Read lubukusu 2 Bab. 16 Bible Online

2 Bab. 16 - lubukusu bible

2 Bab. 16

¹Mu mwiiko kukhola ekhumi na saba kwe bubwami bwa Peka okhwa Remalia omwami owa Isiraeli, Ahasi okhwa Yotamu amiia aba omwami owa Yuda.

²Amiia ne ali ne bukhulu bwe kimiiko kamakhumi kabili. Amiia ne ali mu Yerusalemu khulwe kimiiko ekhumi na sita. Se akhola kasiimisia Wele Omunyali Owa Bioosi nga Daudi ne akhola tawe.

³ Ne kakhali aloonda chingila che babaami ba Isiraeli. Lundi osia omusoleeli wewe nga siianwa sie khukhwosia. Ekelaasia khu likhola lie khusinya lie babaandu nibo Wele Omunyali Owa Bioosi aba aoona arusia mu sibala nga Baisiraeli ne baba ne balikho becha.

⁴Lundi aana chimbosio ne khukhwosia bibiindu biiunya bulayi abuundu aesuta, ne khu bikulu ne asi wa buli murongooro.

⁵ Omwami Resini owa Shamu no mwami Peka owa Isiraeli babotookhelesia Yerusalemu ne se banyala khuula Ahasi tawe.

⁶(Mu biise ebio ne bibieene omwami owa Edomu akobosia lukoba lwa Elati, mala aoona babaandu ba Yuda babamenyamo baruramo. Baedomu bengila mu Elati bamenyamo khukhwola luno.)

⁷Ahasi aruma babaandu khu Tikilati Pileseri, omwami owa Ashuru, ne burume ali, “Ese ndi omukholi wowo lundi omwana wowo. Yiicha undeesie khukhwama khu baami ba Shamu ne Isiraeli balikho banjibwaakala.”

⁸Ahasi abukula efwesa ne esahabu khukhwama mu Lukaangu ne mu libiikhilo lie mwichipi mala abirumira omwami owa Ashuru nga siianwa.

⁹Tikilati Pileseri mu khukobosia lilila lia Ahasi arekukha acha khukhwibwaakala Damasika aluaamba. Era omwami Resini mala aamba babaandu abayila Kiri nga baboe.

¹⁰Nga omwami Ahasi ne acha Damasika khukhwakaanana no mwami Tikilati Pileseri, abona ebweeneyo alutare mala aruma engo khu omusaayi Uria sifwaani sia alutare eyo ne bibiindu biloondekhana nasio bioosi.

¹¹Nio Uria ombakha alutare efwaana nga eyo mala akimala Ahasi ne akhakobola tawe.

¹²Oli Ahasi akobola khukhwama Damasika, abona alutare. Esenda siimbi ne alutare eyo mala akiniinakho.

¹³Nio omwami osielakho biianwa bie khukhwosia nende bie biakhulia. Lundi achukhakho biianwa bie khunywa ne kamalasile ke biianwa bie kumuleembe.

¹⁴ Arusia alutare eye kumukasa eya Wele Omunyali Owa Bioosi khukhwama ebweeni we enju eya Wele Omunyali Owa Bioosi. Alutare eyo yaba akari we enju eya Wele Omunyali Owa Bioosi ne alutare yewe. Nga akirusiao, akira ebunaswa wa alutare yewe.

¹⁵Ne omwami Ahasi alaka Uria omusaayi ali, “Yosiela khu alutare emboofu biianwa bie khukhwosia bie kumutikhinyi, ne biianwa bie biakhulia bie ekolooba ne biianwa bie khukhwosia bio mwami nende bie biakhulia. Lundi yosielakho biianwa bie khukhwosia bie babaandu boosi be sibala nende bie biakhulia nende bie khunywa biabwe. Chukha khu alutare eyo kamalasile koosi ke biianwa bie khukhwosia ne kamalasile koosi ke chimbosio. Ne ekhali alutare eye kumukasa elaba eyase niyo ndeberamo bulakusi.”

¹⁶Uria omusaayi akhola kano koosi nga omwami Ahasi ne amulaka.

¹⁷ Omwami Ahasi akhala bituumi bie endebe eye bubwami mala arusia endebe eyo khukhwama khueeyi che kumukasa chichaba asi wayo. Nio akira mu bwaalo bwe kamabaale.

¹⁸Ne engila eye sabato niyo bombakha mwichipi mukari ne silibwa sisiingila mukari bioosi arusiao munju eya Wele Omunyali Owa Bioosi sikila omwami owa Ashuru.

¹⁹Nono bikholwa bibiindi bioosi bia Ahasi, nibio akhola biaandikwa mu sitabu sie chingano che babaami ba Yuda.

²⁰ Ahasi afwa mala asiikhwa mu biliindwa bie babaami mu Lukoba lwa Daudi. Nio omusoleeli wewe Hesekia amiia mu bweyaangu bwewe.