Read lubukusu 1 Bab. 7 Bible Online

1 Bab. 7 - lubukusu bible

1 Bab. 7

¹Solomoni ombakha lichipi liewe, khu miiko ekhumi ne kitaru.

²Ombakha enju elaangwa eli enju eye kumusiru kwa Lebanoni. Buleeyi bwe enju bwaba bikele emia ndala. Ne bukhiikha bwaba bikele kamakhumi karaano ne buniina bwaba bifuba kamakhumi kataru. Mukari mwe enju eye kumusiru kwa Lebanoni[6] ombakhamo chilaini chitaru[7] che bisiindi bie kumutarakwa. Buli elaini yaba ne bisiindi ekhumi na biraano, bie kumutarakwa khu bisiindi khukhwola mu sisekese.

³Ne sisekese siaba sie chimbao che kumutarakwa. Chimbao chichaba mu sisekese chaba kamakhumi kane ne chiraano. Buli e laini yaba ne chimbao ekhumi ne chiraano.

⁴Kamatirisia kakholwa khu laini chitaru mala chaloleelelana.

⁵Kimiliango kioosi ne chinuma[8] choosi ne bubalaayi ne bukhiikha bwalekhaana. Buli enuma yaloleelela ekiindi khu laini chitaru echo.

⁶Solomoni akhola lusiro luboofu lulaangwa lwe Bisiindi. Buleeyi bwalwo bwaba bikele kamakhumi karaano. Ne bukhiikha bwalwo bwaba bikele kamakhumi kataru. Sisekese sisiaba ebweeni we enju siafuunikhwa. Siemisibwa khu bisiindi.

⁷Lundi akhola lusiro luboofu lwe Endebe eye Bubwami lulwalaangwa lundi luli lusiro luboofu lwe Bukhalaki. Ao niio Solomoni akhalakilanga kimisaango. Lwaba lwafuunikhwa ne chimbao che kimitarakwa khukhwama asi khukhwola mu sisekese.

⁸ Enju eya Solomoni niio aba ne acha khumenyamo yombakhwa nga chinju chichiindi. Yaba yombakhwa enyuma we Enju eye Bukhalaki. Solomoni lundi ombakhila omukhasi wewe enju nga eyeewe. Omukhasi oyo aaba omukhaana owa Farao owa Misiri.

⁹Chinju chino choosi chombakhwa ne kamabaale ke bukusi bwe angaaki khukhwama khu musiingi khukhwola khu sisekese. Kamabaale kano kabeechwa bulayi. Kamiusibwa chimbeka chombi ne kumusiameno. Lundi akhola ario khukhwama khu luuya lwe enju eya Wele Omunyali Owa Bioosi khukhwola khu luuya luboofu.

¹⁰Kumusiingi kwaba kwe kamabaale kamaboofu kakaba ke bukusi bwe angaaki. Kaba ke bubalaayi bwe bikele munane ne bikele ekhumi.

¹¹Khungaaki khwe kumusiingi kabakho kamabaale kakaandi kakabeechwa khuloondekhana ne bipiimo, ne chimbao che kimitarakwa.

¹²Lisiisi lie luuya luboofu lwe lichipi, liombakhwa ne kamabaale ne chimbao. Khu buli chilaini chitaru che kamabaale ombakhakho elaini ndala eye chimbao che kimitarakwa. Akhaba lusiro lwe luuya lwe enju eya Wele Omunyali Owa Bioosi ne kumuliango kucha mu nju eya Wele Omunyali Owa Bioosi bioosi biombakhwa birio.

¹³Omwami Solomoni arumania bareere omundu bali Huramu khukhwama e Tiro.

¹⁴Aba omwana owa namulekhwa owe ekholo eya Nafutali. Raraawe aaba Omutiro, omubasi owe kimikasa. Huramu aaba omukesi lundi owe limanya, omusicha mu mulimo kwe bubasi bwe kimikasa. Nio Huramu echa khu mwami Solomoni mala amukholela kimilimo kiewe kioosi kie kimikasa.

¹⁵Huramu akhola bisiindi bibili bie kumukasa. Buli silala siaba buniina bwe chimita munane. Ne nofuusia biaba ne bubalaayi bwe chimita chiraano ne chisendimita salasini.

¹⁶Lundi akhola bitumi bibili bie kumukasa. Buli silala buleeyi bwe bikele biraano. Ne abira khu ngaaki khwe bisiindi.

¹⁷Nio akhola kiminyololo kikiaboraana khu buli situumi. Kiminyololo kino kiafuunikha bitumi khungaaki khwe bisiindi.

¹⁸Lundi akhola bifwaani bie kamatuunda niko balaanga bali kamakomanga chilaini chibili. Bifwaani bino biafunikha bitumi bibiaba khu bisiindi.

¹⁹Bitumi bibiaba khungaaki khwe bisiindi biaba bie kumukasa mala biakhengwa nga bimuli. Biaba ne buleeyi bwe bikele bine.

²⁰Bitumi biaba khungaaki khwe bisiindi bibili ne aembi ne kiminyololo kikiaboraana. Abuundu bwene ao, biabaao bifwaani bie kamatuunda kamakomanga chimia chibili khu laini chibili. Biabotookhelela bitumi.

²¹Huramu asimikha bisiindi bie kumukasa bibili bino ebweeni we silibwa sie enju eya Wele Omunyali Owa Bioosi. Siteechi sie lubeka lwe ebunafubo asitiuukha ali Yakini[9], ne sie lubeka lwe ebunaswa asitiuukha ali Boasi[10].

²²Ne khungaaki khwe bisiindi bibiaba bie kumukasa biakhengwa nga bimuli. Nono kumulimo kwe bisiindi kwawa.

²³Hiramu aang'oona litangi lie kumukasa lie buleeyi bwe chimita embi chibili ne nusu khucha mungaaki. Abele lusia lwe chimita likhumi na chiraano lunyala lwalibotookhelela. Khukhwama khu lusike khukhwola khu lundi liaba embi chimita chiraano. Liabukula chinyuungu che kameechi chielefu chibili.

²⁴Asi walio biabao bifwaani bie chimuka bibiabotookhelela litangi. Bifwaani bie chimuka ebio biaba bikele kamakhumi kataru khubotookhelela litangi, mala biaba mu laini chibili. Abikhola bioosi khulala ne litangi.

²⁵Litangi liarengekhwa khu mikoongo kie bifwaani bie chiuunwa ekhumi ne chibili che kumukasa. Chitaru chaloleelela ebunaswa, chitaru chaloleelela mumbo, chitaru chaloleelela ebunafubo, ne chitaru chaloleelela ebukwe.

²⁶Litangi liaba ne butilingifu bwe khu ndulo bubwaba lulwaala lulala bubalaayi. Lusike lwalio lwaba nga lusike lwe eseesi. Lwalolekhana nga simuli simulikha. Litangi elio liaba lichamo kameechi chilita kamakhumi kane.

²⁷Huramu lundi akhola kamakaari ekhumi ke kumukasa. Buli likaari liaba buleeyi bwe bikele bine ne bukhiikha bwe bikele bine, ne buniina bwe bifuba bitaru.

²⁸Kamakaari kaba ne kamabati kakaba mu mitalaachi.

²⁹Khu mabati biabaakho bifwaani bie chitalang'i, ne chiuunwa ne chikerubi. Mwitalaachi, angaaki ne asi we chitalang'i ne chiuunwa, chabao chinjooro che chindekwe ne bimuli, chichakhomwa mu mukasa.

³⁰Buli likaari liaba ne kimikuu kine kie kumukasa ne biaambaania bie kumukasa bine. Buli mu lusokho siabamo siyeeta enjikha. Biyeeta biaba ne bifwaani bie bimuli.

³¹Khungaaki khwe enjikha khwabaakho liloo. Chisike che liloo chaniina sikele silala. Liloo lino liaba embi bikele bibili. Chisike che liloo chichaniina charonwa. Se liaba liabotookhelela tawe liaba lie bulekhaane embi bikele bibili. Emunwa we kumuliango, bachorakho bifwaani. Bibaanga biaba ne bubalaayi ne bukhiikha bulekhaana ne se biaba bibiabotookhelela tawe.

³²Kimikuu kiaba asi we bibaanga. Bibia bibiabotookhelela bie kimikuu biaba bifwaanane ne kamakaari. Ne buleeyi bwe kumukuu mulala bwaba embi bikele bibili.

³³Kimikuu kiakholwa nga kimikuu kie likaari lie liie. Biaamba likaari, ne chingarangarani, chiwaya ne akari we kumukuu biaba biakholwa ne kumukasa.

³⁴Biabaao biyeeta bine mu ndulo mwa buli likaari. Biyeeta biakholwa siindu silala biaba busa nga kamakaari.

³⁵Ne khungaaki khwa buli likaari khwaba khwabotookhelesibwa ne kumukhandaala kukwaba buniina sitonyi sie sifuba silala. Ne khungaaki khwe likaari ne biyeeta likaari ne bibaanga bialio biaba busa nga siindu silala.

³⁶Khungaaki khwe biyeeta likaari ne khu bibaanga khwaronwa ne bifwaani bie chikerubi, chitalang'i ne kimikheendu, khuloondekhana ne bubweyaangu bwabio ne bimuli biabotookhelela.

³⁷Mu ngila yino, Huramu akhola kamakaari ekhumi. Koosi kakholwa ne kumukasa. Kafwaanana, ne khulekhaana.

³⁸ Huramu lundi akhola chinjikha ekhumi. Buli enjikha yaba enyala yasuta kameechi chinyuungu kamakhumi kane ne sita. Buli enjikha yaba bubalaayi bwe bikele bine. Buli likaari liaba ne enjikha.

³⁹Ara kamakaari karaano lubeka lwe ebunafubo lwe Lukaangu, ne karaano kaba lubeka lwe ebunaswa. Mala ara litangi lubeka akari we ebunafubo ne ebukwe we nju.

⁴⁰Huramu lundi akhola chinyuungu, chimbako ne bibuumba. Nio Huramu amalila elala kumulimo kwewe kwoosi nikwo akholela omwami Solomoni mu Lukaangu lwa Wele Omunyali Owa Bioosi.

⁴¹Bino nibio akhola: bisiindi bibili, bibuumba bibili bie khu ngaaki khwe bisiindi, bunabi bubili bwe lutimba lulwanabwa lwafwaana nga kumunyololo khu ngaaki khwa buli sibuumba,

⁴²bifwaani bie kamatuunda kamakomanga ke kumukasa chimia chine karekekhwa mu lutimba lwe kumunyololo kabotookhelesia sifwaani khu ngaaki khwe sibuumba,

⁴³kamakaari ekhumi ne chinjikha ekhumi khu ngaaki khwe kamakaari.

⁴⁴Akhola litangi ne chiuunwa ekhumi ne chibili asi we litangi.

⁴⁵Huramu lundi akhola chinyuungu, chimbako ne bibuumba bie khuura mu Lukaangu lwa Wele Omunyali Owa Bioosi. Bino bioosi biaronwa ne kumukasa.

⁴⁶Omwami Solomoni abichukha bino bioosi mu bibuumba bie liloba bibiakholwa mu mweyeeywe kwa Yoritani akari wa Sukoti ne Saretani.

⁴⁷Solomoni se akela bibiindu bie kumukasa bino tawe, sikila biaba bikali lukali ne khwako busiro bwabio se bwamanyikha tawe.

⁴⁸ Nio Solomoni akhola bibiindu bie mu Lukaangu bioosi: alutare eye esahabu, emesa eye kumukaati kwe khuaanwa khu Wele eye esahabu,

⁴⁹ biteetwe ekhumi bie esahabu, biraano ebunafubo ne biraano ebunaswa we Abuundu Atakatifu Lukali, bimuli, chitaa ne chimbani che esahabu,

⁵⁰chiseesi, kamakaasi kakhala chindaambi, bibuumba, bipwakuli bie khurakho bimuli biiunya kumuuya kumulayi, ne chinjo chisuta kamanda ke kumulilo. Biakholwa khukhwama khu sahabu. Akhola bupata bwe kimiliango kie Abuundu Atakatifu Lukali nende bwe kimiliango kie Lukaangu.

⁵¹ Nio omwami Solomoni amala khukhola kumulimo kwe khu Lukaangu kwoosi. Solomoni areera mu Lukaangu bibiindu bioosi nibio raraawe Daudi aba ne aana khu Wele Omunyali Owa Bioosi, efwesa, esahabu ne bibiindu bibiindi, mala abibiikha mu libiikho lie enju eya Wele Omunyali Owa Bioosi.