Read lubukusu 1 Bab. 10 Bible Online

1 Bab. 10 - lubukusu bible

1 Bab. 10

¹Nono Kwini owa Sheba nga aaulila efuma eya Solomoni[14] khuloondekhana ne lisina lia Wele Omunyali Owa Bioosi, acha e Yerusalemu amukela ne kamareeba kamaandalafu.

²Echa ne sipupu siboofu sie babaandu, ne chingamia chichasuta bing'ayilisia bulayi, esahabu engali ne kamabaale ke bukusi bwe angaaki. Nga omukhasi oyo ne ola khu Solomoni amuboolela koosi kakaba mu mebaasio kewe.

³Ne Solomoni akobosia kamareeba kewe koosi. Se siabao sisiindu siosi siosi sisiekisa khu Solomoni siamukhaya khumwinoosiela tawe.

⁴Kwini owa Sheba abona bukesi bwa Solomoni, ne lichipi nilio aba ne ombaakhe,

⁵biakhulia bie khu sialwa sia Solomoni, bubwikhalo bwe bakholi bewe bakhulu, kimilimo kie bakholi bewe chingubo nicho bafwara, bakholi babasutanga eseesi eyo omwami, ne chimbosio che khukhwosia nicho aanila mu Lukaangu khu Wele Omunyali Owa Bioosi. Bino bioosi biakhola omwami owa Sheba arangararwa.

⁶Aboolela omwami Solomoni ali, “Niko naulila mu sibala siase khu makhuwa kowo[15] ne khu bukesi bwowo kali ng'ali.

⁷Ne kakhali se nafukiilila niko naulila tawe khukhwola nga ne nichile mala samwene nakabona. Ne khane se naulilakho akhaba sitonyi tawe. Bukesi bwowo, ne buiinda bwowo buli bukali khukhila niko naulila.

⁸Bakhasi bowo[16] bali ne busangaafu lukali po! Ne bakholi bowo boosi bali ne busangaafu bukali po, babeema buli lwosi ebweeni wowo ne baulila ke bukesi bwowo!

⁹Wele Omunyali Owa Bioosi, Wele wowo afume osiimisiibwe ne nawe ne khukhura ewe khu ndebe eye bubwami mu Isiraeli. Sikila Wele Omunyali Owa Bioosi asiima Isiraeli khulwa mindali, akhukhola ewe omwami nio okhole ka ng'ali ne buluungi.”

¹⁰Nio Kwini oyo aelesia omwami Solomoni esahabu chikiilo chielefu chine, ne bing'ayilisia bulayi bikali, ne kamabaale ke bukusi bwe angaaki. Solomoni se anyoolakho lundi bing'ayilisia bulayi bikali nga nibio Kwini owa Sheba amuelesia tawe.

¹¹(Khutasa khwako chimeeli cha Hiramu chareera esahabu khukhwama e Ofiri, lundi chareera khukhwama ebweeneyo kimirongooro kimikali kie kumusandali ne kamabaale ke bukusi bwe angaaki.

¹²Solomoni arumikhira bisiindi ebio khukhola bisiindi bie Lukaangu ne lichipi, ne lundi khukhola biilili ne kamatuungu ke babeembi be kimienya. Kimisandali kikiindi se kiareerwakho namwe kiabonekhakho mu Isiraeli, khukhwola luno tawe.)

¹³Omwami Solomoni aelesia Kwini owa Sheba buli sisiindu nisio enya khutasa khu biianwa nibio aaba ne amuelesie. Nio Kwini oyo ne bakholi bewe bakobola mu sibala sia Sheba.

¹⁴Nono omwami Solomoni anyoola buli mwiiko esahabu embi chikiilo chielefu shurini na chitaru.

¹⁵Esahabu yino yatuba khu eyo eyamaanga khu baboofuli ne bakeendakeenda, bukhala ne busuuru nibwo babaami be sibala sia Arebia baruunga ne babemeelesi be sibala.

¹⁶Solomoni akhola chingabo chimbalaayi chimia chibili khukhwama khu sahabu. Buli engabo yakholwa khukhwama khu sahabu embi chikiilo saba.

¹⁷Lundi akhola chingabo chichiindi chimia chitaru che esahabu mala buli ndala yakholwa khukhwama khu sahabu embi chikiilo chibili. Solomoni ara bibiindu ebio mwichipi lie mu musiru kwe e Lebanoni.[17]

¹⁸Omwami lundi akhola endebe emboofu eye bubwami eye kumusaanga mala akifuumakho esahabu enosie nukhu.

¹⁹Endebe eye bubwami yaba ne bituumi sita bie khuniinilakho. Ne enyuma wayo siabao sifwaani sie kumurwe kwe euunwa. Buli lubeka lwe endebe lwabakho kamakhono kabili ke khuolelakho. Ne bifwaani bie chitalang'i bibili biema a makhono chana ako.

²⁰Bifwaani bie chitalang'i ekhumi ne bibili biema, buli bibili lubeka ne lubeka ekhutabusia khwe situumi, khu bituumi sita. Endebe nga yino eri se yakholwakho mu bwami bwosi bwosi tawe.

²¹Chiseesi cha Solomoni choosi che khunywelamo chaba che esahabu. Ne bibiindu bioosi bie mu lichipi lie kumusiru kwa Lebanoni biaba bie esahabu tikinyi: Mbao sisiaba sie efwesa tawe, sikila efwesa se yabalwa khuba eye bukhala bwosi bwosi mu ndaalo cha Solomoni tawe.

²²Omwami aba ne kamatuuli ke chimeeli khu nyanja ne kamatuuli ke chimeeli cha Hiramu. Buli enyuma we kimiiko kitaru, kamatuuli ke chimeeli chewe kareeranga esahabu, efwesa, kimisaanga, wambumuli ne chinguke.

²³Nono omwami Solomoni aba omuiinda lundi omukesi khukhila omwami okundi yesi yesi owe khu liloba.

²⁴Ne babaandu be liloba lioosi benyanga khukhwicha mala barekeeresie bukesi nibwo Wele amua.

²⁵Buli mulala owecha amureerera siianwa, bibiindu bie efwesa ne esahabu, chingubo, biiunya bulayi, bing'ayilisianga bulayi, chifarasi ne chinyumbu. Bino biechanga buli mwiiko.

²⁶ Solomoni abuusia alala kamakaari ke liie ne chifarasi. Aba ne kamakaari ke liie eelefu ndala ne chimia chine ne chifarasi chielefu ekhumi ne chibili kamakaari kano ne chifarasi chino achira mu ngoba che kamakaari ke liie ne Yerusalemu niio aba.

²⁷ Nio omwami akhola efwesa yaba esala busa buli abuundu mu Yerusalemu nga kamabaale. Ne chimbao che kumutarakwa chaba chingali busa nga kimikhuyu kie Shefela.

²⁸ Solomoni akulaanga chifarasi khukhwama e Misiri[18] ne e Silisia[19]. Baboofuli bo mwami bachikulaanga khukhwama e Silisia khu bukusi bubwabaao.

²⁹Likaari lie liie liakulibwaanga khukhwama e Misiri khu bukusi bwe efwesa chikiilo embi saba, ne efarasi yakulibwaanga efwesa chikiilo chibili. Nio khubirira khu boofuli bo mwami, kamakaari ke liie ne chifarasi biakusibwa khu baami be Bahiti ne Bashamu boosi.