Read lubukusu 2 Bab. 15 Bible Online

2 Bab. 15 - lubukusu bible

2 Bab. 15

¹Mu mwiiko kukhola kamakhumi kabili na saba kwe bubwami bwo mwami Yeroboamu owe Khabili owa Isiraeli, Asaria okhwa Amasia amiisibwa aba omwami owa Yuda.

²Aba ne bukhulu bwe kimiiko ekhumi na sita, mala amiia ne ali mu Yerusalemu khulwe kimiiko kamakhumi karaano na kibili. Maayi wewe aba Yekolia khukhwama Yerusalemu.

³Asaria aloonda raraawe mu khukhola kasiimisia Wele Omunyali Owa Bioosi.

⁴Ne kakhaba kario se arusiao abuundu aesuta tawe. Ne babaandu bachiililila khuanilayo chimbosio ne khukhwosia biiunya kumuya kumulayi.

⁵Wele Omunyali Owa Bioosi aelesia Asaria bulwaale bwe kamakele, alwala khulwe bulamu bwewe bwoosi. Amenya munju yeng'ene. Ne omusoleeli wewe Yotamu emeelela be enju eyo mwami Asaria ne khukhwimeelela babaandu be mu sibala esio.

⁶Nono bikholwa bibiindi bioosi bia Asaria ne koosi niko akhola biaandikwa mu sitabu sie chingano che babaami ba Yuda.

⁷Nio Asaria afwa mala asiikhwa mu biliindwa bie babaami mu Lukoba lwa Daudi. Ne omusoleeli wewe amiisibwa aba omwami.

⁸Mu mwiiko kukhola kamakhumi kataru na munaane kwe bubwami bwo mwami Asaria owa Yuda, Sakaria okhwa Yeroboamu owe Khabili amiisibwa aba omwami owa Isiraeli. Amiia ne ali mu Samaria khulwe kimieesi sita.

⁹Akholela Wele Omunyali Owa Bioosi bumayaanu nga bakuuka bewe ne bakhola. Se alekha bumayaanu bwa Yeroboamu nibwo arangirira Isiraeli khukhola tawe.

¹⁰Shalumu okhwa Yabesi akholela omwami Sakaria ekwangwaani amwirira e Ibuleamu, mala akobola mu bweyaangu bwewe nga omwami.

¹¹Nono bikholwa bibiindi bioosi nibio Sakaria akhola biaandikwa mu sitabu sie chingano che babaami ba Isiraeli.

¹² Lino nilio liliaba lilaka lia Wele Omunyali Owa Bioosi khu mwami Yehu lili, “Be enju yowo khukhwama luno khukhwola khu selukho eye khane baliba babaami ba Isiraeli.” Liaba ng'ali.

¹³Mu mwiiko kukhola kamakhumi kataru na tisa kwe bubwami bwo mwami Usia owa Yuda, Shalumu okhwa Yabesi amiisibwa aba omwami owa Isiraeli. Ne amiia ne ali mu Samaria khulwe kumwesi mulala.

¹⁴Nio Menahemu okhwa Kati ama Tirisa acha Samaria. Eera Shalumu mala akobola mu bweyaangu bwewe nga omwami.

¹⁵Nono bikholwa bibiindi bioosi nibio Shalumu akhola alala ne sikholwa sie ekwangwaani yewe biaandikwa mu sitabu sie chingano che babaami ba Isiraeli.

¹⁶Mu siise nisio Menahemu aba ne ali khu lukeendo lwewe lwe khukhwama Tirisa khuchiililila, abunisilila elala lukoba lwa Tapua, babamenyamo nende be mu sibala sisialubotookhelesia. Kaba kario sikila be mu lukoba se bafukiilila bubwami bwewe tawe. Lundi atabulaka chinda che bakhasi baesiisie boosi.

¹⁷Mu mwiiko kukhola kamakhumi kataru na tisa kwe bubwami bwo mwami Usia owa Yuda, Menahemu okhwa Kati amiisibwa aba omwami owa Isiraeli. Ne amiia ne ali mu Samaria khulwe kimiiko likhumi.

¹⁸Akhola bumayaanu khu Wele Omunyali Owa Bioosi. Mu limenya liewe lioosi se alekhakho bumayaanu bwa Yeroboamu bwoosi nibwo arangirira Isiraeli khukhola tawe.

¹⁹Omwami Puli owa Ashuru ebwaakala Isiraeli mala Menahemu amuelesia chitani eelefu ndala che efwesa nio anyoole buyeeti bwe khutasa kamaani khu Menahemu khukhila sibala. (Omwami Puli lundi alaangwa ali Tikilati Pileseri).

²⁰Menahemu anyoola chirupia khukhwama khu baandu baiinda ba Isiraeli boosi khulwe busuuru. Buli mulala arusia bitonyi kamakhumi karaano bie efwesa. Nio aelesia Puli omwami owa Ashuru. Nio omwami owa Ashuru akobolayo ne se amenya mu sibala esio tawe.

²¹Nono bikholwa bibiindi bioosi bia Menahemu ne koosi niko akhola biaandikwa mu sitabu sie chingano che babaami ba Isiraeli.

²²Menahemu afwa mala omwana wewe Pekahia ela mu bweyaangu bwewe aba omwami.

²³Mu mwiiko kukhola kamakhumi karaano kwe bubwami bwo mwami Usia owa Yuda Pekahia okhwa Menahemu amiisibwa aba omwami owa Isiraeli. Amiia Isiraeli ne ali mu Samaria khulwe kimiiko kibili.

²⁴Akhola bumayaanu khu Wele Omunyali Owa Bioosi. Se alekha bumayaanu bwo mwami Yeroboamu okhwa Nebati nibwo akhola khulwe khurangirira Isiraeli abengisia mu bumayaanu tawe.

²⁵Peka okhwa Remalia, omunamae omukhulu owe banamae ba Pekahia, akhola ekwangwaani ne babaasie kamakhumi karaano khukhwama Kileati. Nio bereera Pekahia mwichipi, mukari mwe lisiisi lie lukoba, mu Samaria. Nio amiia ela mu bweyaangu bwa Pekahia aba omwami.

²⁶Nono bikholwa bibiindi bioosi bia Pekahia, ne koosi niko akhola biaandikwa mu sitabu sie chingano che Babaami ba Isiraeli.

²⁷Mu mwiiko kukhola kamakhumi karaano na kibili kwe bubwami bwo mwami Asaria owa Yuda, Peka okhwa Remalia amiisibwa aaba omwami owa Isiraeli. Amiia Isiraeli ne ali mu Samaria khulwe kimiiko kamakhumi kabili.

²⁸Akhola bumayaanu ebweeni wa Wele Omunyali Owa Bioosi. Se alekha bumayaanu bwo mwami Yeroboamu okhwa Nebati, nibwo arangirira Isiraeli khukhola tawe.

²⁹Mu ndaalo cha Peka omwami owa Isiraeli, Tikilati Pileseri omwami owa Ashuru aamba chingoba cha Iyoni, Abeli Beti, Maaka, Yanoa, Kedeshi ne Hasori ne bibala bia Kileati, Kalilaya ne Nafutali mala abukula babaandu acha ne nabo e Shamu nga baboe.

³⁰Mu mwiiko kukhola kamakhumi kabili kwe bubwami bwa Yotamu okhwa Asaria nga omwami owa Yuda, Hoshea okhwa Ela akholela omwami Peka ekwangwaani amwiira mala abukula bubweyaangu bwewe aba omwami.

³¹Bikholwa bibiindi bioosi bia Peka, ne koosi niko akhola biaandikwa mu sitabu sie chingano che babaami ba Isiraeli.

³²Mu mwiiko kukhola khabili kwe bubwami bwa Peka okhwa Remalia nga omwami owa Isiraeli, Yotamu okhwa Usia amiisibwa aba omwami owa Yuda.

³³Amiia ne ali ne bukhulu bwe kimiiko kamakhumi kabili na kiraano. Amiia ne ali mu Yerusalemu khulwe kimiiko ekhumi na sita. Maayi wewe aba Yerusha, omukhaana owa Satoki.

³⁴Akhola kaali kamalayi khu Wele Omunyali Owa Bioosi nga Usia raraawe ne akhola.

³⁵Kakhaba kario, abuundu aesuta se onakwa tawe. Babaandu bachiililila khuaana chimbosio ne khukhwosielayo bibiindu biiunya bulayi. Yotamu niye owombakha silibwa sie engaaki sie Lukaangu.

³⁶Nono bikholwa bibiindi bioosi bia Yotamu ne koosi niko akhola biaandikwa mu sitabu sie chingano che babaami ba Yuda.

³⁷Mu ndaalo echo Wele Omunyali Owa Bioosi arakikha khuruma omwami Resini owa Shamu no mwami Peka owa Isiraeli khukhwibwaakala Yuda.

³⁸Yotamu afwa mala asiikhwa mu biliindwa bie bubwami mu Lukoba lwa Daudi. Ne omusoleeli wewe Ahasi aba omwami mu bweyaangu bwewe.