Read lubukusu 2 Bab. 10 Bible Online

2 Bab. 10 - lubukusu bible

2 Bab. 10

¹Nono Ahabu aba ne babaana kamakhumi saba. Bamenyanga mu lukoba lwa Samaria. Yehu aandika chibarwa mala achiruma khu bemeelesi be lukoba lwa Samaria. Arumira akhaba basaakhulu ne baliindi be babaana ba Ahabu. Aandika mu barwa echo ali,

²“Enywe muliinda lisaaye lio mwami ne kamakaari ke kamae ne chifarasi, bulwaani ne chingoba chisire. Nono nga ne munyoola ebarwa yino,

³robora omusoleeli mulala omusicha lundi onyala khukhila boosi khu be nju eyo mwami, mala mulamwamiisia abe omwami mu bweyaangu bwa raraawe mala mupanile enju eyo mwami wenywe.”

⁴Babemeelesi ba Samaria baria lukali baloma bali, “Khunyala khwaba barengu khuriena khu Yehu kaba bali akhaba omwami Yoramu namwe omwami Ahasia se banyala bamukholela bureengu tawe?”

⁵Nio omwimeelesi owe lichipi, ne omuruki owe lukoba, alala ne basaakhulu bamwo ne baliindi baruma burume khu Yehu ne baloma bali, “Efwe khuli bakholi bowo, mala khwerekeekhe khukhola koosi niko okhuboolela. Ne se khulamiisia omundu yesi yesi tawe, ewe khola niko wibaasia oli kali kamalayi khwiwe.”

⁶Nio Yehu abaandikila ebarwa eye khabili ali, “Mwaaba ne muli alala ne nase, mala mwerekeekhe khuria kamalaka kase, muchuli siise nga sino, bukula kimirwe kie be nju eyo omwami Ahabu mala mundeerere e Yesireeli.” Be enju yo mwami Ahabu, kamakhumi saba baba asi we buliindi bwe babemeelesi be mu lukoba.

⁷Nga banyoola ebarwa eya Yehu, babemeelesi be mu Samaria, beera be nju eya Ahabu kamakhumi saba bara kimirwe kiabwe mu bikono, mala baruma e Yesireeli khu Yehu.

⁸Omurume acha aboolela Yehu ali, “Bareerire kimirwe kie babaana bo mwami.” Yehu aloma ali. “Kiaanje mu bipupu bibili a silibwa khukhwola kumutikhinyi.”

⁹Oli bwasia mutikhinyi, Yehu arura acha anje mala aboolela babaandu boosi ali, “Ese niise owakwangwaanile omwami Yoramu mala namwiira. Sifuki siewe sili khwise se muli enywe tawe. Ne kakhali naanu owirire abano boosi?

¹⁰Manya nono muli buli likhuwa nilio Wele Omunyali Owa Bioosi alomaloma khuloondekhana ne enju eya Ahabu likhechusibwe, sikila Wele Omunyali Owa Bioosi luno akholile nilio alaka khubirira khu mukholi wewe Elicha.”

¹¹ Nono Yehu eera balebe ba Ahabu babaandi boosi mu Yesireeli ne babemeelesi bewe bakhulu boosi, basaale bewe ne basaayi. Se aliio akhaba mulala owarama omulamu tawe.

¹²Yehu arura arekukha khucha Samaria. Oli ali khungila abuundu alaangwa “Beti-egedi e Babaayi,”

¹³akaanana ne balebe balala ba walimusaani omwami Ahasia owa Yuda. Nio abareeba ali, “Enywe naanu?” Bakobosia bali, “Efwe khuli balebe ba Ahasia. Khulikho khukeniia e Yesireeli khucha khubona babaana ba Kwini Yesebeli ne khu baandi boosi be enju eyo mwami.”

¹⁴Yehu alaka banamae bewe ali, “Baambe busa ne bali balamu!” Babakwakho mala niye abeerera boosi a liloo lia Beti-egedi. Boosi alala baba babaandu kamakhumi kane ne babili ne se aliio niye balekha omulamu tawe.

¹⁵Nga ne arekukha arurao, akaanana ne Yonatabu okhwa Rekabu abeele echile khumwakaanila. Yehu amukheesia ne amureeba ali, “Ewe unjeyikina ese nga ese ne ekhweyikina ewe?” Yonatabu amukobosia ali, “Ee” Yehu ayila kumukhono ne aloma ali, “Kaaba kario nono kheesie.” Bakheesiana mala Yehu ayeeta Yonatabu khuniina mu likaari.

¹⁶Yehu aloma ali, “Khewiche mala obone sinani siase khu Wele Omunyali Owa Bioosi.” Nio boombi bachiila mu likaari bola Samaria.

¹⁷Nga bolayo Yehu eera balebe ba Ahabu boosi. Se aramiakho mulala tawe, khuloondekhana ne likhuwa lia Wele Omunyali Owa Bioosi nilio aloma khubirira khu Elicha.

¹⁸Yehu alaanga babaandu ba Samaria boosi alala mala ababoolela ali, “Ahabu akholelanga Baali atiiti. Ne ese ndamukholela lukali.

¹⁹Nono ndaangile bang'oosi ba Baali boosi nende basaayi ba Baali boosi ne boosi bamusaayanga bebuusie alala. Mukhalekhakho akhaba mulala arama tawe. Sikila ndi ne embosio emboofu eye khuaana khu Baali. Ne yesi yesi olatambao aleerwa.” (Kuno kwaba busa kumureko kwa Yehu nikwo enyela khukhwirira boosi ba basaayanga Baali)

²⁰Nono Yehu alaka ali, “Laanga babaandu beche basaaye Baali.” Nio babalaanga.

²¹Ne Yehu arumania likhuwa mu sibala sia Isiraeli sioosi. Babasaayanga Baali boosi becha ne se aliio owaramayo okheecha tawe. Boosi bengila munju eya Baali, bakichusia khukhwama lubeka lulala khukhwola khu lundi.

²²Nono Yehu alaka omusaayi omubiikhi owe chingubo ali, “Reerera Basaayi ba Baali boosi chingubo che khusaaya.” Omwimeelesi oyo abareerera chingubo che khusaaya.

²³Nio Yehu acha munju eya Baali ne Yonatabu mala aboolela basaaya Baali ali, “Yiima mala mube ne ng'ali muli bakholi ba Wele Omunyali Owa Bioosi se balikho mwinywe tawe ne kakhali bakholi basaaya Baali bong'ene.”

²⁴Nio Yehu engilamo khuaana chimbosio ne biianwa bie khukhwosia. Nono Yehu aba areere enje nibo aboolela ali, “Yesi yesi olalekha mulala khu baandu nibo muelesie bano elukhe alaruunga ne bulamu bwewe!”

²⁵Nono nga Yehu aba ne amala khuaana siianwa sie khukhwosia busa ari ne aboolela baliindi ne banamae babemeelesi ali, “Yingila mukari mala mubeere boosi mukhalekha yesi yesi elukha tawe.” Bengila mukari, beera boosi mala bakhurura kimibili kiabwe bakirusia enje. Bachiililila bengila mukari mwe enju eya Baali.

²⁶Barusia enje enjeko eya Baali eyabamo, mala bakiosia.

²⁷Nio batechula enjeko eya Baali ne lukaangu balukhola khuba esibakala niio babaandu bacha khukhwiyeeta khukhwola luno.

²⁸Yehu arusiao ario lisaaya lia Baali khukhwama mu Isiraeli.

²⁹ Ne kakhali ekelaasia khu bumayaanu bwa Yeroboamu okhwa Nebati. Yeroboamu arangirira Isiraeli khukhola bumayaanu khulwe khusikamila bifwaani bie chimoosi che sahabu nibio emia mu Beteli ne mu Dani.

³⁰Wele Omunyali Owa Bioosi aboolela Yehu ali, “Wakholeele bulayi khulwe khukhola kimilimo kimilayi ebweeni wase lundi wakholeele enju eya Ahabu niko ese nenya kekholekhe. Sikila kano, lisaaye liowo eselukho eya khane balaba babaami ba Isiraeli.”

³¹Ne kakhali Yehu se ariira elala Lilaka lia Wele owa Isiraeli, Wele Omunyali Owa Bioosi ne kumwoyo kwewe kwoosi tawe. Se alekha bumayaanu nga bwa Yeroboamu nibwo arangiria Isiraeli khukhola tawe.

³²Biise ebio Wele Omunyali Owa Bioosi arakikha khuboombia sibala sia Isiraeli. Hasaeli owa Shamu aula Baisiraeli buli abuundu mu sibala siabwe.

³³Aula khukhwama Yoritani khulola lubeka lwe ebukwe kamaloba ka Kileati koosi, Bagadi, Barubeni ne Bamanase khukhwola Aroeri mu litooma lia Arinoni (Ako niko kamalaka ka Kileati ne Bashani).

³⁴Nono bikholwa bibiindi bioosi bia Yehu nende koosi niko akhola ne bikholwa biewe bie bunyindaafu bioosi biaandikwa mu sitabu sie chingano sie Babaami ba Isiraeli.

³⁵Nono Yehu afwa mala asiikhwa mu Samaria. Ne omusoleeli wewe Yehoahasi amiia mu bweyaangu bwewe.

³⁶Yehu aba amiia ne ali mu Samaria nga omwami owa Isiraeli khulwe kimiiko kamakhumi kabili na munaane.