Read lubukusu 2 Bab. 14 Bible Online

2 Bab. 14 - lubukusu bible

2 Bab. 14

¹Mu mwiiko kwe khabili kwe khukhwamiia khwa Yehoashi okhwa Yehoahasi nga omwami owa Isiraeli, Amasia okhwa Yoashi arakikha khukhwamiia Yuda.

²Arakikha khukhwamiia ne ali ne bukhulu bwe kimiiko kamakhumi kabili na kiraano. Ne amiia ne ali mu Yerusalemu kimiiko kamakhumi kabili na tisa. Maayi wewe aba Yehoadini khukhwama Yerusalemu.

³Akhola kasiimisia Wele Omunyali Owa Bioosi ne kakhali se aba nga omwami Daudi kukaawe tawe. Akhola niko Yoashi, raraawe aba ne akhola.

⁴Se atechula abuundu aesuta tawe. Babaandu bachiililila khuaana chimbosio ne khukhwosielayo biiunya bulayi.

⁵Nga Amasia ne anyoola bunyali busa ari, eera banamae bewe babeera omwami, raraawe.

⁶ Ne kakhaba kario se eera babaana babwe tawe. Akhola ario khuloondekhana nende liliaandikwa mu sitabu sie kamalaka sia Musa. Mu malaka omwo Wele Omunyali Owa Bioosi alaka ali, “Ba paapa se beerwa khulwe kamakhiikha niko babaana babwe bakhola tawe. Ne babaana se beerwa khulwe kamakhiikha ke bapaapa babwe tawe. Ne kakhali omundu eerwa khulwe kamakhiikha niko niye omwene akholile.”

⁷Amasia eera banamae ba Edomu chielefu ekhumi mu litooma lie kumuunyu. Aamba lukoba lwa Sela mu liie mala alutiuukha ali Yokiteli. Lukoba olwo lusilaangwa lurio khukhwola luno.

⁸Nio Amasia aruma barumwa khu mwami Yehoashi owa Isiraeli okhwa Yehoahasi (Yehoahasi aba okhwa Yehu) ne amuachilisia ali “yiicha khupane.”

⁹Ne Yehoashi arumira Amasia, omwami owa Yuda likhuwa ali, “Sichakha sie kamawa khu Bikulu bia Lebanoni siaruma burume khu mutarakwa sili, ‘Lekhuula omukhaana wowo akhwalikhe khu musoleeli wase,’ Esaang'i eye Lebanoni yabirao mala yaswalakilila sichakha.

¹⁰Luno Amasia, ewe waulile Baedomu. Ne liakilile welolile. Nyalikha ne efuma niyo oli ne nayo mala wikhale engo wowo. Siina sikila ne wenya khukhwirerera butinyu bucha khukhurerera libuna ewe ne babaandu bowo Bayuda?”

¹¹Ne kakhali Amasia aloba khurekeeresia. Nio omwami Yehoashi owa Isiraeli arekukha acha mala apana ne Amasia e Beti-shemesi eya Yuda.

¹²Isiraeli yaula Yuda, mala banamae bewe belukha bakobola buli mundu mungo mwewe.

¹³Yehoashi aamba Amasia nga omuboe acha ne naye mala aula Yerusalemu. Engilamo atechula lisiisi lie lukoba khukhwama a silibwa sia Efuraimu khukhwola khu silibwa sie khundulo, buleeyi bwe bikele chimia chine.

¹⁴Abukula efwesa yoosi ne esahabu ne bibiindu bioosi nibio anyoola munju eya Wele Omunyali Owa Bioosi ne libiikhilo lie mwichipi lio omwami. Lundi aamba babaandu embaambe mala akobola Samaria.

¹⁵Nono bikholwa bibiindi bioosi bia Yehoashi nibio akhola ne bunyindaafu bwewe, lundi nga ne apana ne omwami Amasia owa Yuda biaandikwa mu sitabu sie chingano che babaami ba Isiraeli.

¹⁶Yehoashi afwa mala asiikhwa mu biliindwa bie babaami mu Samaria. Omusoleeli wewe Yeroboamu owe Khabili amiisibwa mu bweyaangu bwewe aba omwami.

¹⁷Omwami Amasia owa Yuda amenya kimiiko ekhumi na kiraano enyuma we lifwa lio mwami Yehoashi owa Isiraeli.

¹⁸Nono bikholwa bibiindi bioosi nibio Amasia akhola biaandikwa mu sitabu sie chingano che babaami ba Yuda.

¹⁹Ekwangwaani yakholwa mu Yerusalemu eye khukhwira Amasia. Nio elukhila mu lukoba lwa Lakishi. Ne kakhali basiku bewe bamuloondakho mala bamwirirayo.

²⁰Basutila kumubili kwewe khu farasi bakukobosia e Yerusalemu, mala bamusiikha mu lukoba lwa Daudi.

²¹Nio babaandu boosi ba Yuda babukula Asaria omwana wewe omusoleeli owe kimiiko ekhumi na sita, bamwamiisia aba omwami mu bweyaangu bwa raraawe.

²²Asaria ombakha Elati mala alukobosiela Yuda enyuma we lifwa lia raraawe.

²³Mu mwiiko kukhola ekhumi ne kiraano kie bubwami bwa Amasia, okhwa Yoashi omwami owa Yuda, Yeroboamu owe Khabili okhwa Yoashi amiisibwa aba omwami owa Isiraeli. Ne amiia ne ali mu Samaria kimiiko kamakhumi kane na mulala.

²⁴Akhola bumayaanu khu Wele Omunyali Owa Bioosi. Se alekhela elala bumayaanu bwo mwami Yeroboamu okhwa Nebati nibwo arangirira Isiraeli yakhola tawe.

²⁵ Akobosiela Isiraeli lulwakha khukhwama mu silibwa sia Hamati khubira e bunaswa khukhwola khu nyanja eya Araba ebunafubo. Lino liaba lirio khuloondekhana ne lomo eya Wele Omunyali Owa Bioosi, Wele owa Isiraeli niyo aloma khubirira khu mukholi wewe omung'oosi Yona okhwa Amitai khukhwama e Kati-heferi.

²⁶Wele Omunyali Owa Bioosi abona ali linaanisibwa liaba likali khu Baisiraeli. Se abao mulala owalekhwa akhaba nasioobi namwe omulekhuule tawe. Ne mbao owabao khuyeeta Isiraeli tawe.

²⁷Ne kakhali Wele Omunyali Owa Bioosi se aloma ali acha khubunisilia elala Isiraeli khulwa mindali na mindali tawe. Khwako abareesia khubirira khu mwami Yeroboamu owe khabili.

²⁸Nono bikholwa bibiindi bioosi nibio Yeroboamu owe khabili akhola, ne bunyindaafu bwewe nga ne apana, mala akobosia khu Isiraeli chingoba cha Damasika ne Hamati, choosi chichaba cha Yuda, bioosi biaandikwa mu sitabu sie babaami ba Isiraeli.

²⁹Yeroboamu owe Khabili afwa mala asiikhwa mu biliindwa bie babaami ba Isiraeli. Ne omusoleeli wewe Sakaria amiisibwa mu bweyaangu bwewe aba omwami.