Read lubukusu 2 Bab. 13 Bible Online

2 Bab. 13 - lubukusu bible

2 Bab. 13

¹Mu mwiiko kukhola kamakhumi kabili na kitaru kwe khukhwamiia khwa Yoashi okhwa Ahasia nga omwami owa Yuda, Yehoahasi okhwa Yehu arakikha khukhwamiia Isiraeli. Amiia Isiraeli ne ali mu Samaria khulwe kimiiko likhumi ne saba.

²Yehoahasi akhola bumayaanu ebweeni wa Wele Omunyali Owa Bioosi. Aloonda bumayaanu bwa Yeroboamu okhwa Nebati. Yeroboamu akhola Isiraeli bakholela Wele Omunyali Owa Bioosi bumayaanu. Yehoahasi se alekha bumayaanu obwo tawe.

³Ne Wele Omunyali Owa Bioosi aambila Isiraeli lirima mala abara mu bunyali bwa Hasaeli omwami owa Shamu no musoleeli wewe Beni-hadadi.

⁴Nio Yehoahasi asaaya khu Wele Omunyali Owa Bioosi, mala Wele Omunyali Owa Bioosi akobosia lisaaya liewe. Kaba kario sikila Wele Omunyali Owa Bioosi abona bumiinikhi bwa Isiraeli ne lundi nga omwami owa Shamu ne abanaania.

⁵Nono Wele Omunyali Owa Bioosi arumira Isiraeli omuonia, owabarusia mu munaanio kwe Bashamu. Nio Baisiraeli bamenya mu chingo chabwe nga ekhunyoa.

⁶Ne kakhaba kario, Baisiraeli se balekha bumayaanu nibwo omwami Yeroboamu abayilamo tawe, ne kakhali bachiililila khubukhola ne sifwaani sia wele owe siikhasi Ashera siarama mu Samaria.

⁷Yehoahasi saba ne banamae tawe ne bakhali banamae be chifarasi kamakhumi karaano, kamakaari ke liie chielefu ekhumi ne banamae bakeendela bikele busa chielefu ekhumi, kaba kario sikila omwami owa Shamu abeera abamala, aabaswalakilila nga lufuumbi abuulilo.

⁸Nono bikholwa bibiindi bioosi bia Yehoahasi ne koosi niko akhola, ne bikholwa biewe bioosi bie bunyindaafu biaandikwa mu sitabu sie chingano che Babaami ba Isiraeli.

⁹Afwa mala asiikhwa mu Samaria. Nio omusoleeli wewe amiisibwa mu bweyaangu bwewe nga omwami.

¹⁰Mu mwiiko kukhola kamakhumi kataru ne kimiiko saba kie bubwami bwo mwami Yoashi owa Yuda, Yehoashi okhwa Yehoahasi amiisibwa nga omwami owa Isiraeli. Amiia Isiraeli ne ali mu Samaria khulwe kimiiko ekhumi na sita.

¹¹Yesi akhola bumayaanu khu Wele Omunyali Owa Bioosi nga omwami Yeroboamu ne akhola khulwe khuyila Isiraeli mu bumayaanu.

¹²Nono bikholwa bibiindi bioosi nibio Yehoashi akhola, alala ne bikholwa biewe bie bunyindaafu mu liie nga ne apana no mwami Amasia owa Yuda biaandikwa mu sitabu sie chingano che Babaami ba Isiraeli.

¹³Nono Yehoashi afwa mala asiikhwa mu biliindwa bie babaami mu Samaria. Omusoleeli wewe Yeroboamu owe khabili amiisibwa mu bweyaangu bwewe aba omwami.

¹⁴ Omung'oosi Elisha alwala lukali. Ne nga aba ne ali embi khufwa omwami Yehoashi owa Isiraeli acha khumubona mala alila ne aloma ali, “Paapa, paapa ewe wabeele omuliindi owa Isiraeli!”

¹⁵Elisha amuboolela ali, “Bukula luyingo ne buembo.” Ne Yehoashi abibukula.

¹⁶Nio Elisha amuboolela ali, “Yirekekha khulasa.” Omwami akhola ario mala Elisha ara kamakhono kewe khu kio mwami.

¹⁷Ne Elisha aboolela Yehoashi ali, “Yikula enuma lubeka lwe ebukwe.” Yehoashi ekula. Nio amuboolela ali, “Lasa luembo!” Alasa. Ne Elisha aloma ali, “Luembo lwa Wele Omunyali Owa Bioosi lwe bukhili, luembo lwe bukhili khu Shamu! Oliipana ne Bashamu mu Afweki khukhwola nga ne obaula.”

¹⁸Nono Elisha aboolela omwami abukule buembo bubuundi mala abulase asi khu liloba. Omwami alasa asi khu liloba khukhwola khataru, mala alekha.

¹⁹Nio Elisha amuambila lirima, mala aboolela omwami ali, “Andi olasile khukhwola kharaano namwe sita, andi wakhakhiliile elala Bashamu. Ne kakhali nono olabaula busa khataru khong'ene.”

²⁰Elisha afwa mala asiikhwa. Buli kumwiiko bipupu bie banuuli bie Bamoabu biengililanga bibwaakala sibala sia Isiraeli.

²¹Siise silala omundu aba alikho asiikhwa. Silala khu bipupu bie banuuli chana siabonekha, mala babaandu abo bamwaata kumubili kwo omundu oyo mu siliindwa sia Elisha mala belukha. Nga kumubili kwo omundu oyo ne kwetiila khu bikuumba bia Elisha, omundu oyo alamukha mala enyokha eema.

²²Nono omwami Hasaeli owa Shamu anaania Baisiraeli mu bwami bwa Yehoahasi bwoosi.

²³Ne kakhali Wele Omunyali Owa Bioosi aba omulayi lundi owe siisa khu nibo. Se alekha babunisibwa tawe. Abakhebulila sikila endakaano yewe ne Aburahamu, Isaaka ne Yakobo. Se ebilila babaandu bewe tawe. Akhaba khukhwola luno Wele Omunyali Owa Bioosi akhalekha Isiraeli tawe.

²⁴Nga Hasaeli omwami owa Shamu ne afwa, Beni-hadadi, omusoleeli wewe amiia mu bweyaangu bwewe.

²⁵Nio Yehoashi okhwa Yehoahasi lundi abukula khukhwama khu Beni-hadadi okhwa Hasaeli chingoba nicho abukula khukhwama khu Yehoahasi raraawe.