Read lubukusu 1 Bab. 4 Bible Online

1 Bab. 4 - lubukusu bible

1 Bab. 4

¹Solomoni aba omwami owa Isiraeli yoosi.

²Ne bano nibo ba baaba babemeelesi bewe be angaaki: Omusaayi aba Asaria okhwa Satoki.

³Baandiki baaba Elihorefu ne Ahiya, bakhwa Shisha. Omubiikhi owe kamaandiko ako aaba Yehoshafati okhwa Ahiludi.

⁴Omukhulu owe banamae aaba Benaya okhwa Yehoyata. Basaayi baaba Satoki ne Abiatari.

⁵Omukhulu owe babemeelesi aaba Asaria okhwa Nasani. Sabuti okhwa Nasani aaba omusaayi lundi omusaale owo Mwami.

⁶Omukhulu owe bakholi be mu lichipi aaba Ahishari, ne omukhulu owemeelela kimilimo kie khuyingilila aaba Atoniramu okhwa Abuta.

⁷Solomoni aba ne babemeelesi ekhumi na babili khu Isiraeli yoosi babarereranga omwami nende be nju yewe biakhulia. Buli mulala areeranga biakhulia kumwesi mulala mu mwiiko.

⁸Kano niko kamasina kabwe: Benihuri: owe Sibala sie lukulu sia Efuraimu,

⁹Bendekeri owe e Makasi, Shalibimu, Beti-shemesi, ne Elani-beti-hanani.

¹⁰Beniheseti owe Aruboti ne Soko ne sibala sioosi sia Heferi.

¹¹Beni-abinatabu owe Nafati (areera omukhaana owa Solomoni bali Tafati)

¹²Baana okhwa Ahiludi owe Taanachi, Mekido ne Beti-sheani eli embi Saretani emwaalo owa Yesireeli, ne khukhwama Beti-sheani khukhwola Abeli-mehola khucha khukhwola Yokimeamu.

¹³Bangeberi owe Ramoti-kileati, aba ne birekere bia Yairi, okhwa Manase biili mu Kileati lundi aaba ne lukoongo lwa Arikobu mu Bashani. Chabamo chingoba kamakhumi sita chimboofu chisire ne bilibwa bie kumukasa.

¹⁴Ahinatabu okhwa Ito owe Mahanaimu.

¹⁵Ahimaasi, owe Nafutali (areera Basemati omukhaana owa Solomoni)

¹⁶Baana okhwa Hushai owa Asheri ne Bealoti.

¹⁷Yehoshafati okhwa Parua owa Isakari,

¹⁸Shimei okhwa Ela owe e Benjamini.

¹⁹Keberi okhwa Uri owe lukoongo lwa Kileati nilwo omwami Sihoni owe Baamori no mwami Oku owe Bashani bamiia. Ne abao omuruki mulala mu sibala sia Yuda.

²⁰Babaandu be Buyuda baba bakali nga kumuyekhe. Balia ne banywa mala ne basangaala.

²¹ Solomoni amiia khu bwami bwoosi khukhwama khu luuchi lwa Efurati khukhwola khu sibala sie Bafilisiti ne lulwaakha lwa Misiri. Bibala bino biareraanga kumuruungo nikwo Solomoni enyanga mala biakholela Solomoni mu limenya liewe lioosi.

²²Biakhulia nibio Solomoni enyanga khu ndaalo ndala biaba, chindubi emia ndala ne kamakhumi karaano che bufu, siakhulia chindubi chimia chitaru,

²³chikhaafu chinefu ekhumi chichalisibwa biakhulia mungo ne chikhaafu kamakhumi kabili che mumayilwe enje, kamakheese emia, ne khutasakho chikhulo, bikicheu, chimboongo ne chingokho.

²⁴Solomoni amiia khu bibala bioosi mumbo mwe luluuchi lwa Efurati khukhwama Tifusa khukhwola Kasa. Aba ne kumuleembe chimbeka choosi chichabotookhelela sibala siewe.

²⁵Mu bulamu bwa Solomoni bwoosi, babaandu be Buyuda bamenya mu muleembe khukhwama Dani khukhwola Beerisheba. Buli mundu aaba ne kimisabibu ne kimituli kiewe.

²⁶ Solomoni aba ne kamataala chielefu kamakhumi kane ke chifarasi ne banamae be khu farasi chielefu ekhumi na chibili.

²⁷Babemeelesi be khureera biakhulia bie lichipi lio mwami Solomoni, buli mulala khu mwesi kwewe, bareera buli sisienyekhana.

²⁸Bareeranga akhaba eshayiri ne bunyaasi bwe chifarasi ne bibiaayo bie kimilimo, niio bienyekhana. Buli mundu areeranga khuloondekhana nga enyekhana.

²⁹Wele aelesia Solomoni bukesi ne limanya likali. Bukesi bwewe bwaba bukali, bukhanyala bwakelwa tawe nga kumuyekhe.

³⁰Nio bukesi bwa Solomoni bwakhila bukesi bwe babaandu boosi be ebukwe ne bukesi bwoosi bwe Misiri.

³¹ Aba omukesi khukhila babaandu babaandi boosi. Aba omukesi khukhila Etani omuesra ne Hemani, Kalikoli, ne Darida bakhwa Maholi. Amanyikhana mu bibala bioosi bibiabotookhelela bubwami bwewe.

³² Omwami Solomoni aboola chisimo chielefu chitaru. Chinyimbo chewe chaba eelefu ndala ne chiraano.

³³Ekesia khu bimelwa bioosi khukhwama khu mirongooro kimitarakwa kimiboofu kia Lebanoni khukhwola khu nyoonyi ekhulaanga mu masiisi. Ekesia lundi khu saang'i, chinyuni, bimoola ne ching'eeni.

³⁴Babaandu bamaanga mu bibala bioosi khurekeeresia ke bukesi bwa Solomoni. Babaami boosi be khu liloba ba baaba ne baulila bukesi bwa Solomoni barumaanga babaandu khu niye.