Read lubukusu 1 Bab. 13 Bible Online

1 Bab. 13 - lubukusu bible

1 Bab. 13

¹Omundu owa Wele echa e Beteli khukhwama Yuda ne arumiirwe ne elomo eya Wele Omunyali Owa Bioosi. Yeroboamu aaba amile a alutare khukhwosia bibiindu biiunya bulayi.

² Omundu owa Wele Omunyali Owa Bioosi khulwe elomo eya Wele Omunyali Owa Bioosi, alilila a alutare ali, “Ee alutare, alutare, kano niko Wele Omunyali Owa Bioosi aloma: ‘Omwana alisaalwa munju eya Daudi. Lisina liewe liliba Yosia. Alikhwirirakho basaayi be abuundu aesuta, baana bibiindu biiunya bulayi khwiwe. Kamakuumba ke babaandu kaliosibwa khwiwe.’ ”

³Omundu owa Wele Omunyali Owa Bioosi chana aana simanyisio endaalo eyo eng'ene ne aloma ali, “Esino nisio simanyisio nisio Wele Omunyali Owa Bioosi alomile, ‘Alutare yino echa khwatikhamo bitonyi. Likokhe likilikho likhachukhwe.’ ”

⁴Nga omwami Yeroboamu ne aulila ko omundu owa Wele Omunyali Owa Bioosi niko aalila sikila alutare eyaba e Beteli, amwekeselela kumukhono aloma ali, “Tiila omundu oyo!” Abwene ne abwene kumukhono nikwo okeselela kwooma mala akhilwa khukukobosiayo.

⁵Alutare yatikhamo mala likokhe liachichukha asi nga omundu owa Wele Omunyali Owa Bioosi oyo ne aarusia simanyisio mu lisina lia Wele Omunyali Owa Bioosi.

⁶Omwami aboolela omundu owa Wele ali, “Nosiima sabile kumwalaalo kwa Wele Omunyali Owa Bioosi, Wele wowo mala omusabe ambonie kumukhono kwase!” Nio omundu owa Wele asaba Wele Omunyali Owa Bioosi mala kumukhono kwo omwami kwaona.

⁷Omwami aboolela omundu owa Wele ali, “yiicha khuche engo mala oliekho sisiindu ne endakhuelesia kumuruuru.”

⁸Omundu owa Wele oyo amukobosia ali, “Wakhamba sitonyi sie enju yowo se ndacha nawe tawe. Se ndalia namwe nywe kameechi abuundu ano tawe.

⁹Sikila nalakwa ne elomo eya Wele Omunyali Owa Bioosi eyaloma eli, ‘Se olalia kumukaati namwe onywe kameechi namwe wileyo khu ngila niyo wichiilekho tawe.’ ”

¹⁰Nio achiila khu ngila ekiindi ne se achiila khu ngila niyo echelakho e Beteli tawe.

¹¹Nono abao omung'oosi omusaakhulu owamenyanga mu Beteli. Basoleeli bewe becha mala bamuboolela koosi niko omundu owa Wele Omunyali Owa Bioosi aaba ne akholile mu Beteli endaalo eyo. Ne lundi bamuboolela kamakhuwa niko aaba ne abooleele omwami Yeroboamu.

¹²Paapa wabwe abareeba ali, “Achiliile khu ngila siina?” Babaana bewe bamwekesia engila niyo omundu owa Wele khukhwama Yuda aachilakho.

¹³Mala ababoolela ali, “Ndekekhere epunda.” Nio bamurekekhera epunda mala akiikhalakho.

¹⁴Aloonda khu mundu owa Wele amunyoola ekhaale asi we kumukhoonge. Amureeba ali, “Ewe niwe omundu owa Wele owamile e Yuda?” Omundu oyo amukobosia ali, “Yee, niise.”

¹⁵Nio amuboolela ali, “yiicha khuche engo khulie siakhulia fwembi.”

¹⁶Ne kakhali omundu owa Wele amukobosia ali, “Se enyala nakobola engo ne nawe namwe niche munju mwowo tawe. Lundi se nyala nalia namwe nanywa sisiindu siosi siosi abuundu ano ne nawe tawe.

¹⁷Sikila Wele Omunyali Owa Bioosi andaka ali, ‘Okhalia namwe onywe sisiindu, namwe okhakobolela khu ngila nikhwo ochiliilekho tawe.’ ”

¹⁸Nio omung'oosi omusaakhulu oyo amuboolela ali, “Ese, sesi ndi omung'oosi nga ewe, ne malaika amboleele elomo eya Wele Omunyali Owa Bioosi, ese khuyile munju mwase mala olie siakhulia ne khunywa kameechi.” Ne kakhali omung'oosi omusaakhulu oyo amubea.

¹⁹Nio omung'oosi khukhwama Yuda akobola acha no mung'oosi omusaakhulu oyo mala alia siakhulia ne naye.

²⁰Nga baba ne bekhaale a siaalwa, elomo eya Wele Omunyali Owa Bioosi yecha khu mung'oosi omusaakhulu

²¹mala alilila omundu owa Wele khukhwama Yuda ali, “Wele Omunyali Owa Bioosi aloma ali se wariire likhuwa liewe tawe. Se waliindile lilaka nilio Wele Omunyali Owa Bioosi aakhulaka tawe.

²²Ne kakhali, okoboole mala waliila siakhulia abuundu niio akhulaka ali okhaliilao tawe. Sikila kano, kumubili kwowo se kulasiikhwa mu siliindwa sie enju yenywe tawe.”

²³Enyuma we khumala khulia ne khunywa, omung'oosi omusaakhulu oyo arekekhera omundu owa Wele khukhwama Yuda epunda.

²⁴Nga omundu oyo ne aaba ne alikho acha, etalang'i yamwakaanana khungila mala yamwiira. Afwa mala alambaala khu ngila. Epunda eyo ne etalang'i biamwimao.

²⁵Babaandu babirao mala babona omufu khu ngila ne etalang'i yamwimileo. Bacha baboola niko babona mu lukoba nimwo omung'oosi omusaakhulu oyo amenya.

²⁶Nga omung'oosi omusaakhulu oyo ne aaulila kano, aloma ali, “Oyo ali omundu owa Wele owaloba khuria lilaka lia Wele Omunyali Owa Bioosi. Khwako Wele Omunyali Owa Bioosi arumire etalang'i yamutabulamo mala yamwiira, khuloondekhana nga Wele Omunyali Owa Bioosi ne aamuboolela.”

²⁷Nio Omung'oosi omusaakhulu aboolela babaana bewe be sisoleeli ali, “Ndekekhere epunda.” Bamurekekhera.

²⁸Mala omusaakhulu acha anyoola omufu alambaalile khu ngila, mala epunda ne etalang'i biamwimileo. Etalang'i se yaba yaliile omufu namwe yatabulaake epunda tawe.

²⁹Omung'oosi omusaakhulu oyo abukula omufu amura khu punda yewe mala amukobosia mu lukoba lwa Beteli, khumulila ne khumusiikha.

³⁰Amusiikha mu ng'ani yewe eng'ene, mala niye ne babaana bewe bamulila ne baloma bali, “Ee, wandaayase!”

³¹Enyuma we khumusiikha, omung'oosi aboolela babaana bewe ali, “Ne efwa, mulisiikha mu ng'ani niio omundu owa Wele asiikhiilwemo. Ra kamakuumba kase embi ne kamakuumba kewe.

³²Sikila kamakhuwa niko aloma khulwe lilaka lia Wele Omunyali Owa Bioosi khu alutare mu Beteli ne abuundu aesuta e khusaayilao mu ngoba cha Samaria, ng'ali kaliba kario.”

³³Enyuma we likhuwa lino Yeroboamu se alekha chingila chewe chimayaanu tawe. Ne kakhali achiililila khurobora basaayi khukhwama mu chinju chosi chosi chikhali che busaayi tawe, khukhola khu alutare nicho ombaakhe. Arobora omundu yesi yesi owenya khuba nga omusaayi owe abuundu aesuta.

³⁴Likhuwa lino liaba bumayaanu khunju eya Yeroboamu. Areera libunia ne lilionaka likali khunju yewe.