Read lubukusu 1 Bab. 19 Bible Online

1 Bab. 19 - lubukusu bible

1 Bab. 19

¹Ahabu aboolela omukhasi wewe Yesebeli buli siindu nisio Elicha aba ne akholile ne lundi nga ne aba ne erire bang'oosi ba Baali boosi.

²Nio Yesebeli arumira Elicha omurume ne aloma ali, “Bawele bakhoya bamba kumunaanio kumukali kumutikhinyi siise nga sino siri naaba ne ekhakhwirire nga ewe ne wirire bang'oosi tawe.”

³Elicha aria mala elukha nio eonie. Ola Beerisheba eye mu Yuda mala alekhayo omukholi wewe ebweeneyo.

⁴ Ne niye omwene akeenda lukeendo kumuusi kwosi mu sichiimi. Eema mala ekhala asi we kumurongooro kumunyenya mala ekoomba khufwa. Asaba ali, “Nanyalile endio Ee Wele Omunyali Owa Bioosi. Lekha efwe. Ese se ekhila bakuuka base tawe!”

⁵Akona asi we kumurongooro kumunyenya mala liilo liamuaamba. Malaika amutilakho mala amuboolela ali, “Yinyokha mala olie.”

⁶Alola eyi ne neeyi mala abona siakhulia sitekheelwe khu mabaale kamabile ne esaachi eye kameechi embi amurwe kwewe. Alia mala anywa mala akona asi lundi.

⁷Malaika owa Wele Omunyali Owa Bioosi akobola lundi lukhola khabili amutilakho aloma ali, “Yinyokha mala olie sikila lukeendo lukhola lurio lwakhubeela luandalafu.”

⁸Elicha enyokha alia lundi anywa mala siakhulia esio siamua kamaani ke khukeenda chindaalo kamakhumi kane kumuusi ne siilo khukhwola khu Horebu, sikulu sia Wele.

⁹Aacha ola mu libina nimwo akona. Elomo eya Wele Omunyali Owa Bioosi yamwichakho eli, “Elicha olikho okhola siina ano?”

¹⁰ Akobosia ali, “Nakhakilenge nga nenyala khukhukholela ewe weng'ene Wele Omunyali Owa Bioosi, Wele owe kamae. Ne kakhali babaandu ba Isiraeli balekhile endakaano yowo. Batechule alutare yowo yakwile asi. Mala berire bang'oosi bowo boosi. Ese seng'ene niye oramire, mala balikho bakhaka khukhunjira.”

¹¹Wele Omunyali Owa Bioosi amukobosia ali, “Rura oche mala wime khu sikulu ebweeni wa Wele Omunyali Owa Bioosi.” Nio Wele Omunyali Owa Bioosi abira ebweeni wewe mala ekhuungu eye kamaani yakhoongola kamabaale ke bikulu ebweeni wa Wele Omunyali Owa Bioosi. Ne kakhali Wele Omunyali Owa Bioosi se aba mu khuungu ng'eneyo tawe. Enyuma we ekhuungu, liabao literema lie liloba, ne kakhali Wele Omunyali Owa Bioosi se aba mu literema elio tawe.

¹²Enyuma we literema lie liloba, kumulilo kwabao, ne kakhali Wele Omunyali Owa Bioosi se aba mu mulilo tawe. Ne enyuma we kumulilo, liabao lilomaloma lia kalaa.

¹³Ne nga Elicha ne aulila kumumilo ebiimba mu moni engubo yewe mala arura acha eema emuliango kwe libina. Kumumilo kwamuboolela kuli, “Elicha olikho okhola siina ano?”

¹⁴Akobosia ali, “Nakhakilenge nga ne enyala khukhukholela ewe weng'ene, Wele Omunyali Owa Bioosi, Wele owe kamae. Ne kakhali babaandu ba Isiraeli balekhile endakaano yowo. Batechule alutare yowo yakwile asi. Mala berire bang'oosi bowo boosi. Ese seng'ene niye oramire, mala balikho bakhaka khukhunjira.”

¹⁵ Wele Omunyali Owa Bioosi amuboolela ali, kobola mu sichiimi sia Damasika, ne newolileyo chukha kamafura khu Hasaeli abe omwami owa Shamu.

¹⁶ Ne chukha khu Yehu okhwa Nimushi kamafura abe omwami owa Isiraeli. Ne Elisha okhwa Shafati khukhwama e Abeli-mehola muchukhekho kamafura ele mu bweyaangu bwowo nga omung'oosi.

¹⁷Omundu yesi yesi owikoba khukhwirwa ne Hasaeli, akheerwe ne Yehu. Ne yesi yesi okhekobe khukhwirwa ne Yehu, akheerwe ne Elisha.

¹⁸ Kakhaba kario khalekhe babaandu chielefu saba balamu mu Isiraeli, abo boosi basiili khwinamila Baali namwe khukhwikwayila sifwaani siewe tawe.

¹⁹Elicha arekukha khukhwama abwenao mala anyoola Elisha okhwa Shafati alikho alimila chieeyi. Aba ne chieeyi bipupu ekhumi na bibili. Aba alikho alimila sipupu sie ekhumi ne bibili. Elicha amubirao mala ara khu Elisha engubo yewe.

²⁰Nio Elisha alekha chieeyi chewe atimaka khu Elicha mala amuboolela ali, “Lekha nje nikwayile paapa ne maayi mbaboolele ndi, ‘Mulindwe,’ nio ngobole nje ne nawe.” Elicha akobosia ali, bulayi “Kobolayo lundi, se khukhiingilila tawe.”

²¹Nio Elisha akobola niio sipupu sie chieeyi siaba mala achikhonya. Abukula kamachooki asaaka ateekhela chinyama. Aelesia babaandu chinyama mala bachilia. Nio enyokha acha aloonda khu Elicha amukholela nga omuyeeti wewe.