Read lubukusu 1 Bab. 6 Bible Online

1 Bab. 6 - lubukusu bible

1 Bab. 6

¹Solomoni arakikha khukhwombakha Lukaangu lwa Wele Omunyali Owa Bioosi kimiiko chimia chine ne kamakhumi munane enyuma we Baisiraeli khurura mu Misiri. Okwo kwaba kumwiiko kwe khaane kwe bubwami bwa Solomoni khu Isiraeli. Kwaba kumwesi kwe khabili kulaangwa Sifu.

²Enju niyo Solomoni ombakhila Wele Omunyali Owa Bioosi yaba bikele kamakhumi sita buleeyi, bukhiikha bikele kamakhumi kabili ne buniina bifuba kamakhumi kataru.

³Ne lusiro lwe khukhwingilila mukari lwaba bikele kamakhumi kabili buleeyi. Lwalekhaana ne bukhiikha bwe enju. Khucha asi yaba bikele ekhumi ebweeni we enju.

⁴Lukaangu lwaba ne kamatirisia kakekulwaangwa ne khukhwikalwa.

⁵Lundi ombakha enju yetiila khu lisiisi chimbeka ne enyuma we Lukaangu. Enju yino yaba chikorofa chitaru.

⁶Chisiro che asi chaba bikele biraano bubalaayi, ne che ekorofa eye akari chaba bikele sita bubalaayi. Ekorofa ekhola khataru yaba ne chisiro che bubalaayi bikele saba. Lisiisi lie Lukaangu liliakhola buli khu bwelu liaba linyelele khukhilakho lie lisiisi lie lusiro lwe asi khu nilio. Chisiro chino chaseendwa khwisiisi lie Lukaangu ne kakhali bisiindi biacho se biombakhwa mwisiisi lino tawe ne kakhali bietilakho.

⁷Enju yombakhwa ne kamabaale kakabechelwa elala niio kaama. Nio luyoka lwe nyundo, namwe eyaywa namwe sisiindu siosi siosi sie sichuuma se lwauliilikhanakho mu Lukaangu nga lwaba ne lwombakhwa tawe.

⁸Silibwa sie khukhwingila mu korofa eye asi[4] siaba lubeka lwe ebunafubo we Lukaangu, ne chingaasi chaniina mu korofa eya khabili ne eya khataru.

⁹Nono omwami Solomoni amala khukhwombakha Lukaangu. Aruramo sisekese sisiakholwa ne bisiindi ne chimbao che kimitarakwa.

¹⁰Solomoni ombakha chisiro khu nju yoosi. Buli lusiro[5] lwaba bifuba biraano khucha buniina. Chisiro chino chaambaasibwa khu nju ne kimitarakwa.

¹¹Nono elomo eya Wele Omunyali Owa Bioosi yecha khu Solomoni eli,

¹²“Waaba ne oria kamalaka kase koosi, ndikhukholela niko nalaka paapa wowo Daudi.

¹³Nja khumenya akari we babaandu base Baisiraeli. Ne se nja khubalekha tawe.”

¹⁴Nono Solomoni amala khukhwombakha Lukaangu.

¹⁵Kamasiisi ke mukari kafuunikhwa ne chimbao che kumutarakwa, khukhwama a mukhe khukhwola mu sisekese sie enju. Ne amukhe afuunikhwa ne chimbao cha Saipurasi.

¹⁶ Lusiro lwe mukari, lulaangwa bali Abuundu Atakatifu Lukali. Alukhala enyuma mukari mwe Lukaangu. Lwaba buleeyi bikele kamakhumi kabili mala lwakhalwamo lusiro lwe chimbao che kumutarakwa khukhwama amukhe chola khu lisiisi.

¹⁷Lusiro lwe ebweeni we Abuundu Atakatifu Lukali, lwaba buleeyi bwe bikele kamakhumi kane.

¹⁸Bipichu bie chimbao che kimitarakwa kie mukari mwe enju biabeechwa mu sifwaani sie chimuka ne bimuli. Mukari mwoosi mwafuunikhwa ne chimbao che kumutarakwa. Ne libaale liosi liosi se liabonekhakho tawe.

¹⁹Lusiro lwe mukari alukhala enyuma mu Lukaangu, khuraayo Lisanduku lie Ndakaano eya Wele Omunyali Owa Bioosi.

²⁰Lusiro lwe mukari luno lwaba buleeyi bikele kamakhumi kabili, bukhiikha bikele kamakhumi kabili ne buniina bifuba kamakhumi kabili. Lusiro luno alufuunikha ne esahabu endayi. Lundi akhola alutare eye kumutarakwa.

²¹Solomoni afuunikha mukari mwe Lukaangu ne esahabu. Ara kiminyololo kie esahabu bukhiikha a muliango kwe lusiro lwe Abuundu Atakatifu Lukali. Lusiro lwoosi alufuunikha ne esahabu.

²² Afuunikha mukari mwe Lukaangu lwoosi ne esahabu, bulayi bwene nende Abuundu Atakatifu Lukali.

²³ Mukari mwe Abuundu Atakatifu Lukali, Solomoni akholamo chikerubi khukhwama khu mbao che kumuseituni. Buli ekerubi yaba buniina bwe bifuba ekhumi.

²⁴Buli lutaa lwe ekerubi lwaba bikele biraano buleeyi. Ne buleeyi bwe khukhwama emusia we lutaa lulala khukhwola emusia we lutaa luluundi, bwaba bikele ekhumi.

²⁵Chikerubi chibili echo chaba chalekhaana, lundi chafwaanana.

²⁶Buli ebira yaba bifuba, ekhumi, buniina.

²⁷Chikerubi echo chabiikhwa mu lukaangu mukari lukali. Lutaa lwe ekerubi ndala lwetiila khwisiisi lubeka lulala ne lwe ekerubi ekiindi lwetiila khu lisiisi liliindi. Chindaa chacho chichiindi chetilanakho akari we enju.

²⁸Solomoni afuunikha chikerubi echo ne esahabu.

²⁹Abeecha khu masiisi ke Lukaangu ne bifwaani bie chikerubi ne chikheendu ne bimuli mu siro che mukari ne enje.

³⁰Asi we enju afuunikha ne esahabu mu siro che mukari ne enje.

³¹Akhola chinjiki che kimiliango kicha Abuundu Atakatifu Lukali khukhwama khu museituni. Chinjiki chino chaba ne bisiindi bibiaba ne chimbeka chiraano.

³²Abeecha khu miliango kibili kie chikheendu ekio bifwaani bie chikerubi, chikheendu ne bimuli. Abifuunikha bioosi khungaaki ne esahabu.

³³Kumuliango kwe lusiro luboofu, Solomoni akukholela kimitalaachi kikiama khu lupao lwe kumuseituni.

³⁴Chinjiki chabamo chibili chimbambaane che khufuumba chichakhomwa khukhwama khu lupao lwa Saipurasi.

³⁵Khu njiki echo abeecha bifwaani bie chikerubi ne chikheendu ne bimuli. Afuunikha bioosi ne esahabu alekhaasia.

³⁶Ombakha lisiisi lie luuya lwe mukari ne kamabaale, ne kimitarakwa khu buli chilaini chitaru che kamabaale arao elaini ndala eye lupao lwe kumutarakwa.

³⁷Mu mwiiko kukhola khane kwe mu bwami bwa Solomoni kumusiingi kwe enju eya Wele Omunyali Owa Bioosi kwombakhwa. Kwaba kumwesi kwa Sifu.

³⁸Ne mu mwesi kwa munane, kulaangwa kwa Buli, mu mwiiko kukhola ekhumi na mulala kwe mu bwami bwa Solomoni, kimilimo kie khukhwombakha lukaangu kiawela elala. Lwombakhwa khuloondekhana nga lwenyekhana. Lwabukula Solomoni kimiiko saba khulwombakha.