Read lubukusu 1 Bab. 12 Bible Online

1 Bab. 12 - lubukusu bible

1 Bab. 12

¹Rehoboamu acha e Shekemu, niio babaandu boosi ba Isiraeli baba ne bebuusiisie bamukhole abe omwami.

²Ne nga Yeroboamu okhwa Nebati aulila kamakhuwa kano (aba amulila e Misiri, khukhwilukha omwami Solomoni), akobola khukhwama e Misiri.

³Babaandu bamulaanga mala boosi alala bacha khu Rehoboamu bamuboolela bali,

⁴“Paapa wowo Solomoni akhukhosia efwe kimilimo kimiaandalafu. Nono yanguya busiro bwe kimilimo kia paapa wowo ne efwe khulaba bakholi bowo.”

⁵Abakobosia ali, “Cha mala mukobole enyuma we chindaalo chitaru.” Nio babaandu barekukha.

⁶Nio omwami Rehoboamu areeba basaakhulu ba baaba bakeleki ba raraawe Solomoni ali, “Enywe mungelekela ngobosie babaandu bano ndiena?”

⁷Bamukobosia bali, “Waaba ne wenya khuba omukholi owe babaandu mala obakholele bulayi, bakobosie likobosia lilayi khu lireeba liabwe, mala buli lwosi baliba bakholi bowo.”

⁸Ne kakhali Rehoboamu alekelesia likeleka lie basaakhulu, mala acha khu baele babachoa ne naye, mala baba luno bakeleki bewe.

⁹Abareeba ali, “Enywe mungelekela khukobosie khuriena babaandu babandeebire bali mbanguisilie busiro bwabwe nibwo bali paapa wase abarakho?”

¹⁰Baele abo bamukobosia bali, “lino nilio olaboolela babaandu bano: ‘Lulwala lwase lwasobi luli luboofu khukhila mu sibuno mwa paapa wase.

¹¹Paapa wase amutiuukha busiro bukali, ese endamutasa busiro khukhilakho. Amupila biboko, ne ese ndamurakho walute bimulume.’ ”

¹²Nono Yeroboamu ne babaandu boosi bakobola khu mwami Rehoboamu endaalo ekhola khataru nga ne abalaka.

¹³Omwami akobosia babaandu ne bukhalafu bukali. Alekelesia likeleka lie basaakhulu nilio bamuboolela.

¹⁴Aboolela babaandu khuloondekhana ne likeleka lie baele. Aloma ali, “Paapa wase amutiuukha busiro ne ese ndabutasa khukhilakho. Amupila biboko, ne ese ndamurakho walute bimulume.”

¹⁵Omwami se arekeeresia babaandu tawe. Wele Omunyali Owa Bioosi niye owakhola kaba kario nio echusie likhuwa liewe nilio aloma khubirira khu Ahiya omushilo khu Yeroboamu okhwa Nebati.

¹⁶ Ne nga Baisiraeli boosi babona omwami alobile khubarekeeresia, bakobosia omwami bali, “Efwe khuli na mukabwa siina munju eya Daudi! Se khuli ne kumukabwa mu okhwa Chesi tawe? Kobola mu maeema kenywe, Ee Isiraeli! Liinda enju yowo wamwene Daudi.” Nio Baisiraeli bakobola mu maeema kabwe,

¹⁷ne kakhali Rehoboamu amiia khu baandu Baisiraeli ba baamenya mu ngoba cha Yuda.

¹⁸Nio omwami Rehoboamu aruma Adoramu, owaba omwimeelesi owe kimilimo kie khuyingililwa, khucha khu Baisiraeli. Ne Baisiraeli bamupa kamabaale bamwiira. Nio Rehoboamu akhola khangu aniina mu likaari liewe lie liie mala elukha acha e Yerusalemu.

¹⁹Khukhwamila khu siise esio, Baisiraeli balobela elala enju eya Daudi khukhwola luno.

²⁰Nga Baisiraeli boosi baulila bali Yeroboamu akobole khukhwama e Misiri, bamulaanga mu libuusiana lie babaandu mala bamukhola khuba omwami owa Isiraeli yoosi. Mbao ekholo ekiindi eyaloonda enju eya Daudi, ne ekhali ekholo eya Yuda tawe.

²¹Nga Rehoboamu ne ola mu Yerusalemu, alaanga alala babaandu boosi ba Yuda ne ekholo eya Benjamini. Baba babaandu chielefu emia ndala ne kamakhumi munane, banamae barobore khukhupana ne Baisiraeli. Benya khukhupana bakobosie bubwami khu Rehoboamu okhwa Solomoni.

²²Ne kakhali elomo eya Wele yecha khu mung'oosi shemaya eli,

²³“Boolela Rehoboamu okhwa Solomoni, omwami owa Yuda ne nabo boosi be enju eya Yuda ne Benjamini kano.

²⁴‘Wele Omunyali Owa Bioosi aloma ali, se okhoya wacha wapana ne balebe bowo ba Isiraeli tawe. Buli mundu akobole engo wewe. Sikila likhuwa lino liamile khwise.’ ” Nio boosi baria likhuwa lia Wele Omunyali Owa Bioosi mala bakobola engo lundi khuloondekhana ne likhuwa lia Wele Omunyali Owa Bioosi.

²⁵Nio Yeroboamu ombakha lukoba lwa Shekemu mu sibala sie bikulu sie Efuraimu mala amenyayo. Arekukha khukhwama ebweeneyo acha ombakha lukoba lwa Penueli.

²⁶Nio Yeroboamu ebaasia mu mwoyo kwewe ali, “Luno bubwami bunyala bwakobola munju eya Daudi,

²⁷kaaba bali babaandu bano balachiililila khuaana chimbosio khu Wele Omunyali Owa Bioosi mu Lukaangu e Yerusalemu. Kimiooyo kie babaandu bano kilakobola khu mwami wabwe Rehoboamu lundi. Balanjira ese mala bakobole khu Rehoboamu omwami owa Yuda.”

²⁸ Nio omwami ayiima likaambila mala akhola bifwaani bibili bie chimoosi che esahabu. Aboolela babaandu bewe ali, “Mwanyalile murio khucha e Yerusalemu. Lola bawele benywe Ee Isiraeli, babamurusia mu Misiri.”

²⁹Emia sifwaani silala mu Beteli ne sisiindi mu Dani.

³⁰Likhuwa elio liaba bumayaanu sikila babaandu balala bacha khukhwisaaya sifwaani e Beteli ne babaandi e Dani.

³¹Lundi Yeroboamu ombakha chinju abuundu aesuta mala arobora basaayi khukhwama mu baandu boosi bakhaaba Balawi tawe.

³² Yeroboamu arakikha naikara khu ndaalo eye ekhumi ne chiraano eye kumwesi kwa munane, nga naikara eye mu Yuda. Aana chimbosio khu alutare. Lundi aana chimbosio mu Beteli khu moosi che esahabu nicho akhola. Mala ara basaayi mu Beteli abuundu aesuta niio akhola.

³³Acha khu alutare niyo akhola e Beteli khu ndaalo eye ekhumi ne chiraano eye kumwesi kwa munane, endaalo niyo niye omwene aba ne ereereo. Arao naikara khu baandu ba Isiraeli, mala acha khu alutare osia bibiindu biiunya bulayi.