Read lubukusu 1 Bab. 11 Bible Online

1 Bab. 11 - lubukusu bible

1 Bab. 11

¹ Nono Solomoni asiima bakhasi bareende bakali: Akhwa omukhaana owa Farao, ne bakhaana Bamoabu, Baamoni, Baedomu, Basidoni ne Bahiti.

² Niye abakhwa, akhaba Wele Omunyali Owa Bioosi ne akaania Baisiraeli ali, “Mukhakhwana tawe, sikila ng'ali bacha khumuyuusia enywe muloonde bawele baabwe.” Solomoni naye abasiima lukali.

³Solomoni akhwa bakhasi chimia saba khukhwama mu chinju che bubwami lundi aba ne bakhasi babaandi chimia chitaru nibo aamenyia busa nga basaale. Ne bakhasi bewe bamwausia khukhwama khu Wele.

⁴Ne nga asaakhuluwa, bakhasi bewe bamukhola esaaya bawele be chikholo chichiindi. Kumwoyo kwewe se kwaba kwa ng'ali elala khu Wele Omunyali Owa Bioosi, Wele wewe, nga raraawe Daudi ne aaba tawe.

⁵Esaaya Ashitoreti, wele owe Basidoni ne Milikomu, wele osinyisia lukali owe Baamoni.

⁶Nono Solomoni akhola bumayaanu khu Wele Omunyali Owa Bioosi ne se aloonda Wele Omunyali Owa Bioosi elala nga raraawe Daudi ne aba tawe.

⁷Nio ombakha abuundu aesuta khulwe khukhwisaayila Komeshi, wele osinyisia lukali owe Bamoabu ne abuundu we khukhwisaaya Moleki, wele osinyisia lukali owe Baamoni khu sikulu ebukwe owa Yerusalemu.

⁸Ombakhila bakhasi bewe boosi bakhaaba Baisiraeli tawe abuundu e khukhwisaayila niio banyala khukhwosielia bibiindu biiunya bulayi ne khuanilao chimbosio khu bawele babwe.

⁹Ne Wele Omunyali Owa Bioosi akhalalila Solomoni sikila kumwoyo kwewe kwaba kwaukhe khu Wele Omunyali Owa Bioosi, Wele owa Isiraeli, owaba ne amubonekheele khukhwola khabili.

¹⁰Wele aba amulaka khu likhuwa lino ne liliene ali okhaloonda bawele babaandi tawe. Ne se aria nilio Wele Omunyali Owa Bioosi amulaka tawe.

¹¹Nono Wele Omunyali Owa Bioosi amuboolela ali, “Sikila lino liabeele munganakani mwowo ne se wakholile nga endakaano yase ne yenyekhana nga nakhulaka tawe, ng'ali nja khukhubukula bubwami mala mbuelesie khu mukholi wowo.

¹²Ne kakhaba kario, sikila paapa wowo Daudi, se endakhola lino ne osiili omulamu tawe. Ne kakhali ndakhola ndio mu siise sie bubwami bwo mwana wowo owe sisoleeli.

¹³Kakhaba kario, se endabukula bubwami bwoosi tawe. Ne kakhali ndalekhela omwana wowo ekholo ndala sikila omukholi wase Daudi ne khulwe lukoba lwa Yerusalemu nilwo narobora.”

¹⁴Nio Wele Omunyali Owa Bioosi akhola Hadadi Omuedomu owe enju eye bubwami eya Edomu khuba omusiku owa Solomoni.

¹⁵Khaale kano ne kakhabao tawe, Daudi aula Edomu. Yoabu komanda owe banamae bewe aba achiileyo khusiikha bafu. Yoabu eera buli mundu owe siseecha oli mu Edomu.

¹⁶(Yoabu ne Isiraeli boosi bamenya Edomu khu miesi sita, mala beera buli mundu owe siseecha mu Edomu).

¹⁷Ne kakhali Hadadi ne bakholi balala ba raraawe, Baedomu belukhila e Misiri. Mu siise esio Hadadi aba asiili omwana omukeekhe.

¹⁸Barekukha khukhwama e Midiani mala bacha e Parani. E Parani babukulayo babaandu babaandi bacha ne nabo e Misiri khu Farao omwami owe Misiri. Farao aelesia Hadadi enju ne siakhulia ne amua kamaloba.

¹⁹Hadadi asiimisia Farao, mala Farao amuakhila mulamue, owaba wandaaye owa Tahipanihesi, (Tahipanihesi aba mukha Farao.)

²⁰Wandaaye owa Tahipanihesi asaalila Hadadi omwana owe sisoleeli bali Kenubati. Tahipanihesi mukho omwami amukhusilia mwichipi lia Farao. Kenubati akhulila mwichipi lia Farao alala ne babaana ba Farao.

²¹Hadadi aulila ali Daudi afwa. Lundi aulila ali Yoabu, komanda owe banamae yesi afwa. Hadadi aboolela Farao ali, “Lekha ngobole mu sibala siase.”

²²Ne kakhali Farao amureeba ali, “Siina nisio otaambile nisio ekhakhueele tawe sikila ne wenya khukobola mu sibala siowo?” Hadadi akobosia Farao ali, “Ndekhe busa nje,”

²³Lundi Wele akhola Resoni okhwa Eliada khuba omusiku owa Solomoni. Resoni aba ayilukha khukhwama khu mukhulu wewe, omwami Hadadeseri owa Soba.

²⁴Resoni ayiima sipupu sie babaandu mala aba omwimeelesi owe sipupu sino sisiaba sie khukeendakeenda ne khukhwiiba. (Lino liakholekha enyuma, Daudi ne aulile Hadadeseri omwami owa Soba mala eera basaale ba Hadadeseri, Bashamu.) Resoni ne babaandu bewe bacha mala bamenya mu Damasika, niio babaandu bewe bamwaamiisia mu Damasika.

²⁵Aba omusiku owa Isiraeli mu bulamu bwa Solomoni bwoosi. Akhola kamabi nga Hadadi ne akhola. Abiila Isiraeli. Amiia khu Shamu

²⁶Yeroboamu okhwa Nebati aba mulala khu bemeelesi ba Solomoni. Aba omuefurahimu khukhwama e Sereta. Aba omwana owa namulekhwa bali Serua. Yeroboamu akaluukhana khu mwami Solomoni.

²⁷Oluno nilwo lukano lulwekesia nga ne akaluukhana khu mwami: Solomoni ombakha kimiliinda mala afuunikha bibaanga bie lukoba lwa raraawe Daudi.

²⁸Yeroboamu aba omusoleeli onyala. Nga Solomoni amubona ali akhola kimilimo ne kamaani, amukhola khuba omwimeelesi owe kimilimo kioosi kie ekholo eya Yosefu.

²⁹Endaalo ndala, nga Yeroboamu ne aba ne ali khu lukeendo lwe khukhwama e Yerusalemu, omung'oosi Ahiya, omushilo amwakaanana khu ngila. Nono Ahiya aba afwarire engubo embia. Ne baaba boombi bong'ene abuwaanga.

³⁰Ahiya efuula ekutuusi yewe embia niyo aba ne afwaarire akitabulamo bitonyi ekhumi na bibili.

³¹Mala aboolela Yeroboamu ali, “Yibukulila bitonyi ekhumi, sikila Wele Omunyali Owa Bioosi, Wele owa Isiraeli aloma ali, ‘Lola, Ese endikho nja khubukula Solomoni bubwami, mala ndikhua ewe chikholo ekhumi.

³²Solomoni alarama ne ekholo ndala khulwe omukholi wase Daudi ne Yerusalemu, lukoba nilwo samwene narobora khukhwama mu sibala sia Isiraeli sioosi.

³³Endikho nja khukhola lino sikila Solomoni andekhile ese mala esaayile[20] Ashitoreti wele owe siikhasi owe Basidoni, Chemoshi, wele owe Bamoabu, ne Milikomu wele owe Baamoni. Solomoni se akeendile[21] mu ngila chase tawe. Se akholile ka ng'ali ebweeni wase ne khuria kamalaka kaase nga raraawe Daudi ne akhola tawe.

³⁴Kakhaba kario se ndabukula Solomoni bubwami bwoosi tawe. Ne kakhali ndamulekha amiie mu bulamu bwewe bwoosi. Ndakhola lino sikila omukholi wase Daudi, niye samwene narobora mala owaria kamalaka kaase.

³⁵Ne kakhali khabukule omwana owa Solomoni bubwami mala ekhue ewe chikholo ekhumi.

³⁶Ekharamisilie okhwa Solomoni ekholo ndala, nio buli lwosi mbe ne owe lisaaye lio omukholi owase Daudi ne amiia mu Yerusalemu, lukoba nilwo narobora nga abuundu niio nisaayilwao.

³⁷Ne ewe Yeroboamu, ndakhubukula, mala oliamiia khu buli nisio wenya. Ne oliba omwami owa Isiraeli.

³⁸Waaba ne oria elala niko ekhulaka mala okeende mu malaka kaase ne khukhola kali kang'ali ebweeni wase nga omukholi wase Daudi, ndaba ne nawe. Ndakhukhola luuya luchiililila lwe babaami, nga nakholela Daudi. Ndikhua Isiraeli.

³⁹Sikila bumayaanu bwa Solomoni ndipia sibi be nju eya Daudi ne kakhali se endikhola ndio mindali tawe.’ ”

⁴⁰Khwako Solomoni akhaka khukhwira Yeroboamu. Ne kakhali Yeroboamu amulila wo mwami Shishaki owa Misiri mala amenyayo khukhwola nga Solomoni ne afwa.

⁴¹Nono bikholwa bibiindi bioosi nibio Solomoni akhola, bikholwa bie bukesi bwewe, bioosi biaandikwa mu sitabu sie Bikholwa bia Solomoni.

⁴²Siise nisio omwami Solomoni amiia Yerusalemu, khu Baisiraeli boosi siaba kimiiko kamakhumi kane.

⁴³Solomoni afwa mala asiikhwa mu Lukoba lwa Daudi. Omwana wewe owe sisoleeli Rehoboamu amiia mu bweyaangu bwewe.