Read lubukusu 2 Bab. 1 Bible Online

2 Bab. 1 - lubukusu bible

2 Bab. 1

¹Enyuma we lifwa lia Ahabu omwami owa Isiraeli, sibala sia Moabu siarura khu bwami bwa Isiraeli.

²Nono omwami Ahasia owa Isiraeli aanukha akwa asi khukhwama mu litirisia lie korofa yewe mu Samaria mala aumiia lukali. Aruma barumwa ne ababoolela ali, “Cha mureebe Baali-sebubu, wele owa Ekironi mulole ne enyala naona bulwaale buno.”

³Ne kakhali malaika owa Wele Omunyali Owa Bioosi aboolela omung'oosi Elicha Omutishibe ali, “Yinyokha oche wakaanane ne barume bo mwami owa Samaria. Bareebe oli, ‘Siina sikila ne mucha khureeba Baali-sebubu, wele owa Ekironi? Enywe mwibaasia muli Wele se ali mu Isiraeli tawe?’

⁴Nono Wele Omunyali Owa Bioosi aloma ali, ‘Se okharure mu sitaanda nimwo okonile omwo tawe. Ng'ali okhafwe’ ” Nio Elicha arekukha.

⁵Barume bakobola khu mwami, mala abareeba ali, “Siina sikila ne mukoboole?”

⁶Ne bamukobosia bali, “Omundu echile akhwakaanana akhuboolela ali, ‘Kobola khu mwami omurumire mumuboolele muli, Wele Omunyali Owa Bioosi areeba ali, Wele mu Isiraeli mbamo tawe nio oche oreebe Baali-sebubu, wele owa Ekironi? Nono se olarura mu sitaanda nimwo konile omwo tawe. Ne kakhali ng'ali olafwa.’ ”

⁷Omwami abareeba ali, “Omundu owichile amwakaanana enywe oyo mala amuboolela bibiindu bino abeele omundu owa lukano siina?”

⁸ Bamukobosia bali, “Abeele efwarire[1] engubo eye bufuumbo, mala eboele kumusiipi munda.” Nio Ahasia aloma ali, “Abeele Elicha Omutishibe.”

⁹Nio omwami aruma omunamae omukhulu ne banamae kamakhumi karaano. Omunamae omukhulu acha khu Elicha owaba ne ekhaale khu lukulu khungaaki. Amuboolela ali, “Mundu wa Wele, omwami aloma ali yiikha asi.”

¹⁰ Elicha akobosia omunamae omukhulu oyo ali, “Ese naaba ne endi omundu owa Wele, lekha kumulilo kwikhe asi khukhwama mwikulu mala kukhwosie ewe ne babaandu bowo.” Nio kumulilo kwama mwikulu mala kwosia omunamae omukhulu oyo ne banamae bewe kamakhumi karaano.

¹¹Lundi omwami aruma omunamae okundi omukhulu ne banamae kamakhumi karaano. Acha mala aboolela Elicha ali, Mundu wa Wele, omwami aloma ali, “Yiikha asi khangu.”

¹²Ne kakhali Elicha akobosia ali, “Ese naaba ne endi omundu owa Wele, lekha kumulilo kwikhe asi khukhwama mwikulu mala kukhwosie ewe ne babaandu bowo.” Nio kumulilo kwekha asi khukhwama mwikulu mala kwosia omunamae omukhulu oyo ne banamae bewe kamakhumi karaano.

¹³Lundi omwami aruma omunamae omukhulu owe khataru ne banamae kamakhumi karaano. Aniina khu lukulu, mala acha asikama asi ebweeni wa Elicha ne amwikoonjelela ali, “Ee mundu wa Wele, ekhusaba ndi lekha bulamu bwase ne bulamu bwe bakholi bowo kamakhumi karaano bano bube ne bukhala ebweeni wowo.

¹⁴Kumulilo kwamile mwikulu kwosia banamae bakhulu babili bataayi be babaandu kamakhumi karaano ne babaandu babwe boosi. Ne kakhali luno kholele siisa.”

¹⁵Nio malaika owa Wele Omunyali Owa Bioosi aboolela Elicha ali, “Yiikha asi ne naye. Okhamuria tawe.”

¹⁶Nio Elicha enyokha mala ekha ne naye bacha khubona omwami. Elicha aboolela Ahasia ali, “Wele Omunyali Owa Bioosi areeba ali, ‘Siina sikila ne waruma barumwa khureeba Baali-sebubu, wele owa Ekironi? Sikila wibaasia oli Wele mu Isiraeli mbamo tawe niye onyala wareeba likhuwa? Nono se olarura khu sitaanda nikhwo okonile tawe. Ng'ali olafwa.’ ”

¹⁷Ahasia afwa nga Wele Omunyali Owa Bioosi ne aloma khubirira khu Elicha. Yoramu wandaaye[2] aba omwami mu bweyaangu bwa Ahasia mu mwiiko kukhola khabili kwe bubwami bwa Yehoramu. Kaaba kario sikila Ahasia se aaba ne omwana owe sisoleeli tawe.

¹⁸Nono bikholwa bibiindi bia Ahasia nibio akhola biaandikwa mu sitabu sie chingano che Babaami ba Isiraeli.