Read lubukusu 1 Bab. 5 Bible Online

1 Bab. 5 - lubukusu bible

1 Bab. 5

¹Nono omwami Hiramu owe Tiro aruma bakholi bewe khu Solomoni, nga ne aulila ali baakhile Solomoni kamafura abe omwami mu bweyaangu bwa raraawe. Hiramu yaba buli lwosi asiima Daudi.

²Solomoni akobosia burume bwewe khu Hiramu ali,

³“Ewe omanyile oli paapa wase Daudi se aanyala khukhwombakhila Wele Omunyali Owa Bioosi Wele wewe enju tawe, sikila liie nilio apana ne basiku bewe babamubotookhelela. Apana khukhwola nga Wele Omunyali Owa Bioosi ne ara basiku bewe asi wewe.

⁴Ne kakhali luno Wele Omunyali Owa Bioosi, Wele wase ambeele kumuleembe khu mbeka choosi che bubwami bwase. Luno sendi ne basiku tawe. Ne mbao busiku khu baandu base tawe.

⁵ Nono nenya khukhwombakhila Wele Omunyali Owa Bioosi, Wele wase enju eye khusaayilamo nga Wele Omunyali Owa Bioosi ne aaboolela paapa wase Daudi. Amuboolela ali, ‘Omwana wowo, niye ekhekhasie khu ndebe yowo eye bubwami mu bweyaangu bwowo, niye okhanjombakhile ese enju.’

⁶Nono rumania bandemere kimirongooro kimitarakwa kie e Lebanoni. Bakholi base bakhakhole kimilimo ne bakholi bowo. Ekharuunge bakholi bowo siosi siosi nisio kane ewe okhalake. Nga nilwo omanyile babaandu base se bamanyile khurema kimirongooro bulayi nga Basidoni tawe.”

⁷Hiramu nga aulila kamakhuwa ka Solomoni, ekhoya lukali mala aloma ali, “Wele Omunyali Owa Bioosi afume endaalo eya luno, oeleesie Daudi omwana omukesi amiie sibala siboofu esio.”

⁸Nio Hiramu arumania khu Solomoni ne aloma ali, “Ese nanyoolile burume bwowo mala nerekeekhe khukhola niko wenya. Ndakhua kimitarakwa, ne Saipurasi.

⁹Bakholi base bacha khwikhisia kimirongooro khukhwama e Lebanoni khukhwola khu nyanja eya Mediterenia. Mala ekhakiboe alala mu bituuli kikelakele kiikhe kiole abuundu niio ewe orobora. Abwenao bakholi base bakhakiasakileo mala okinyoole. Ne ese nenya ewe oeleesie be enju yase siakhulia nga kumuruungo.”

¹⁰Nio Hiramu aelesia Solomoni kimirongooro kimitarakwa ne Saipurasi kioosi nikio enya.

¹¹Mala Solomoni aelesia Hiramu engaanu chindubi chielefu kamakhumi kabili nga siakhulia sie enju yewe, ne kamafura ke kimiseituni chinyuungu chielefu kamakhumi kabili. Solomoni aaelesia Hiramu bibiindu bino buli mwiiko.

¹²Wele Omunyali Owa Bioosi aaelesia Solomoni bukesi nga nilwo aba ne amulaka. Kumuleembe kwaba akari wa Hiramu ne Solomoni mala boombi bakhola endakaano.

¹³Omwami Solomoni ayiima babaandu chielefu kamakhumi kataru, khukhwama mu Isiraeli yoosi bakhola kimilimo kie khuyingiililwa.

¹⁴ Mala abaruma e Lebanoni. Abakaba mu bipupu bitaru bie babaandu chielefu ekhumi. Buli sipupu siamenya mu Lebanoni kumwesi mulala, ne bakobola ne bamenya engo kimieesi kibili. Adoniramu aba omwimeelesi wabwe.

¹⁵Solomoni aaba lundi ne babaandu chielefu kamakhumi munane mu sibala sie lukulu babeechi be kamabaale ne babaandu chielefu kamakhumi saba babakasuta.

¹⁶Khutasa khwabo, babao babemeelesi babaandu chielefu chitaru ne chimia chitaru khukhwimeelela kimilimo nikio bakholaanga.

¹⁷Omwami Solomoni abalaka khubeecha kamabaale kamaboofu ke bukusi bwe angaaki kabe kumusiingi kwe Lukaangu.

¹⁸Nio babombakhi ba Solomoni ne Hiramu, ne babaandu ba Kebali babeecha kamabaale ne khukhola kimirongooro kie khukhwombakhila Lukaangu.