Read lubukusu 1 Bab. 18 Bible Online

1 Bab. 18 - lubukusu bible

1 Bab. 18

¹Enyuma we siise sileeyi, elomo eya Wele Omunyali Owa Bioosi yecha khu Elicha, mu mwiiko kukhola khataru efula ne akhakwa tawe eli, “Cha weyokesiane khu mwami Ahabu, mala ndalekhuula efula ekwe khu sibala.”

²Nono Elicha acha khukhwiyokesia khu Ahabu. Nono enjala mu Samaria yaba endafu lukali.

³Ahabu alaanga Obadia, owaba omwimeelesi owe lichipi. (Nono Obadia aba aria Wele Omunyali Owa Bioosi lukali.

⁴Ne nga Yesebeli eraanga bang'oosi ba Wele Omunyali Owa Bioosi, Obadia abukula emia ndala khu nibo, mala abakisa mu mabina kabili, buli mu libina babaandu kamakhumi karaano. Mala abaechanga siakhulia ne kameechi.)

⁵Ahabu aboolela Obadia ali, “Cha okeende buli abuundu niio esebele eli nende buli mu matooma mwosi mu sibala. Wakana khunyala khwanyoola bunyaasi bunyala bwaliinda chifarasi ne chinyumbu chikhafwa tawe. Nio khukhakhola khurio khwatibia busa bibiaayo biefwe tawe.”

⁶Bafukiilisiana lubeka lwe sibala nilwo buli mulala acha khulambuula. Ahabu acha lubeka lulala yeng'ene ne Obadia yesi acha lubeka luluundi yeng'ene.

⁷Nga Obadia ne aba khu lukeendo lwewe, Elicha amwakaanana. Obadia amumanya, mala amwinamila amureeba ali, “Ewe niwe omwami wase Elicha?”

⁸Akobosia ali, “Yee, ese niise. Cha oboolele omukhulu wowo, oli, ‘Elicha ali ano.’ ”

⁹Obadia amukobosia ali, “Bumayaanu siina nibwo ekholile nio unde mu mukhono kwo mwami Ahabu anjire?

¹⁰Nga Wele Omunyali Owa Bioosi, Wele wowo ne amenya, mbao sibala namwe bubwami niio omwami wase akhaarumania bakhuyiime tawe. Ne omwami yesi yesi ne aloma ali se oli mu sibala siewe tawe, Ahabu amurakho ne echuba ali se oliyo tawe.

¹¹Nono ewe wenya ese nje mboolele omwami wase ndi ewe oli ano?

¹²Roho owa Wele Omunyali Owa Bioosi akhola ario akhusuta akhuyila abuundu aandi ese ne njiile busa ndi. Ekhola ndio nacha naboolela omwami Ahabu ndi oli ano mala eche alekhe khukhunyoolao tawe. Aba alanjira. Khebulila oli ese naria Wele Omunyali Owa Bioosi khukhwama mu bwana bwase.

¹³Se waulila niko nakhola nga Yesebeli ne eera bang'oosi ba Wele Omunyali Owa Bioosi tawe? Nakisa bang'oosi emia ndala mu mabina mu bipupu bibili bie babaandu kamakhumi karaano nabalisia kimikaati ne kameechi.

¹⁴Nono onyala oriena wandaka oli nje mala mboolele omwami ndi ewe oli ano? Alanjira!”

¹⁵Elicha amukobosia ali, “Nga Wele Omunyali Owa Bioosi owe banamae ne amenya, niye ese ekholelaanga, khulaka ndi samwene ndeyekesiana ebweeni wo mwami endaalo yino.”

¹⁶Nio Obadia acha khu mwami Ahabu mala amuboolela. Ahabu arekukha acha khukhwakaanana Elicha.

¹⁷Nga Ahabu ne abona Elicha aloma ali, “Ewe niwe onaania Isiraeli!”

¹⁸Elicha amukobosia ali, “Ese se nananiisie Isiraeli tawe. Ewe ne enju eya paapa wowo ninywe munaniisie, sikila mwalekhile kamalaka ka Wele Omunyali Owa Bioosi mala mwaloondile khu Baali.

¹⁹Nono rumania balaange babaandu ba Isiraeli boosi beche khwise a Sikulu sie Karimeli. Yiicha ne bang'oosi chimia chine ne kamakhumi karaano ba Baali, ne bang'oosi chimia chine ba Ashera, balia khu siaalwa sia Yesebeli.”

²⁰Nio Ahabu arumania alaanga Baisiraeli boosi, ne bang'oosi ba Baali a Sikulu sia Karimeli.

²¹Elicha acha embi niio babaandu boosi bali mala aloma ali, “Mulachiililila khuba ne kamebaasio kabili khu siise sina? Wele Omunyali Owa Bioosi aaba ne ali Wele, muloondekho ne Baali aaba ne ali wele, muloondekho.” Ne babaandu basila busa.

²²Nio Elicha aboolela babaandu ali, “Ese, seng'ene omung'oosi owa Wele Omunyali Owa Bioosi oramire ne bang'oosi ba Baali bali chimia chine ne kamakhumi karaano.

²³Khuelesie chiuunwa chibili. Lekha bang'oosi ba Baali barobore ndala bakiire bakitonyake mu bitonyi mala bakire khukhu. Ne bakhabwaana kumulilo tawe. Ese sesi ndakhola ndio ne uunwa ekiindi.

²⁴Nono bang'oosi ba Baali basabe wele waabwe ne ese ndasaba Wele Omunyali Owa Bioosi. Ne wele olakobosia ne kumulilo, omwene oyo aba niye Wele.” Babaandu baloma bali, “Walomile bulayi.”

²⁵Nio Elicha aboolela bang'oosi ba Baali ali, “Yiroborera euunwa ndala mala munyoe mukitonyake sikila enywe muli bakali. Musabe wele wenywe. Ne kakhali mukhara kumulilo mu khu tawe.”

²⁶Babukula euunwa niyo babaelesia mala bakitonyaka, mala basaba Baali khukhwama kumutikhinyi khukhwola nga ne liaanga. Baloma bali, “Ee Baali khukobosie!” Ne kakhali sisiindu se siauliilikhanakho tawe. Ne mbao owakobosia tawe. Babotookhelela alutare niyo baba ne bakholile.

²⁷Oli liaanga, Elicha arakikha khubakholela siienyameno ali, “Saba lukali, sikila ali wele. Wakana alikho aroora kumuusi namwe achiile khwiyeeta, namwe wakana akeniiye! Namwe alikho akona, mala mukhoya mumwinyosie!”

²⁸Nio basaba lukali ne bekhalakaka ne kimibano ne chimbeko khuloondekhana ne kimiima kiabwe khukhwola nga bebeena.

²⁹Nga enyanga ne yabira liaanga, bachiililila khukhola bario khukhwola nga siise sie embosio eye ekolooba siola. Ne kakhali sisiindu se siauliilikhanakho namwe omundu akobosia namwe aulila lisaba tawe.

³⁰Nio Elicha aboolela babaandu boosi ali, “Njisendeo siimbi.” Mala boosi bamwibuusiao. Arakikha khung'oona alutare eya Wele Omunyali Owa Bioosi eyaba ne yatechukhaka.

³¹ Elicha abukula kamabaale ekhumi na kabili, khuloondekhana ne chikholo ekhumi ne chibili che babaana ba Yakobo. Elomo eya Wele Omunyali Owa Bioosi yaba yecha khu Yakobo eli alilaangwa bali Isiraeli.

³²Ne kamabaale ako ombakhila alutare khu lisina lia Wele Omunyali Owa Bioosi. Ayaba kumuliinda abotookhelesia alutare. Kumuliinda kuno yaba kunyala kwechulamo bumiicho embi sikono silala.

³³Nio ara chiikhu khu alutare, atonyaka euunwa mu bitonyi, mala akira khu khu. Aloma ali, “Yichusia chinyuungu chine kameechi mala mukachukhe khu siianwa sie khukhwosia ne khukhu.”

³⁴Aloma lundi ali, “Chukhakho lukhola khabili.” Mala bakhola bario. Aloma ali, “Chukhakho lukhola khataru.” Mala bakhola bario lukhola khataru.

³⁵Kameechi katima keekha kabotookhelela alutare mala kechula mu muliinda.

³⁶Oli siise sie khuaana embosio eye ekolooba, omung'oosi Elicha eseenda a alutare mala asaba ali, “Ee, Wele Omunyali Owa Bioosi, Wele owa Aburahamu, Isaaka ne Yakobo lekha luno limanyikhane endaalo yino lili ewewe oli Wele mu Isiraeli ne ese ndi omukholi wowo. Mala lundi lili ese nakholile bibiindu bino bioosi khulwe elomo yowo.

³⁷Ngobosie, Ee Wele Omunyali Owa Bioosi, ngobosie nio babaandu bano bamanye bali, Ewe oli Wele Omunyali Owa Bioosi, oli Wele, mala ewe wayuusiisie kimiooyo kiabwe kikhukobolele.”

³⁸Nio kumulilo kwa Wele Omunyali Owa Bioosi kwosia embosio eye khukhwosia, chiikhu, ne kamabaale. Kwosia akhaba ne liloba mala kameechi kateenya kakaba mu muliinda.

³⁹Nga babaandu boosi ne babona lino, bakwa mafuumala mala baloma bali, “Wele Omunyali Owa Bioosi ali Wele, Wele Omunyali Owa Bioosi ali Wele.”

⁴⁰Ne Elicha aloma ali, “Amba bang'oosi ba Baali, mukhalekhakho akhaba mulala khu nibo elukha tawe.” Babaandu babaamba boosi mala Elicha abekhisia khu kheechi kha Kishoni mala abeererayo.

⁴¹Nio Elicha aboolela omwami Ahabu ali, “Cha olie lundi onywe, sikila efula engali elikho eoloola, yolile.”

⁴² Nio Ahabu acha alia mala anywa. Elicha aniina khu ngaaki khwe sikulu sia Karimeli. Ebweeneyo enama asi kumurwe kwola akari we kamasikamo keewe.

⁴³Aboolela omukholi wewe ali, “Niina angaaki olole sia nyanja.” Omukholi aniina, akobola mala aloma ali, “Se nabooneyo sisiindu tawe.” Elicha aloma ali, “Cha lundi khukhwola saba.”

⁴⁴Ne lukhola saba aloma ali, “Naboone lileesi litiiti liri, lili nga kumukhono kwo mundu, lienyookhe khukhwama mu nyanja.” Elicha aboolela omukholi ali, “Cha khu mwami Ahabu mala omuboolele engile mu likaari liewe lie liie mala ekhe akobole engo. Efula ekhamwiyikamia ano tawe.”

⁴⁵Mu siise sitiiti, kamafuumbi kamamali kafuunikha mungaaki. Ekhuungu yarakikha khuucha mala efula engali yarakikha khukwa. Ahabu engila mu likaari liewe lie liie acha e Yesireeli.

⁴⁶Ne kamaani ka Wele Omunyali Owa Bioosi kaba khu Elicha eboela chingubo chewe mu sibuno, mala atima chimbilo arangirira Ahabu lukeendo lwosi khukhwola a silibwa e Yesireeli.