba omundu owe lukoondo lulayi. Niye oloondela Abusolomu mu khusaalwa.

⁷Aalomaloma ne Yoabu, okhwa Seruya ne Abiatari omusaayi. Nio baloonda khu Atonicha mala bamuyeeta.

⁸Ne Satoki omusaayi, Benaya okhwa Yehoyata, Nasani omung'oosi, Shimei, Rei, ne banamae be kamaani ba Daudi se baaba lubeka lwa Atonicha tawe.

⁹Atonicha aana embosio eye kamakheese, chiuunwa ne chimoosi chinefu a lwanda lwe ndemu luuli siimbi e Enirokeli. Alaanga bawandaaye boosi, basoleeli bo mwami Daudi ne bakhulu be banamae boosi khukhwama mu Buyuda.

¹⁰Ne kakhali se aalaanga Nasani omung'oosi namwe Benaya namwe banamae be kamaani namwe Solomoni wandaaye tawe.

¹¹ Nio, Nasani aboolela Batisheba, maayi owa Solomoni ali, “Se wauliilekho oli Atonicha omwana owa Hakiti abeele omwami mala Daudi se amanyilekho ta ku?

¹²Nono yiicha ekhukaambile mala oonie bulamu bwowo ne bulamu bwo mwana wowo Solomoni.

¹³Cha khangu khu mwami Daudi mala omureebe oli, ‘omwami se wanjechubila oli omwana wase Solomoni aliila khu bwami enyuma wowo mala ekhalile endebe eye bubwami? Ne siina sikila Atonicha ne ali omwami?’ ”

¹⁴Nasani atasakho ali, “Nga ne olaba ne osilomaloma no mwami Daudi, ese sesi ndakhuloondakho mala mbandalasie kamakhuwa kowo.”

¹⁵Nio Batisheba acha khubona omwami e lusiro lwewe. Nono Daudi aaba omusaakhulu lukali, ne Abishaki, omukhaana Mushunemi aaba ne amuliinda.

¹⁶Batisheba enama, asikama ebweeni wo mwami mala omwami amureeba ali, “Wenya siina?”

¹⁷Amukobosia ali, “omwami, ewe wanjechubila mu lisina lia Wele Omunyali Owa Bioosi, Wele wowo, oli omwana wase Solomoni aliaamiia enyuma wowo ne alikhalila endebe eye bubwami.

¹⁸Ne luno Atonicha ali omwami mala ewe se wamanyilekho sisiindu siosi siosi khu lienelio tawe.

¹⁹Aanile embosio eye chiuunwa, chimoosi ne kamakheese kamakali, ne alaangile basoleeli bowo boosi, Abiatari omusaayi, ne Yoabu komanda owe banamae. Ne kakhali se alaangilekho omwana wowo Solomoni tawe.

²⁰Nono omwami, Baisiraeli boosi bakhuloleleele ewewe obaboolele naanu olekhala khu ndebe eye bubwami bwowo enyuma wowo.

²¹Ne busa nga ewe ne olirurao, ese ne omwana wase Solomoni khulibalikha nga baabi.”

²²Nga aba ne asilomaloma, Nasani omung'oosi engilamo.

²³Omwami aboolelwa ali omung'oosi Nasani echile. Nasani nga engila, enama ebweeni wo mwami bubweeni bwewe bwetiila asi.

²⁴Nio areeba ali, “omwami, ewe walomile oli Atonicha alaamiia enyuma wowo, mala ekhale khu ndebe eye bubwami?

²⁵Sikila endaalo yino ekhile mala aanile embosio eye chiuunwa, kamakheese ne chimoosi mu bukali. Alaangile basoleeli bowo boosi, Yoabu, komanda owe banamae bowo[1] ne Abiatari omusaayi. Siise sino bali mu naikara ne Atonicha, ne balikho baloma bali, ‘omwami Atonicha oyindile.’

²⁶Ne ese omukholi wowo, ne Satoki omusaayi, ne Benaya okhwa Yehoyata no mukholi wowo Solomoni se akhulaangilekho tawe.

²⁷Omwami ewe ofukiilile kano koosi? Ne khaba khuboolelakho bakholi bowo, naanu olekhalila endebe eye bubwami enyuma wowo tawe?”

²⁸Nio omwami Daudi akobosia ali, “Ndangile Batisheba.” Batisheba engila mukari mala eema ebweeni wo mwami.

²⁹Nio omwami echuba ne aloma ali, “Nga Wele Omunyali Owa Bioosi ne amenyile mindali, owasikula ese khukhwama mu busiku bwoosi,

³⁰ndakhola luno niko nakhwichubila mu lisina lia Wele Omunyali Owa Bioosi, Wele owa Isiraeli. Ndakhola nga nakhwichubila ndi: Omwana wowo Solomoni aliamiia enyuma wase mala ekhale khu ndebe eye bubwami mu bweyaangu bwase.”

³¹Nio Batisheba enama asikamila omwami mala aloma ali, “omwami wase Daudi akhoya ayindile!”

³²Nio omwami Daudi arumania bamulaangile Satoki omusaayi, Nasani Omung'oosi ne Benaya okhwa Yehoyata. Becha ebweeni wo mwami.

³³Omwami ababoolela ali, “Bukula bakholi base mala muniinie omwana wase Solomoni khu nyumbu yase, mala mumuroongie mumwikhisie e Kihoni.

³⁴Satoki omusaayi, ne Nasani omung'oosi bamuchukhekho kamafura ebweeneyo, bamwamiie abe omwami owa Isiraeli. Nio mupe ekhoombi mulome muli, ‘Oyindile omwami Solomoni.’

³⁵Mulamuloondakho mukobole naye ano eche ekhalile endebe yase eye bubwami. Niye olakobola mu bweyaangu bwase abe omwami. Namuroboore abe omwami owa Isiraeli ne Yuda.”

³⁶Benaya okhwa Yehoyata akobosia omwami ali, “Kabe kario, Wele Omunyali Owa Bioosi wo mwami wase akhoya arakho kumukhono.

³⁷Nga Wele Omunyali Owa Bioosi ne abeele no mwami wase, akhoya lundi abe ne Solomoni, mala akhole bubwami bwewe bube bukali lukali khukhila bwo mwami wase Daudi.”

³⁸Nio Satoki omusaayi, Nasani omung'oosi, Benaya okhwa Yehoyata ne Bakereti ne Bapeleti bekha ne Solomoni. Bamuniinia khu nyumbu eyo mwami Daudi, mala bamuroongia bamuyila e Kihoni.

³⁹Satoki abukula lulwiika lwe kamafura khukhwama mu liiema mala achukha khu Solomoni kamafura abe omwami. Nio baapa ekhoombi, mala babaandu boosi baloma bali, “omwami Solomoni, yindila!”

⁴⁰Nio babaandu boosi baniina bamuloondakho bakobola ne naye ne balikho baapa kimilele ne bekhoya ne busangaafu bukali. Liloba lioosi liaterema sikila luyoka lwabwe.

⁴¹Atonicha ne bakeni boosi ba baaba naye baulila luyoka nga baba ne bamaliilisia naikara. Ne nga Yoabu ne aulila ekhoombi ne yipwa, areeba ali, “Luyoka luuli mu lukoba luno luli ne sifuno siina?”

⁴²Nga aaba ne asiiloma, Yonasani, omusoleeli owo musaayi Abiatari echa. Atonicha amuboolela ali, “Yingila mukari. Ewe oli omundu owe bukhala mala olikho oreera kamakhuwa kamalayi.”

⁴³Yonasani akobosia Atonicha ali, “Tawe, omwami wefwe Daudi akholile Solomoni khuba omwami.

⁴⁴Omwami Daudi arumire Satoki omusaayi, Nasani omung'oosi, Benaya okhwa Yehoyata ne Bakereti ne Bapeleti khumuroongia. Bamuniinisie khu nyumbu eyo mwami.

⁴⁵Ne Satoki omusaayi ne Nasani omung'oosi bamuchukhilekho kamafura abe omwami e Kihoni. Ne khukhwama abwenao, bachile ne bekhoya, nio liakila lukoba ne lwichuule luyoka. Luli luyoka olwo nilwo ouuliile.

⁴⁶Solomoni luno ali omwami.

⁴⁷Khutasa khwako bakholi be lichipi bechile khusiima omwami wefwe Daudi, ne baloma bali, ‘Wele wowo akhoya akhole lisina lia Solomoni lifume lukali khukhilakho liliowo. Ne bubwami bwa Solomoni bukhoya bwaba bukali khukhila bubwowo.’ Nio omwami Daudi enama khu sitaanda asaaya Wele.

⁴⁸Aloma ali, ‘Wele Omunyali Owa Bioosi afume, Wele owa Isiraeli, ofukiilile mulala khu lisaaye liase ekhalile endebe eye bubwami endaalo eya luno samwene ne mbona ne chimoni chase!’ ”

⁴⁹Nio bakeni boosi ba Atonicha baterema, mala benyokha barekukha. Buli sia mulala achiila khu ngila yewe omwene.

⁵⁰Atonicha aria Solomoni, enyokha acha mala akhamara chinjika cha alutare.[2]

⁵¹Nio baboolela Solomoni bali, “Atonicha akhuriire, sikila akhamaare chinjika cha alutare.” Alikho aloma ali, “Lekha omwami Solomoni anyoe anjechubile ali se acha khunjira tawe.”

⁵²Solomoni aloma ali, “Ekesia ali ali omundu owolaana, mbaao akhaba lichuune liewe lilala lilakwa asi tawe, ne bumayaanu bwanyoolekhana mu niye, alafwa.”

⁵³Nio omwami Solomoni arumania barusia Atonicha khukhwama khu alutare. Atonicha acha khu mwami mala asikama ebweeni wo mwami Solomoni, mala omwami amuboolela ali, “Khoche engo wowo.”