Read lubukusu 1 Bab. 17 Bible Online

1 Bab. 17 - lubukusu bible

1 Bab. 17

¹ Nono Elicha Omutishibe, khukhwama e Tishibe mu Kileati, aboolela omwami Ahabu ali, “Nga Wele Omunyali Owa Bioosi, Wele owa Isiraeli ne amenya niye ese kholela, luume namwe efula se elibao ese ne ekhalomile ndio tawe.”

²Nio elomo eya Wele Omunyali Owa Bioosi yecha khu Elicha eli,

³“Inyokha abuundu ano oche lubeka lwe ebukwe mala wikise embi ne khakheechi kha Keriti, ebukwe owa Yoritani.

⁴Olanywa kameechi ke khakheechi khano mala nalakile khooro chikhureerere siakhulia ebweeneyo.”

⁵Nio Elicha acha akhola khuloondekhana ne elomo eya Wele Omunyali Owa Bioosi. Acha amenya khu kheechi kha Keriti khaali ebukwe owa Yoritani.

⁶Khooro chamureerera kumukaati ne enyama buli kumutikhinyi ne ekolooba mala anywa kameechi khukhwama mu kheechi.

⁷Enyuma we siise, khakheechi khateenya sikila efula se yabao mu sibala tawe.

⁸Nio elomo eya Wele Omunyali Owa Bioosi yecha khu Elicha eli,

⁹ “Yinyokha, oche e Sarefati eli siimbi mu Sidoni mala omenyeyo. Nalakile namulekhwa omenyile ebweeneyo akhuliisie.”

¹⁰Nio Elicha acha e Sarefati. Nga ne ola a silibwa sie lukoba, abona namulekhwa alikho areenya chiikhu. Amulaanga mala aloma ali, “Nosiima ndererekho kameechi matiiti kari khu seesi nywe.”

¹¹Ne nga aba ne alikho acha khumureerera kameechi, Elicha amulaanga aloma ali, “Mala nosiima ndererekho akhaba ne sitonyi sie kumukaati.”

¹²Namulekhwa oyo amukobosia ali, “Nga Wele Omunyali Owa Bioosi, Wele wowo ne amenya, se endikho ne kumukaati kwosi kwosi tawe. Ne kakhali ndi ne bufu efuusi ndala yong'ene mu nyuungu, ne kamafura matiiti kari mu mwendo. Nechile ano khureenya chiikhu ndiiti chiri mala ngobole ne nacho engo nje ndeekhe nisio ndi ne nasio. Mala ese no mwana wase khulie mala khufwe enjala.”

¹³Elicha amuboolela ali, “Okheembeelela tawe. Cha okhole nga ne olomile. Ne kakhali nyoa ukholeele ese sitonyi sie kumukaati khukhwama khu bufu ne kamafura niko oli ne nako underere. Enyuma wako yikholela ewe ne omwana wowo.

¹⁴Sikila Wele Omunyali Owa Bioosi, Wele owa Isiraeli aboola ali, ‘Bufu se bulawa mu nyuungu namwe kamafura se kalawa mu mwendo tawe khukhwola endaalo niyo Wele Omunyali Owa Bioosi alikwisia efula khu liloba.’ ”

¹⁵Namulekhwa acha mala akhola nga Elicha ne aba ne amuboleele. Mala niye no mwana wewe ne Elicha baba ne siakhulia siboola khulwe chindaalo chingali.

¹⁶Bufu se bwawa mu nyuungu namwe kamafura se kawa mu mwendo tawe, nga Wele Omunyali Owa Bioosi nalaka khubirira khu Elicha.

¹⁷Enyuma we siise omusoleeli owa namulekhwa alwala. Bulwaale bwewe bwatasa lukali mala ekhumaliilikha afwa.

¹⁸Namulekhwa aboolela Elicha ali, “Ee, mundu owa Wele, ukholeele siina sino? Ewe wechile ano khukhukhebusia bumayaanu bwase, mala wire omwana wase?”

¹⁹Elicha amuboolela ali, “Mbe omwana wowo.” Abukula omwana khukhwama khu maawe amumeema aniina ne naye mu lusiro lwewe lwe munju mungaaki nimwo aba ne amenyile mala amwalisia khu sitaanda siewe.

²⁰Nio Elicha alilila Wele Omunyali Owa Bioosi ne aloma ali, “Ee Wele Omunyali Owa Bioosi, Wele wase, wareerire bubi buno khuakhaba namulekhwa yuno niye menyile naye khulwe khukhwira omwana wewe?”

²¹ Nio Elicha akona khu mwana khukhwola khataru mala alilila Wele Omunyali Owa Bioosi ali, “Ee, Wele Omunyali Owa Bioosi, Wele wase, lamusia omwana yuno.”

²²Wele Omunyali Owa Bioosi aulila lisaba lia Elicha, omwana arakikha khueela mala alamukha.

²³Elicha abukula omwana amukobosiela maawe mu lusiro lwe asi mala amuboolela ali, “Lola, omwana wowo ali omulamu!”

²⁴Namulekhwa akobosia Elicha ali, “Luno nakhamanya ndi ewe oli omundu owa Wele, ne Wele akhulomalomelangamo.”