Read lubukusu 1 Bab. 9 Bible Online

1 Bab. 9 - lubukusu bible

1 Bab. 9

¹Omwami Solomoni amala khukhwombakha Lukaangu ne lichipi nende buli siindu nisio enya khukhwombakha.

² Enyuma wako, Wele Omunyali Owa Bioosi amubonekhela lukhola khabili nga nilwo amubonekhela e Kibeoni.

³Wele Omunyali Owa Bioosi amuboolela ali, “Nauliile lisaba liowo ne lilienya liowo nga ne osabile ebweeni wase. Nakholile Lukaangu nilwo wombaakhe luno khuba lutakatifu lundi nga abuundu niio ese ndiba. Ndaluloleelela ne khululiinda khulwe biise bioosi.

⁴Ne ewe keenda nga paapa wowo Daudi. Daudi aaba ne kumwoyo kumulayi lundi owa ng'ali khola koosi niko akhulakile. Ria endakaano yase.

⁵ Wakhola orio, nja khulumia bubwami bwowo khu Isiraeli khulwa mindali nga nalaka paapa wowo Daudi. Nalaka Daudi ndi, ‘Buli lwosi omundu se alitambao khukhwama khu luuya lwowo oliikhala khu ndebe eye bubwami khuruka Isiraeli tawe.’

⁶Ne kaaba bali ewe namwe lisaaye liowo mungalukhanakho ne khulekha khuria kamalaka kaase niko ekhuele mala wesaaya bawele babaandi,

⁷aba ndauuya babaandu base Isiraeli khukhwama mu sibala nisio mbaeele. Lundi nja khwanjukha Lukaangu luno nilwo nauule nga Abuundu Atakatifu. Ne Baisiraeli bacha khuba lusimo ne silolelo mu kholo choosi.

⁸ Ne Lukaangu luno lulaba situuta sie bubwonaki[12] bukali. Buli ocha khulubirao acha khwisiindukha ne khumuchekheelela. Babaandu balireeba bali, ‘Siina sikila Wele Omunyali Owa Bioosi ne akholile kano khu sibala sino ne khu Lukaangu luno?’

⁹Nio babaandu balikobosia bali, ‘Sikila barura khu Wele Omunyali Owa Bioosi, Wele wabwe owarusia bakuuka baabwe mu Misiri. Besaaya bawele babaandi, mala babesaaya ne khubakholela. Esino nisio sikila Wele Omunyali Owa Bioosi ne areera butinyu buno khu nibo.’ ”

¹⁰Solomoni ombakha Lukaangu lwu Wele Omunyali Owa Bioosi ne lichipi liewe khu miiko kamakhumi kabili.

¹¹Omwami Hiramu owe Tiro amua kimirongooro kie kimitarakwa, Saipurasi ne esahabu bioosi nga nilwo enya khulwe kumulimo kuno. Nga kumuruungo, omwami Solomoni aelesia Hiramu chingoba kamakhumi kabili che mu sibala sia Kalilaya.

¹²Ne kakhali Hiramu acha khukhwama e Tiro khulola chingoba nicho Solomoni aba ne amueele. Ne se chamusiimisia tawe.

¹³Nio areeba Solomoni ali, “Wandaayase, ngoba siina nicho umbeele chino?” Nio chingoba echo chalaangwa bali Kabuli[13] khukhwola luno.

¹⁴Hiramu aba arumira Solomoni esahabu chikiilo chielefu chine.

¹⁵Oluno luli lukano lwe kimilimo kie khuyingilila nikio Solomoni akhola ne arakho babaandu khukhwombakha Lukaangu ne lichipi liewe. Ombakha lundi kimiliinda ne kamasiisi ke chingoba cha Yerusalemu, Hasori, Magido ne Keseri.

¹⁶(Omwami Farao owa Misiri aba aamba lukoba lwa Keseri mala alwosia. Era Bakanaani, babamenyamo. Nio aluaana nga kumuruungo kwe bukhwe khu mukhaana wewe, mukha Solomoni.

¹⁷Nio Solomoni alwombakha lundi.) Lundi Solomoni ombakha lukoba lwe e mwalo Beti-horoni,

¹⁸Baalati, Tamari, mu sichiimi sie Yuda,

¹⁹ne chingoba che kamabiikhilo ne chingoba che kamakaari ke kamae ne chingoba che banamae be chifarasi nende buli sisiindu nisio enya khukhwombakha mu Yerusalemu, mu Lebanoni ne osi osi mu bwami bwewe.

²⁰Babamo mu sibala babaandu babaandi bakhaaba Baisiraeli tawe. Abano baba Baamori, Bahiti, Baperisi, Bahibi ne Bayebusi.

²¹Baaba lisaaye lie babaandu nibo Baisiraeli bakheera tawe. Solomoni abayingiilila bamukholele kimilimo nga nasioobi. Basiikhola khukhwola luno.

²²Ne kakhali Solomoni se akhola Baisiraeli baba banasioobi tawe. Abakhola khuba nga Banamae, bakholi, babemeelesi be liie, banamae bewe, babemeelesi be kamakaari ke kamae, ne batimia chifarasi.

²³Babao babemeelesi bakhulu chimia chiraano ne kamakhumi karaano nibo Solomoni aelesia kumulimo kwe khukhwimeelela babaandu babakholaanga kimilimo.

²⁴Ne mukha Solomoni omukhaana owa Farao, auuya mu Lukoba lwa Daudi mala acha engisia lichipi liewe nilio Solomoni amwombakhila. Nio Solomoni ombakha kimiliinda.

²⁵ Solomoni aananga biianwa bie khukhwosia nende bie kumuleembe khu alutare niyo ombakhila Wele Omunyali Owa Bioosi, khukhwola khataru khu mwiiko. Lundi osiela Wele Omunyali Owa Bioosi bimuli biiunya bulayi. Nono amala khukhwombakha Lukaangu.

²⁶Omwami Solomoni ombakha lituuli lie chimeeli e Esioni-geberi, embi ne Eloti khu sikiingi sie Nyanja eya Shamu, mu sibala sie Edomu.

²⁷Ne omwami Hiramu aruma bakholi bewe, babaandereba be chimeeli, bamanyile kimilimo kie khu nyanja bache alala ne bakholi ba Solomoni.

²⁸Bacha bola e Ofiri, bareerayo esahabu chikiilo chielefu ekhumi na chine.