Read lubukusu 1 Bab. 22 Bible Online

1 Bab. 22 - lubukusu bible

1 Bab. 22

¹Kumuleembe kwabao akari wa Isiraeli ne Shamu khu miiko kitaru.

²Mu mwiiko kukhola khataru omwami Yehoshafati owa Yuda acha khubona omwami Ahabu owa Isiraeli.

³Ahabu areeba bakholi bewe ali, “Mumanyile muli lukoba lwa Ramoti-kileati lukhoyeele lube lulwefwe mala efwe khwasila busa, mala se khwalubukula khukhwama khu mwami owa Shamu tawe?”

⁴Ne Ahabu areeba Yehoshafati ali, “Onyala wacha ne nase mwiie e Ramoti-kileati?” Yehoshafati akobosia ali, “Ese ndi nga ewe, babaandu base bali nga babowo, chifarasi chase chili nga chichowo.”

⁵Yehoshafati aloma ali, “Khekhunyoe khureebe Wele Omunyali Owa Bioosi nio.”

⁶Nio Ahabu alaanga bang'oosi alala, embi chimia chine mala abareeba ali, “Nje nibwaakale Ramoti-kileati namwe tawe?” Bamukobosia bali, “Cha osibwaakale, sikila Wele Omunyali Owa Bioosi alakhua bukhili.”

⁷Ne kakhali Yehoshafati areeba ali, “Omung'oosi se alikhoo ano okundi niye khunyala khwabirirakho khwareeba Wele Omunyali Owa Bioosi tawe?”

⁸Ahabu amukobosia ali, “Aliio mulala oramire, bali niye khunyala khwareeba Mikaya okhwa Imura. Ne kakhali ese namubiila, sikila se ang'oolelanga kamalayi tawe, ne kakhali kamabi.” Yehoshafati amukobosia ali, “Okhaloma orio tawe.”

⁹Nio Ahabu alaanga mulala khu bemeelesi be lichipi lio mwami mala amuboolela ali, “Ndeerere khangu Mikaya okhwa Imura.”

¹⁰Nono Yehoshafati ne Ahabu baba bekhaale khu ndebe che bubwami, ne bafwarire chingubo che bubwami, abuundu niio baulila, a silibwa sia Samaria. Ne bang'oosi boosi baba balikho bang'oola ebweeni waabwe.

¹¹Nio Sedekia okhwa Kenaana, mulala khu nibo, ekholela chinjika che bichuuma mala aloma ali, “Wele Omunyali Owa Bioosi aloma ali, ‘Ne chinjika chino olapila Bashamu khukhwola nga ne obaulila elala.’ ”

¹²Ne bang'oosi babaandi boosi bang'oola bario. Baloma bali, “Cha e Ramoti-kileati mala okhile. Wele Omunyali Owa Bioosi alakhukhola obaule.”

¹³Omurumwa owacha khureera Mikaya amuboolela ali, “Lola bang'oosi babaandi boosi bang'oolile bulayi khu mwami. Lekha lilomaloma liowo libe nga liliabwe.”

¹⁴Ne Mikaya akobosia ali, “Nga Wele Omunyali Owa Bioosi ne amenyile mindali, nilio Wele Omunyali Owa Bioosi amboolela lili nilio ndaloma.”

¹⁵Nga ne acha ebweeni wo mwami Ahabu, omwami amureeba ali, “Mikaya, khunyala khwacha khwebwakaala Ramoti-kileati namwe tawe?” Mikaya akobosia ali, “Cha wibwaakale mala okhile. Wele Omunyali Owa Bioosi alakhukhola oule.”

¹⁶Ne kakhali areeba Ahabu ali, “Ndikhuboolela khukhwola khenga ndi umbolele bung'ali bwong'ene mu lisina lia Wele Omunyali Owa Bioosi?”

¹⁷ Mikaya akobosia ali, “Mboone Isiraeli yoosi yasalaniile khu bikulu nga kamakheese kakhali no mwaayi tawe. Ne Wele Omunyali Owa Bioosi aloma ali, ‘Babaandu bano se bali no mwimeelesi tawe, lekha buli mulala ache engo wewe mu muleembe.’ ”

¹⁸Ahabu aboolela Yehoshafati ali, “Ese se khuboolele ndi se anyala ang'oolela kamalayi tawe ne kakhali kamabi!”

¹⁹ Mikaya achiililila ali, “Nono rekeeresia elomo eya Wele Omunyali Owa Bioosi: Naboone Wele Omunyali Owa Bioosi ekhaale khu ndebe yeewe eye bubwami ne banamae bewe boosi bamwimileo a mukhono kumuseecha ne kumukhasi.

²⁰Wele Omunyali Owa Bioosi areeba ali, ‘Naanu onyala aombelesia Ahabu nio ache mala ererwe e Ramoti-kileati?’ Mulala aloma sisiindu silala, ne okundi aloma sisiindi.

²¹Nio eroho ndala yecha yema ebweeni wa Wele Omunyali Owa Bioosi yaloma eli, ‘Ese ndamuombelesia.’

²²Wele Omunyali Owa Bioosi akireeba ali, ‘Olamubea oriena?’ Eroho eyo yakobosia eli, ‘Ese ndacha mala mbe omubeeyi khubirira khu bang'oosi ba Ahabu boosi.’ Wele Omunyali Owa Bioosi aloma ali, ‘Cha omuombelesie ne olaba ne bukhili. Cha mala okhole orio.’ ”

²³Mikaya achiililila ali, “Nono Wele Omunyali Owa Bioosi areere roho owe bubeeyi mu bang'oosi bowo bano boosi. Ne Wele aboolile kamabi khwiwe.”

²⁴Nio Omung'oosi Sedekia okhwa Kenaana acha khu Mikaya amupa luui mala amureeba ali, “Roho owa Wele Omunyali Owa Bioosi acha ariena khukhwama khwise alomaloma ne nawe?”

²⁵Mikaya amukobosia ali, “Olimanya endaalo niio olicha khukhwikisa mu lusiro lwe akari.”

²⁶Ne omwami Ahabu aloma ali, “Amba Mikaya mala mumukobosie khu Amoni, omwimeelesi owe lukoba ne khu Yoashi omusoleeli wo omwami.

²⁷Mulome muli, ‘omwami aloma ali: Ra omundu yuno mu siboe mala mumulisie siakhulia sitiiti ne kameechi, khukhwola nga ne engobola mu muleembe.’ ”

²⁸Mikaya aloma ali, “Kaaba bali okobola mu muleembe aba Wele Omunyali Owa Bioosi se alomaloma khubirira khwise tawe.” Mala atasakho ali, “Ulila, enywe baandu mwesi.”

²⁹Nio omwami Ahabu owa Isiraeli no mwami Yehoshafati owa Yuda barekukha bacha e Ramoti-kileati.

³⁰Ahabu aboolela Yehoshafati ali, “Ese ndekosaasia fwaane omundu okundi nio nje mwiie. Ne ewe ifwara chingubo chowo che bubwami.” Nio omwami owa Isiraeli engila mwiie ne ekosiaasiisie.

³¹Omwami owa Shamu aba alakile banamae bewe kamakhumi kataru na babili be khu makaari ke liie ali, “Mukhebwaakalakho omundu yesi yesi tawe ne akhali omwami owa Isiraeli yeng'ene.”

³²Nio nga ne babona omwami Yehoshafati, boosi bebaasia bali ali omwami owa Isiraeli. Bayuukha bamwibwaakala. Yehoshafati alila.

³³Nga banamae kamakhumi kataru na babili abo bamanya bali se ali omwami owe Isiraeli tawe balekha khumutimania.

³⁴Ne kakhali omunamae mulala akhweesa buyiingo bwewe embi ne omwami owa Isiraeli mala amulasa akari we bubwongelo bwe chingubo chewe che liie. Omwami Ahabu aboolela owatimianga likaari liewe ali, “Yuukha, mala undusie mwiie sikila bandasile.”

³⁵Liie liaba liamemee endaalo ng'ene eyo. Omwami Ahabu arama ne akalamiliile mu likaari liewe, aloleleele Bashamu. Oli yola akolooba afwa. Kamafuki khukhwama niio bamulasa keekha koola asi we likaari liewe lie liie.

³⁶Oli enyanga echa khukwa, lilaka liarura liacha mu banamae ba Isiraeli lili, “buli mundu akobole mu lukoba lwewe ne mu sibala siewe.”

³⁷Nio omwami Ahabu afwa mala bamusuta bamureera e Samaria mala bamusiikha.

³⁸Basiinga likaari liewe mu litiisi lia Samaria, niio chimbwa chakhoomba kamafuki kewe mala bakhasi baeyani besiinga mu litiisi elio khuloondekhana ne elomo eya Wele Omunyali Owa Bioosi niyo aloma.

³⁹Nono bikholwa bibiindi bioosi nibio omwami Ahabu akhola, alala ne lichipi liewe lie kimisaanga, ne chingoba choosi nicho ombakha, biaandikwa mu sitabu sie chingano che Babaami ba Isiraeli.

⁴⁰Nio Ahabu afwa mala Ahasia omusoleeli wewe amiia mu bweyaangu bwewe.

⁴¹Yehoshafati okhwa Asa arakikha khukhwaamiia Yuda mu mwiiko kwa khane kwe mu bwami bwa Ahabu omwami owa Isiraeli.

⁴²Yehoshafati aba bukhulu bwe kimiiko kamakhumi kataru ne kiraano nga arakikha khukhwaamiia. Amiia khukhwama Yerusalemu khu miiko kamakhumi kabili ne kiraano. Maayi wewe aba bali Asuba, omukhaana owa Shilihi.

⁴³Yehoshafati akeenda mu ngila choosi cha raraawe. Se akaluukhanakho tawe. Akhola kali kamalayi ebweeni wa Wele Omunyali Owa Bioosi. Ne kakhali se arusiao abuundu aesuta tawe. Babaandu bachiililila khuanilao chimbosio ne khukhwosielayo bibiindu biiunya bulayi.

⁴⁴Yehoshafati yesi akhola kumuleembe no mwami owa Isiraeli.

⁴⁵Nono bikholwa bioosi nibio Yehoshafati akhola, kamaani kewe niko okesia, ne kamae keewe niko apana, biaandikwa mu Sitabu sie chingano che Babaami ba Yuda.

⁴⁶Enyosiao balaaya be siseecha boosi mu sibala babaramao khukhwama mu ndaalo cha raraawe Asa.

⁴⁷Sibala sia Edomu se siaba no mwami tawe. Siamiibwa no mwimeelesi.

⁴⁸Omwami Yehoshafati ombakha chimeeli che bubwofuli cheleele chiche e Ofiri khureera esahabu. Ne se chacha tawe sikila bibuli bie kameechi biachipila e Esioni-geberi.

⁴⁹Nio omwami Ahasia okhwa Ahabu aboolela Yehoshafati ali, “Lekha bakholi base bache mu meeli ne bakholi bowo.” Ne kakhali Yehoshafati se enya tawe.

⁵⁰Yehoshafati afwa mala asiikhwa mu biliindwa bie bakuuka bewe mu Lukoba lwa Daudi. Ne Yehoramu omusoleeli wewe amiia mu bweyaangu bwewe.

⁵¹Ahasia okhwa Ahabu arakikha khukhwaamiia Isiraeli khukhwama Samaria mu mwiiko kwe ekhumi ne saba kwe bubwami bwa Yehoshafati, omwami owa Yuda. Amiia Samaria khu miiko kibili.

⁵²Akhola kakaba kamamayaanu ebweeni wa Wele Omunyali Owa Bioosi. Akhola bumayaanu nga raraawe Ahabu ne maawe Yesebeli. Lundi akhola nga omwami Yeroboamu okhwa Nebati, owakhola Isiraeli yakhola kamamayaanu.

⁵³Ahasia akholela ne khukhwisaaya Baali. Aambia Wele Omunyali Owa Bioosi, Wele owa Isiraeli lirima buli mu siindu nga raraawe ne akhola.