Read lubukusu 1 Bab. 2 Bible Online

1 Bab. 2 - lubukusu bible

1 Bab. 2

¹Nga Daudi ne aaba ne ali embi khufwa, alaka omwana wewe Solomoni ne aloma ali,

²“Siise siase sie khufwa siolile nga bibuumbe bioosi ne bifwichanga. Ba owe kamaani, lundi omunyindaafu.

³Khola niko Wele Omunyali Owa Bioosi, Wele wowo akhulaka khukhola. Keenda mu ngila chewe ne khuria kamalaka kewe, ne kamakaambilo, nga ne kaandikwa mu Lilaka lia Musa. Wakhola orio, ocha khuindiaala mu niko okhola koosi, ne oosi oosi niio olicha.

⁴Nio Wele Omunyali Owa Bioosi akhole niko aasuubisia khuloondekhana ne nase nga ne aamboolela ali, ‘Kaaba bali be lisaaye liase bacha khutiila kamalaka kewe ne khumukholela niye mu busuubilwa lundi ne kumwoyo kwoosi, se akhatambemo owamiia Isiraeli mu biise bioosi tawe.’

⁵ “Khutasa khwako, omanyile niko Yoabu okhwa Seruya aakholela. Era banamae bakhulu babili be banamae ba Isiraeli. Banamae bakhulu bano baba Abuneri okhwa Neri, ne Amasa okhwa Yeteri. Abeera mu siise sie kumuleembe oli liie liliabao. Liliira lino, lie babaandu bakhaba ne bumayaanu tawe[3] liakila buubi bwewe bwakobola khwise ne enju yase.

⁶Mukholele khuloondekhana ne bukesi bwowo. Ne kakhali okhamulekha afwa ne kumuleembe tawe.

⁷ “Ne kakhali khola kamalayi khu basoleeli ba Barisilai omukileati. Lekha babe mwabo balia khu siaalwa siowo. Sikila banjakaanila bulayi nga naba ne nilukha wandaayo Abusolomu.

⁸ “Oli ne Shimei okhwa Kera yesi, we kholo eya Benjamini khukhwama mu lukoba lwa Baurimu. Andaama burafu endaalo niyo nachiila e Mahanaimu. Ne kakhali nga namwakaanana a luuchi lwa Yoritani, namwechubila mu lisina lia Wele Omunyali Owa Bioosi ndi se nja khumwiira tawe.

⁹Nono okhamubukula nga okhali ne bubi tawe. Ewe oli omundu omukesi, olimanya nisio olimukhola. Ne okhoya wabona oli eriirwe, akhaba ne ali omusaakhulu owe chimbuchi.”

¹⁰Nio Daudi afwa mala asiikhwa mu lukoba lwewe.

¹¹ Daudi amiia Isiraeli khu miiko kamakhumi kane. Amiia khukhwama mu Heburoni kimiiko saba ne khukhwama mu Yerusalemu kimiiko kamakhumi kataru na kitaru.

¹² Nio Solomoni ekhala khu ndebe eye bubwami bwa raraawe Daudi, mala bubwami bwewe bwaba ne kamaani.

¹³Nio Atonicha, omwana owa Hakiti echa khu Batisheba maayi owa Solomoni. Batisheba amureeba ali, “Wechile ne kumuleembe?” Amukobosia ali, “Yee, nechile ne kumuleembe.”

¹⁴Nio atasakho ali, “Ese ndi ne sisiindu nisio nenya khu khuboolela.” Amukobosia ali, “Mboolele.”

¹⁵Atonicha aloma ali, “Ewe omanyile oli bubwami bwaba bubwase. Baisiraeli boosi baaniindanga ese namiie. Ne kakhali bubwami bwakalukhaane mala bwabeele bwa wandaayase. Bwaba bubwewe khukhwama khu Wele Omunyali Owa Bioosi.

¹⁶Ne luno ndi ne lireeba lilala. Nosiima okhaloba khu khuukholela tawe.” Batisheba aloma ali, “Reeba.”

¹⁷ Amukobosia ali, “Nosiima reeba omwami Solomoni. Ese manyile ndi se alaloba liliowo tawe. Afukiilile ambe Abishaki omukhaana Mushunemi oyo, abe omukhasi wase.”

¹⁸Batisheba amukobosia ali, “Bulayi, ndakhulomela khu mwami.”

¹⁹Nio Batisheba acha khu mwami khulomaloma ne naye kamakhuwa ka Atonicha. Omwami enyokha khukhwakaanila maayi wewe mala amwinamila. Nio Solomoni ekhala khu ndebe yewe eye bubwami, mala arumania bareera endebe mu kari mala Batisheba amwikhala amukhono kumuseecha.

²⁰Batisheba aloma ali, “Ese ndikho khureeba unjeete sisiindu sikeekhe siri, nosiima okhaloba khu khuukholela tawe.” Omwami amukobosia ali, “Loma nisio wenya maayi. Se ndaloba khu khukholela tawe.”

²¹Batisheba aloma ali, “Lekha Abishaki, Omushunemi, aebwe khu wandaayo Atonicha abe omukhasi wewe.”

²²Omwami Solomoni areeba maawe ali, “Sikila siina ne undeeba emuelesie Abishaki. Murebere ne bubwami bwosi. Sikila ali wandaayase omukhulu, ne Abiatari omusaayi ne Yoabu, okhwa Seruya bali lubeka lwewe!”

²³Nio omwami Solomoni echuba mu lisina lia Wele Omuyali Owa Bioosi ali, “Wele akhoya amba kumunaanio ne ekhakhola Atonicha aruunga ne bulamu bwewe khulwe khureeba lino tawe!

²⁴Nono nga Wele Omunyali Owa Bioosi ne amenyile mindali, ambandalasie ese ne khu khunjikhasia khu ndebe eye bubwami eya paapa wase Daudi, nende be enju yase nga aalaka, Atonicha aleerwa endaalo eya luno.”

²⁵Nio omwami Solomoni aruma Benaya okhwa Yehoyata mala Benaya acha eera Atonicha.

²⁶ Nio omwami Solomoni aboolela Abiatari omusaayi ali, “Cha Anatoti engo wowo. Wolaana khufwa ne se ndakhwira siise sino tawe, sikila wasuta Lisanduku lie ndakaano oyo Mwami WELE mu ndaalo cha paapa wase Daudi. Lundi wasaanga ne naye mu butinyu bwewe bwoosi.”

²⁷ Nio Solomoni aoona Abiatari mu khuba omusaayi owa Wele Omunyali Owa Bioosi. Khwako akhola kaba ng'ali niko Wele Omunyali Owa Bioosi aaloma mu Shilo khuloondekhana khu musaayi Eli ne nju yewe.

²⁸Nga Yoabu ne aaulila kakaba ne kekholeekhe, aria. Aaba ayeetile Atonicha ne se ayeeta Abusolomu tawe. Nio elukha acha akhamara chinjika cha alutare.

²⁹Omwami Solomoni aulila bali Yoabu elukhiile mu Liiema lia Wele Omunyali Owa Bioosi mala ali a alutare. Solomoni aruma Benaya okhwa Yehoyata khu Yoabu ache amwire.

³⁰Benaya acha e Liiema lia Wele Omunyali Owa Bioosi mala aboolela Yoabu ali, “omwami alaka ali, rura khubweene okhwo.” Yoabu amukobosia ali, “Tawe ese ndafwila ano.” Benaya akobola khu mwami mala amuboolela niko Yoabu aaba ne alomile.

³¹Solomoni amukobosia ali, “Khola niko Yoabu alikho aloma. Mwire mala omusiikhe. Nio ese namwe okundi yesi yesi khu be lisaaye lia Daudi khurusibwekho sifuki sie babaandu bakhali ne kumusaango tawe nibo Yoabu eera.

³²Wele Omunyali Owa Bioosi acha khuruunga Yoabu khulwe sifuki nisio aachukha, paapa wase Daudi ne akhamanya tawe. Sikila Yoabu eera babaandu babili baluungi lundi balayi khumukhila niye. Baba Abuneri okhwa Neri komanda owe banamae ba Isiraeli, ne Amasa okhwa Yeteri, komanda owe banamae ba Yuda.

³³Nono sifuki siabwe siliba khu Yoabu ne khu lisaaye liewe mindali na mindali. Ne kumuleembe kulibao khu Daudi nende be lisaaye liewe, ne enju yewe ne khu bwami bwewe, kumuleembe kulibao khukhwama khu Wele Omunyali Owa Bioosi mindali.”

³⁴Nio Benaya okhwa Yehoyata acha eera Yoabu. Yoabu asiikhwa mungo mwewe mu sichiimi.

³⁵Omwami akhola Benaya okhwa Yehoyata aaba omukhulu owe banamae mu bweyaangu bwa Yoabu, ne ara Satoki omusaayi mu bweyaangu bwa Abiatari.

³⁶Nio omwami arumania alaanga Shimei mala amuboolela ali, “Yombakha enju yowo mu Yerusalemu. Omenyemo ne okharura mu lukoba wachaakho abuundu osi osi tawe.

³⁷Sikila endaalo niyo olirurira, mala wambukhe khakheechi kha Kiduroni manya ng'ali oli ocha khufwa.”

³⁸Shimei amukobosia ali, “Nilio oloma lilayi, omwami wase nga ne olomile nja khukhola ndio.” Nio Shimei amenya mu Yerusalemu khulwe siise sileeyi.

³⁹Ne kakhali, enyuma we kimiiko kitaru, nasioobi babili khu nasioobi ba Shimei belukha bacha owa Akishi okhwa Maaka omwami owe Katihi. Nga Shimei ne aaulila ali bakholi bewe bali mu Katihi,

⁴⁰aniina khu punda yewe mala acha Katihi khu Akishi khuyiima nasioobi bewe. Abanyoola mala abakobosia engo.

⁴¹Solomoni aulila ali Shimei achiile khukhwama

⁴²Yerusalemu khukhwola Katihi ne khukobola. Arumania amulaanga mala amureeba ali, “Ese se nakhukhola wechuba mu lisina lia Wele Omunyali Owa Bioosi lundi nakhukaania burafu ndi okharurakho mu Yerusalemu tawe? Nakhuboolela ndi ng'ali waaba ne orura wacha abuundu osi osi okhafwe. Ewe wamboolela oli, ‘Nilio oloma lilayi, nariire.’

⁴³Siina sikila ewe nono ne okhaliindile sisiechubo sioosi khu Wele Omunyali Owa Bioosi ne lilaka nilio ese nakhuelesia?”

⁴⁴Omwami lundi aboolela Shimei ali, “Ewe omanyile bulayi bwene kamamayaanu koosi niko wakholela paapa wase Daudi. Nono Wele Omunyali Owa Bioosi alakhukobosela bumayaanu bwowo wamwene.

⁴⁵Ne kakhali alabiita chikhabi omwami Solomoni, ne bubwami bwa Daudi bucha khuluma ebweeni wa Wele Omunyali Owa Bioosi mindali.”

⁴⁶Nio omwami alaka Benaya okhwa Yehoyata, mala acha eera Shimei. Nio bubwami bwemisibwa mu bunyali bwa Solomoni.