Read lubukusu 1 Bab. 8 Bible Online

1 Bab. 8 - lubukusu bible

1 Bab. 8

¹ Nio omwami Solomoni alaanga alala basaakhulu ba Isiraeli ne bakhulu boosi be chikholo cha Isiraeli, ne babemeelesi be chinju che Baisiraeli e Yerusalemu. Abalaanga nio babukule Lisanduku lie Ndakaano eya Wele Omunyali Owa Bioosi khukhwama mu Lukoba lwa Daudi luuli Sayuni.

² Babaandu boosi bebuusia alala khu Solomoni mu siise sia Naikara eye Bisali. Kwaba kumwesi kwa saba, kulaangwa kwa Etanimu.

³Nga basaakhulu boosi ne bebuusia alala, basaayi basuta Lisanduku lie Ndakaano eya Wele Omunyali Owa Bioosi.

⁴Bareera Lisanduku lie Ndakaano eya Wele Omunyali Owa Bioosi ne liiema lie kumuse ne bibiindu bitakatifu bioosi bibiaba mu liiema, mu Lukaangu. Basaayi ne Balawi babireera.

⁵Omwami Solomoni ne babaandu boosi ba Isiraeli bebuusia alala ebweeni we Lisanduku lie Ndakaano eya Wele Omunyali Owa Bioosi mala baana chimbosio che kamakheese kamakali ne chikhaafu chingali, biikhabalikha tawe.

⁶Nio basaayi bayila Lisanduku lie Ndakaano eya Wele Omunyali Owa Bioosi mu Lukaangu mala balira Abuundu Atakatifu Lukali, asi we chindaa che chikerubi.

⁷Bifwaani bie chikerubi biabalaaya chindaa chabio chabiimba Lisanduku lie Ndakaano ne bisiindi bie khu lisuta.

⁸Ne bisiindi biabonekha khukhwama Abuundu Atakatifu, mu Lukaangu mukari. Ne kakhali se biabonekha khukhwama enje tawe. Bisiindi ebio bisiliio khukhwola luno.

⁹ Sisiindu se siaba mu Lisanduku lie Ndakaano tawe, ne kakhali kamabaale kabili niko Musa aramo, ne ali e Horebu. A Horebu ao niio Wele Omunyali Owa Bioosi akhola endakaano ne Baisiraeli nga baba ne bama e Misiri.

¹⁰ Nga basaayi ne baba ne balikho barura Abuundu Atakatifu, lifuumbi liechusia Lukaangu.

¹¹Basaayi se banyala khukhola kimilimo kiabwe sikila luyali lwa Wele Omunyali Owa Bioosi lwechusia enju yewe.

¹² Nio Solomoni aloma ali, “Wele Omunyali Owa Bioosi areere enyanga khwikulu, ne kakhali alomile ali acha khumenya mu siilima sikali.

¹³Nakhwombakhiile Lukaangu lulayi abuundu niio ewe omenya mindali na mindali.”

¹⁴Nga babaandu ne baba ne bemile ao, omwami Solomoni ayuukha abalola mala ababiita chikhabi.

¹⁵Aaloma ali, “Wele Omunyali Owa Bioosi afume, Wele owa Isiraeli. Akholile niko alaka Paapa wase Daudi. Aaloma ali,

¹⁶ ‘Khukhwama endaalo niio narusiliamo babaandu base Isiraeli mu Misiri, se naroborakho lukoba lwosi lwosi mu kholo cha Isiraeli choosi nimwo Lukaangu lunyala lwombakhwa tawe, lundi se naroborakho niio lisina liase linyala liamanyikhana tawe. Ne kakhali narobora Daudi amiie babaandu base Isiraeli.’

¹⁷ Nono paapa wase Daudi enya khukhwombakhila Wele Omunyali Owa Bioosi, Wele owa Isiraeli enju.

¹⁸ Ne kakhali Wele Omunyali Owa Bioosi aboolela paapa wase Daudi ali, ‘Bwaba bulayi ewe khukhwibaasia khukhunjombakhila enju.

¹⁹Ne kakhali se ocha khukhwombakha tawe. Omusoleeli wowo niye olisaala niye oliinjombakhila enju.’

²⁰“Ne luno Wele Omunyali Owa Bioosi amalile khukhwichusia endakaano niyo akhola. Ese nelileo mu bweyaangu bwa paapa wase Daudi. Nekhaliile endebe eye bubwami eya Isiraeli, nga Wele Omunyali Owa Bioosi ne alaka ne nombakhiile Wele Omunyali Owa Bioosi, Wele owa Isiraeli enju.

²¹Mu Lukaangu omwo nakholile abuundu we khura Lisanduku lie endakaano lilimo endakaano niyo Wele Omunyali Owa Bioosi akhola ne bakuuka befwe nga ne abarusia mu Misiri.”

²²Nio Solomoni eema ebweeni owa alutare eya Wele Omunyali Owa Bioosi, Baisiraeli boosi ne baloleleele. Asuta kamakhono kewe mungaaki

²³mala asaba ali, “Ee, Wele Omunyali Owa Bioosi, Wele owa Isiraeli, mbao Wele nga ewe mwikulu mungaaki namwe asi khu liloba tawe. Ewe oliinda endakaano yowo ne babaandu bowo mala wekesianga busiime bwowo buchiililila busa khu bakholi bowo bakeenda ebweeni wowo ne kimiooyo kiabwe kioosi.

²⁴Waliindile endakaano niyo walaka paapa wase Daudi. Endaalo eya luno buli likhuwa liamalile khukhwichusibwa.

²⁵ Nono luno, ee Wele Omunyali Owa Bioosi, Wele owa Isiraeli, liinda endakaano niyo walaka paapa wase. Waloma oli buli lwosi acha khubao omundu mulala khu be lisaaye liewe oliamiia Baisiraeli, yaaba bali lisaaye lino likhuria ewe nga paapa wase ne akhuria ewe.

²⁶Nono, Ee Wele owa Isiraeli, lekha likhuwa liowo nilio walaka paapa wase Daudi, omukholi wowo, libe lia ng'ali.

²⁷ “Ne ewe ee Wele, ng'ali onyala wamenya khu liloba ku? Akhaba likulu lioosi ne likulu lie angaaki lukali, se binyala biakhwoola tawe. Ne Lukaangu nilwo ese nombaakhe luno luli lutiiti lukali khukhwola ewe.

²⁸Ne kakhali ulila lisaba ne lilienya liase. Ee Wele Omunyali Owa Bioosi, Wele wase ulila liilila ne lisaba lio mukholi wowo nilio asaba ebweeni wowo luno.

²⁹ Liinda Lukaangu luno siilo ne kumuusi, abuundu niio ewe warobora khusaayilao. Ulila lisaba nilio esaba abuundu ano.

³⁰Ne ulila lilienya lio mukholi wowo nende lie babaandu bowo Isiraeli ne basaba ne baloleelela ano. Ne basaba, ulila khukhwama mwikulu niio omenyile mala ne oulila khubeele.

³¹“Kaaba bali omundu akholeele owasie kamabi, alireerwa a alutare mu Lukaangu muno. Aaba ne echuba ali se ali ne kumusaango tawe,

³²ulila khukhwama mwikulu, mala okhalake kumusaango oaane kumunaanio khu mundu okholile kamabi. Ne olekhuule okhakholile kamabi tawe.

³³“Babaandu bowo Isiraeli ne bakhukholela kamamayaanu baliuulwa ne basiku baabwe. Ne kakhali baaba ne bakhukobolela mala bafukiilila lisina liowo mala basaba ne baboola lilienya liabwe mu Lukaangu luno,

³⁴nio baulile khukhwama mwikulu. Beela babaandu bowo Baisiraeli kamamayaanu mala obakalusie mu sibala nisio waelesia bakuuka baabwe.

³⁵“Ne bakhukholela kamamayaanu, olikhiingilila efula khukwa khu maloba kabwe. Ne baaba ne bakhusaba ne baloleleele abuundu ano, ne bafukiilila lisina liowo mala ne balekha kamamayaanu kabwe,

³⁶ulila khukhwama mwikulu mala obabeele bumayaanu bwabwe. Bekesie engila endayi niyo bakhoya khuloonda. Nio aana efula khu maloba kano, niko waelesia babaandu bowo nga kumukabwa kwabwe.

³⁷“Biise bilala enjala eliba mu sibala, namwe lufu, namwe siimiyu, namwe ebarafu, namwe bipupu bie chisike, namwe basiku balibebwaakala, namwe baliba ne bulwaale.

³⁸Lisaba liosi liosi namwe lilienya lisabwa no mundu yesi yesi namwe ne babaandu bowo boosi ba Isiraeli, buli mulala mu bubeeleli bwewe, ne asuta kamakhono kewe mu lisaba khulosia khu Lukaangu luno,

³⁹ulila lisaba liewe khukhwama mwikulu abuundu niio omenyile. Mubeele mala omuyeete nga nilwo omanyile kumwoyo kwewe ne chingila chewe choosi. Ewe weng'ene omanyile kamebaasio ke kumwoyo kwa buli mundu.

⁴⁰Bakholele orio nio babaandu bowo boole khukhuria siise sioosi nisio bamenya mu maloba niko waelesia bakuuka befwe.

⁴¹“Ne lundi omureende, ne aliama mu sibala sie aleeyi, sikila efuma yowo,

⁴²(Sikila baliulila ke lisina liowo lili likali ne kamaani kowo) aliicha khusaba mu Lukaangu luno.

⁴³Ne alisaba, rekeeresia lisaba liewe khukhwama mwikulu, niio omenyile. Khola koosi khuloondekhana nga omureende oyo ne akhusabile. Ne okhola orio babaandu boosi be khu liloba balamanya lisina liowo mala bakhurie. Balikhuria nga babaandu bowo Baisiraeli mala bamanye bali enju yino niyo nombaakhe elaangwa khwisina liowo.

⁴⁴“Nga babaandu bowo bacha mwiie khu khuupana ne basiku babwe, lubeka lwosi lwosi nilwo obaruma, mala ne basaba Wele Omunyali Owa Bioosi ne baloleleele lukoba nilwo ewe warobora, ne Lukaangu luno nilwo ekhwombakhiile,

⁴⁵rekeeresia lisaba ne lilienya liabwe. Baulile mala obae bukhili.

⁴⁶“Ne balikhukholela kamamayaanu, sikila se aliio omundu akhaba mulala okhakhola kamamayaanu tawe, mu lirima liowo olilekha basiku baabwe babakhile mala babaambe babayile mu sibala sisiindi, siili aleeyi.

⁴⁷Ne kakhali babaandu bowo ne balisaba khwiwe mu sibala sie embaambe esio bekanile ne bebiiya, ne baloma bali ‘Khwakholile bubwoni, khwekhiikhile khwakholile bumayaanu’

⁴⁸Balibiiya ne kumwoyo kwoosi mu sibala sie basiku baabwe bababaamba embaambe. Balisaba khwiwe ne baloleleele sibala siabwe nisio ewe waelesia bakuuka baabwe. Baliloleleela lukoba nilwo warobora ne Lukaangu nilwo ese khwombakhiile.

⁴⁹Ne bakhola bario, ulila lisaba ne lilienya liabwe khukhwama mwikulu nimwo omenyile mala obayeete.

⁵⁰Beela babaandu bowo bakholile bumayaanu. Khola basiku baabwe ba babaamba mu mambe, babakholele siisa.

⁵¹(Bakholele orio sikila bano bali babaandu bowo lundi kumukabwa kwowo, nibo warusia mu Misiri, mu siooso sie bichuuma.)

⁵²“Bona lilienya lio mukholi wowo ne lilienya lie babaandu bowo Isiraeli. Barekereesie buli lwosi ne bakhusaba.

⁵³Ewe wabarobora khukhwama mu baandu boosi be khu liloba, babe kumukabwa kwowo, nga ne waloma khubirira khu mukholi wowo Musa, nga ne warusia bakuuka befwe e Misiri ee Omwami WELE.”

⁵⁴Solomoni ne amalile khusaba khu Wele Omunyali Owa Bioosi, eema ebweeni wa alutare niio aaba ne asikaame ne khusuta kamakhono mungaaki.

⁵⁵Eema mala abiita libuusiana lie Baisiraeli lioosi chikhabi ne kumumilo kwe angaaki. Aloma ali,

⁵⁶ “Wele Omunyali Owa Bioosi afume oele babaandu bewe Isiraeli kumuleembe, khuloondekhana nende koosi niko aalaka. Mbaao liosi liosi khu makhuwa kamalayi koosi niko alaka khubirira khu mukholi wewe Musa, likhekholekha tawe.

⁵⁷Wele Omunyali Owa Bioosi, Wele wefwe abe ne nafwe nga ne aaba ne bakuuka befwe. Se akhoya akhulekha namwe akhumwaata tawe,

⁵⁸nio akhole kimiooyo kiefwe kimurie, khukeenda mungila chewe mala khurie kamalaka kewe niko aalaka bakuuka befwe.

⁵⁹Wele Omunyali Owa Bioosi, Wele wefwe ulila lisaba liase silo ne kumuusi. Okhoya wanjeeta ese ne babaandu bowo Isiraeli, buli endaalo.

⁶⁰Nio chikholo choosi che liloba chimanye chili Wele Omunyali Owa Bioosi ali Wele ne se aliio okundi tawe.

⁶¹Mukhoya mwaba ba ng'ali elala khu Wele Omunyali Owa Bioosi, Wele wefwe, ne mukeenda mu ngila chewe ne muria kamalaka kewe nga ne mulikho mukhola luno.”

⁶²Nio omwami Solomoni ne Isiraeli yoosi, baana chimbosio khu Wele Omunyali Owa Bioosi.

⁶³Solomoni aana chikhaafu chielefu shurina mbili ne kamakheese chielefu mia mocha shurini nga biianwa bie kumuleembe khu Wele Omunyali Owa Bioosi. Nio, omwami ne babaandu boosi ba Isiraeli bara Lukaangu mu wakifu khu Wele Omunyali Owa Bioosi.

⁶⁴Endaalo ng'ene eyo, omwami aara mu wakifu akari we luuya ebweeni we nju eyo Mwami Wele, sikila ao niio aanilanga biianwa bie khukhwosia ne biianwa bie biakhulia bie likesa ne kiminaawa kie biianwa bie kumuleembe. Akhola ario sikila alutare eye kumukasa, eyaba ebweeni wa Wele Omunyali Owa Bioosi yaba engeekhe lukali. Yaba se enyala khubukula biianwa bino bioosi tawe.

⁶⁵Nio Solomoni akhola naikara eye bisali mu siise esio ne Baisiraeli boosi. Baaba libuusiana likali khukhwama asilibwa sia Hamati khukhwola a kheechi kha Misiri. Naikara yino yakholwa khu ndaalo saba[11] ebweeni wa Wele Omunyali Owa Bioosi.

⁶⁶Khu ndaalo ekhola munane, Solomoni alekha babaandu bacha chingo chabwe. Babaandu boosi babiita omwami Solomoni chikhabi mala bakobola engo ne bekhoya ne khusangaalila bulayi nibwo Wele Omunyali Owa Bioosi ekesia Daudi, omukholi wewe, ne babaandu bewe Isiraeli.