Read lubukusu 2 Bab. 12 Bible Online

2 Bab. 12 - lubukusu bible

2 Bab. 12

¹Mu mwiiko kukhola saba kwe khukhwamiia khwo mwami Yehu owa Isiraeli, Yoashi arakikha khukhwamiia nga omwami owa Yuda. Yoashi amiia ne ali mu Yerusalemu khulwe kimiiko kamakhumi kane. Maayi owa Yoashi aba Sibia khukhwama mu lukoba lwa Beerisheba.

²Yoashi akhola kasiimisia Wele Omunyali Owa Bioosi mu bulamu bwewe bwoosi, sikila Yehoyata omusaayi amwekisia.

³Ne kakhaba kario abuundu aesuta se onakwa tawe. Ne ebweeneyo babaandu bachiililila khuaana chimbosio ne khukhwosia bimuli biiunya kumuya kumulayi.

⁴ Yoashi alaanga basaayi mala ababoolela babiikhe chirupia choosi che bibiindu bitakatifu mu Lukaangu. Chirupia nicho buli mundu enyekhana arusie ne biianwa ne chirupia chicharusibwa mu lienya lio omundu.

⁵Aboolela buli omusaayi abukule chirupia khukhwama khu baandu bewe, mala chirumikhe khung'oona buli abuundu niio Lukaangu lwonekha.

⁶Ne mumwiiko kukhola kamakhumi kabili na kitaru kwe khukhwamiia khwa Yoashi, basaayi baba basiili khung'oona abuundu osi osi mu Lukaangu tawe.

⁷Nono omwami Yoashi alaanga Yehoyata omusaayi ne basaayi babaandi mala abareeba ali, “Siina sikila ne mukhang'oona niio Lukaangu lwonekha tawe? Nono khukhwama luno khuchiililila mukhabukulakho chirupia nicho munyoola tawe. Ne kakhali muchiaane khulwe khung'oona Lukaangu.”

⁸Basaayi bafukiilila lino, lundi bafukiilila bali nibo se balang'oona Lukaangu tawe.

⁹Nio Yehoyata omusaayi abukula lisanduku afutula kumwanya khu sifunikho mala ara lisanduku a alutare, kumukhono kumuseecha kwe khukhwingila munju eya Wele Omunyali Owa Bioosi. Basaayi ba baaba baliindi be silibwa bara chirupia choosi chichareerwa mu Lukaangu lwa Wele Omunyali Owa Bioosi mu lisanduku.

¹⁰Buli lwosi nga chirupia ne chakuchanga mu lisanduku, omuandiki owo mwami no Musaayi Omukhulu Lukali bechanga ne babala mala ne baboa kimifuko kie chirupia chichaba munju eya Wele Omunyali Owa Bioosi.

¹¹Enyuma wako baelesianga chirupia nicho bakelile khu bakholi be kimilimo mu Lukaangu ne lundi charuungwanga khu babeechi be chimbao ne babombakhi.

¹²Lundi baruunganga chirupia echo khu babeechi be kamabaale. Chirupia echo lundi bakulila kamabaale kamabeeche ne chimbao che khung'oona Lukaangu niio lwonekha, ne bibiindi bioosi bioosi bibienyekha.

¹³Kakhaba kario, chirupia se charumikhwakho mu khung'oona bikoombe bie efwesa, bibuumba, chikhoombi, namwe bibiindu bie khukhwimiakho chitaa, namwe sisiindu siosi siosi sie efwesa namwe sie esahabu tawe.

¹⁴Sikila bioosi biarumikhwa khuruunga bakholi be kimilimo ne khukula bibiindu birumikha mu khung'oona niio Lukaangu lwonekha.

¹⁵ Babaandu babemeelela kimilimo baba babeyikinwa lukali, khwako se babareeba bekesie nga barumikhira chirupia tawe.

¹⁶ Chirupia chichaanwa khu biianwa bie bumayaanu ne biianwa bie kamakhiikha se chareerwa mu Lukaangu tawe, chaba che basaayi.

¹⁷Mu biise ebio, omwami Hasaeli owa Shamu ebwaakala lukoba lwa Katihi mala aluula. Ne ebaasia khucha khukhwibwaakala Yerusalemu.

¹⁸Omwami Yoashi owa Yuda abukula bibiindu bitakatifu bioosi nibio bakuuka bewe Yehoshafati, Yehoramu ne Ahasia baana bara alubeka nga bitakatifu mala abiyila khu Hasaeli akhaba bibiindu biewe omwene bitakatifu ne esahabu yoosi eyanyoolekhana mu libiikhilo lie enju eya Wele Omunyali Owa Bioosi ne mu lichipi liewe. Nio Hasaeli arekukha arura Yerusalemu.

¹⁹Nono bikholwa bibiindi bioosi bio omwami Yoashi ne koosi niko akhola biaandikwa mu sitabu sie chingano che Babaami ba Yuda.

²⁰Banamae babemeelesi bo mwami Yoashi bamukwangwaanila mala bereera Yoashi munju eye kimiliinda kikiikha e Sila.

²¹Aaba Yosakari okhwa Shimeati ne Yehosabadi okhwa Shomeri, banamae bewe babili nibo babamwiira. Yoashi asiikhwa mu biliindwa bie babaami mu Lukoba lwa Daudi. Ne omusoleeli wewe Amasia amiia mu bweyaangu bwewe nga omwami.