Read lubukusu 1 Bab. 21 Bible Online

1 Bab. 21 - lubukusu bible

1 Bab. 21

¹Nono Naboti Omuyesireeli aba ne liruuti lie kimisabibu embi ne lichipi lio mwami Ahabu, owa Samaria.

²Endaalo ndala Ahabu aboolela Naboti ali, “Mbe ese liruuti liowo lie kimisabibu libe nga kumukuunda kwe chinyenyi sikila lili simbi ne lichipi liase. Ndakhua kamaloba kamalayi khukhila kano namwe ne wenya khuruunge chirupia.”

³Ne kakhali Naboti akobosia Ahabu ali, “Wele Omunyali Owa Bioosi akhiingilile khukhua kumukabwa kwe bakuuka base.”

⁴Ahabu akobola mu lichipi liewe ne asinyiikhe ne khukhalala lukali khu niko Naboti Omuyesireeli aba ne amuboleele. Akona khu sitaanda siewe, aloleelela khwisiisi mala khulia tawe.

⁵Ne kakhali omukhasi wewe Yesebeli amureeba ali, “Siina sikila ne okhalaale lukali mala se olikho olia siakhulia tawe?”

⁶Akobosia ali, “Sikila niko Naboti Omuyesireeli amboleele. Nenyile ngule liruuti liewe, namwe aaba ne akana mue kamaloba kakaandi nga kameenako. Ne kakhali alobile.”

⁷Yesebeli akobosia ali, “Ewe se oli omwami owa Isiraeli? Inyokha, olie mala kumwoyo kwowo kusangaale. Ese ndakhua liruuti lia Naboti!”

⁸Nio Yesebeli aandika chibarwa mu lisina lia Ahabu. Achimaalilila kumuuri kwa Ahabu mala achirumira basaakhulu ne babaandu be efuma ba baamenya ne Naboti mu lukoba lwewe.

⁹Chibarwa chaandikwa chiri, “Raao endaalo eye khusila khulia. Laanga babaandu alala mala mue Naboti abuundu e lukoosi.

¹⁰Bukula babaandu babili be kunywanywa bekhale embi ne Naboti baloleelelane ne naye balome bali, ‘Khumuulile ne alaama Wele no mwami.’ Nio mumurusie enje we lukoba mala mumuupe kamabaale afwe.”

¹¹Nio babaandu be lukoba lwa Naboti ne basaakhulu ne babaandu be efuma ba baamenya mu Yesireeli bakhola niko Yesebeli aba ne alomile mu barwa nicho abarumiira.

¹²Baraao endaalo eye khusila khulia. Balaanga babaandu alala mala bekhasia Naboti abuundu e lukoosi.

¹³Be kunywanywa babili abo bachongela Naboti ebweeni we babaandu bali, “Khumuulile ne alikho alaama Wele no mwami.” Khwako bamurusia enje we lukoba mala bamupa kamabaale afwa.

¹⁴Barumania burume khu Yesebeli bali, “Naboti afwiile.”

¹⁵Nga Yesebeli ne aulila busa ali, Naboti bamupile kamabaale afwiile, aboolela Ahabu ali, “Naboti wafwiile. Yinyokha oche obukule liruuti nilio aloba khukhukusia libe liliowo.”

¹⁶Nga Ahabu ne aulila busa ari, ali Naboti afwiile, acha abukula liruuti elio liaba liliewe.

¹⁷Elomo eya Wele Omunyali Owa Bioosi yecha khu Elicha omutishibe eli,

¹⁸“Yinyokha oche khu Ahabu omwami owa Isiraeli oli e Samaria. Olamunyoola mu liruuti lia walimusaani Naboti nilio achiile khubukula libe liliewe.

¹⁹ Muboolele oli Ese Wele Omunyali Owa Bioosi, ndoma ndi, ‘Werire Naboti ne khubukula liruuti liewe. Abuundu niio chimbwa chakhoombela kamafuki ka Naboti chikhakhombeleo ne kakowo koosi.’ ”

²⁰Nga Ahabu ne abona Elicha aloma ali, “Wanyoolile, musiku wase?” Elicha akobosia ali, “Yee, nakhunyoolile.” Ewe wekusiisie khukhola kali kamamayaanu ebweeni wa Wele Omunyali Owa Bioosi.

²¹Nono Wele Omunyali Owa Bioosi aloma ali, “Ndakhureerera libuna. Ndakhwinyosiao elala mala niire buli mundu owe siseecha munju yowo, baboe ne balekhuule sitube.

²²Be enju yowo balaba nga be enju eyo mwami Yeroboamu okhwa Nebati. Lundi baliba nga be enju eyo mwami Baasha okhwa Ahiya. Sikila lirima nilio umbambiisie ne khukhola Isiraeli yakhola bumayaanu.

²³ Ne khu Yesebeli Wele Omunyali Owa Bioosi aloma ali, ‘Chimbwa chililiila Yesebeli munjakha che lukoba lwa Yesireeli.’

²⁴Omulebe owa Ahabu yesi yesi ofwiila mu lukoba, chimbwa chilimulia. Ne yesi yesi ofwiila mu lukoongo, chinyuni chilimulia.”

²⁵(Se abao omundu yesi yesi owekusia khukhola kamamayaanu ebweeni wa Wele Omunyali Owa Bioosi nga Ahabu tawe, niye omukhasi wewe Yesebeli aachilisia.

²⁶Akhola kasinyisia lukali mu khwisaaya bifwaani, nga Baamori ne baba ne bakhola, nibo Wele Omunyali Owa Bioosi atimania mu sibala nisio Baisiraeli baba ne bengisia.)

²⁷Nga Ahabu ne aulila kamakhuwa ako, atabula chingubo chewe, afwara kamakunia. Asila khulia, akona mu makunia, lundi akeenda ne asuluunye.

²⁸Nio elomo eya Wele Omunyali Owa Bioosi yecha khu Elicha Omutishibe eli,

²⁹“Waboone nga Ahabu ne eboombiisie ebweeni wase? Sikila omwene eboombiisie ebweeni wase, se nja khureera libuna mu siise siewe tawe. Ne kakhali nja khureera libuna mu siise sio musoleeli wewe khu nju eya Ahabu.”