Read lubukusu 2 Bab. 11 Bible Online

2 Bab. 11 - lubukusu bible

2 Bab. 11

¹Nono nga Atalia, maayi owo mwami Ahasia ne amanya ali omusoleeli wewe afwiile eera be enju eye bubwami boosi.

²Ne kakhali Yoashi omusoleeli owa Ahasia yeng'ene niye owelukha aona. Aba siimbi khukhwirwa ne babaandu ne akhali areesibwa ne sengewe Yehosheba omukhaana owo mwami Yehoramu lundi omukooko owa Ahasia. Yehosheba amubukula niye no mulesi wewe amwingisia mu lusiro lwe Lukaangu. Nono amukisa khukhwama khu Atalia nio se erwa tawe.

³Khulwe kimiiko sita Yehosheba achiililila khu mukisa mu Lukaangu. Ne Atalia achiililila khukhwamiia.

⁴Ne kakhali mu mwiiko kwa saba Yehoyata omusaayi arumania babemeelesi be bipupu bie baliindi bo mwami ne baliindi be lichipi mala bababoolela beche mu Lukaangu lwa Wele Omunyali Owa Bioosi niio aba. Akhola endakaano ne nabo mala abakhola bechuba munju eya Wele Omunyali Owa Bioosi. Abekesia omwami Yoashi okhwa Ahasia.

⁵Ne abalaka ali, “Lino nilio mulakhola: sitonyi silala khu bitaru, mumwichanga khu milimo endaalo eya sabato mulaliinda lichipi.

⁶Bitonyi bisikaale bioosi, silalakha baleema baliinde silibwa sie Suri ne sitonyi sisiindi khu bitaru baleema baliinde asilibwa enyuma we baliindi babaandi. Mu ngila eyino mulaliinda enju yoosi.

⁷Bipupu bibili bikhacha khu milimo mu sabato tawe baleema baliinde enju eya Wele Omunyali Owa Bioosi khulwo mwami.

⁸Mwirekekhe ne chimbalu muliinde omwami Yoashi. Omundu yesi yesi ne echa siimbi niio muli mumwire. Ba siimbi no mwami buli abuundu niio acha.”

⁹Babemeelesi bakhola koosi khuloondekhana ne lilaka lia Yehoyata omusaayi. Buli omwimeelesi areera babaandu bewe bakhaba khu milimo mu ndaalo eya sabato tawe. Areera akhaba abo babenyekha khucha khu milimo.

¹⁰Nio Yehoyata aelesia babemeelesi bakhulu kamafumo[13] ne chingabo chichaba cho mwami Daudi. Bibiindu ebio biaba biabiikhwa mu Lukaangu.

¹¹Baliindi beema buli mundu ne bulwaani bwewe, khukhwama lubeka lwe ebunafubo khukhwola lubeka lwe ebunaswa we Lukaangu. Beema babotookhelesia alutare ne enju.

¹²Nio Yehoyata arusia omwana wo mwami anje mala bamufwara ekuutwa eye bubwami ne kamaandike ke liuliilisiana. Ne Yoashi achukhwakho kamafura khuba omwami. Baapa chimbi ne baloma bali, “omwami oyindile!”

¹³Atalia aulila baliindi ne babaandu ne baapa luyoka. Acha khangu mu Lukaangu, niio babaandu baba.

¹⁴ Nga Atalia ne alola, abona omwami omuyaakha emile anjeko khuloondekhana ne kumwiima. Ne babemeelesi ne bakhupi be chikhoombi baba bamwimileo. Babaandu boosi baba balikho bekhoya ne khukhupa chikhoombi. Atalia atabula chingubo chewe ne aloma ali, “Bureengu! Bureengu!”

¹⁵Yehoyata se enya Atalia ererwe mu Lukaangu tawe. Nio alaka banamae bakhulu be kamae ali, “Mubukule mumurusie enje mumuyile akari we babemeelesi, mala mwire yesi yesi olakhaka khumureesia.”

¹⁶Nono bamutiila bacha ne bamubisilia mu silibwa sie chifarasi mala bamuyila munju eyo mwami niio bamwirira.

¹⁷Omusaayi Yehoyata akhola endakaano akari wo mwami ne babaandu ne Wele Omunyali Owa Bioosi, bali baliba babaandu ba Wele Omunyali Owa Bioosi. Lundi akhola endakaano akari wo mwami ne babaandu.

¹⁸Nio babaandu boosi be sibala bacha munju eya Baali mala bakitechula yakwa. Baara alutare ne bifwaani biayo mu bitonyi mala berera Matani, omusaayi owa Baali ebweeni wa alutare echo. Yehoyata ara baliindi khuliinda enju eya Wele Omunyali Owa Bioosi.

¹⁹Abukula banamae bakhulu sipupu siliinda omwami ne baliindi be lichipi ne babaandu boosi be mu sibala mala baelekesia omwami khukhwama munju ya Wele Omunyali Owa Bioosi. Bamubisilia mu silibwa sie baliindi mala bamuyila mu lichipi.

²⁰Nono babaandu boosi be sibala basangaala. Ne lukoba lwaba ne kumuleembe enyuma wa Atalia khukhwirirwa mu lichipi.

²¹Yoashi aba ne bukhulu bwe kimiiko saba ne arakikha khukhwamiia Yuda.