Read lubukusu 2 Bab. 17 Bible Online

2 Bab. 17 - lubukusu bible

2 Bab. 17

¹Mu mwiiko kukhola ekhumi na kibili kwe bubwami bwo mwami Ahasi owa Yuda, Hoshea okhwa Ela amiisibwa aaba omwami owa Isiraeli. Ne amiia Isiraeli ne ali mu Samaria khulwe kimiiko tisa.

²Akholela Wele Omunyali Owa Bioosi bumayaanu. Kakhaba kario, se bwaba bukali nga bwe babaami babamiia Isiraeli ebweeni wewe tawe.

³Omwami Shalumaneseri owa Ashuru apana ne naye mwiie. Hoshea aba asi owa Shalumaneseri mala amuruunga busuuru buli kumwiiko.

⁴Ne kakhali kumwiiko mulala Hoshea aruma barumwa khu So, omwami owa Misiri ne amureeba buyeeti mala alekha khuruunga busuuru khu Ashuru bwa buli mwiiko. Nga Shalumaneseri amanya lino aamba Hoshea mala amura mu siboe.

⁵Nono omwami Shalumaneseri ebwaakala Isiraeli mala engila mu Samaria. Khulwe kimiiko kitaru, Shalumaneseri abotookhelesia mala ebwaakala Samaria.

⁶Mu mwiiko kukhola tisa kwe bubwami bwa Hoshea, omwami owa Ashuru[14] aamba Samaria abukula Baisiraeli abayila Ashuru nga baboe. Ne balala abara bamenye mu lukoba lwa Hala ne babaandi mu ngingi che luluuchi lwa Habori e Kosani ne babaandi mungoba cha Medesi.

⁷Samaria lwakwa sikila Baisiraeli bakholela Wele Omunyali Owa Bioosi, Wele wabwe bumayaanu. Wele Omunyali Owa Bioosi niye owabareera khukhwama Misiri, mu bunyali bwa Farao. Ne kakhali Baisiraeli baelesia lukoosi bawele babaandi.

⁸Baloonda kimiima kie babaandu be chikholo nibo Wele Omunyali Owa Bioosi aba ne aoona barura mu sibala. Bamenya nga babaami babwe bamayaanu babekesia khumenya.

⁹Baisiraeli bakhola bumayaanu khu Wele Omunyali Owa Bioosi Wele wabwe mu bwikisi. Beyombakhila abuundu aesuta mu ngoba choosi khukhwamila khu ndeleelwa khukhwola khu ngoba chisire.

¹⁰ Khu bikulu bioosi ne asi mu siniini sia buli kumurongooro kwe kamasaafu bemisiamo chinjeko che kamabaale ne bifwaani bia Ashera.

¹¹Ne bosielia bibiindu biiunya kumuuya kumulayi abuundu aesuta oosi nga be chikholo nibo Wele aoona barura mu maloba bakholanga. Baambia Wele Omunyali Owa Bioosi lirima ne bikholwa biabwe bimayaanu.

¹²Ne basikamilanga bifwaani nibio Wele Omunyali Owa Bioosi aba ne abakaania ali “Mukhakhola kano tawe.”

¹³Wele Omunyali Owa Bioosi aba akaania Isiraeli khubirira khu buli omung'oosi nende buli omuloli. Aloma ali, “Lekha chingila chenywe chimayaanu mala murie kamalaka kase kaali mu lilaka nilio naelesia bakuuka benywe, niko namwakaanisia enywe khubirira khu bakholi base bang'oosi.”

¹⁴Ne kakhali Baisiraeli se baulila kano tawe. Baba baminyi nga bakuuka babwe ne bakhasuubila Wele Omunyali Owa Bioosi, Wele wabwe tawe.

¹⁵Balekelesia kamalaka kewe ne endakaano yewe niyo akhola ne bakuuka babwe mala balekelesia ne likaania liewe. Basikamila bifwaani biikhali ne bung'ali tawe mala babene bosi bekela bakhali ne bung'ali tawe. Ne baloonda kimiima kie chikholo chichababotookhelesia nicho yaba Wele Omunyali Owa Bioosi abalaka ali bakhabaloonda tawe.

¹⁶ Balekha kamalaka koosi ka Wele Omunyali Owa Bioosi, Wele wabwe mala bakhola bifwaani bie chimoosi bibili. Lundi bakhola sifwaani sia Ashera, mala basikamila ching'enieesi ne khukholela wele Baali.

¹⁷ Boosia babaana babwe basoleeli ne bakhaana nga biianwa bie khukhwosia mala bakhola bufumu ne bulosi, mala beyikusia babeene khulwe khukhola bumayaanu mumoni cha Wele Omunyali Owa Bioosi mala bamuambia lirima.

¹⁸Nono Wele Omunyali Owa Bioosi aambila Baisiraeli lirima likali mala abarusia mumoni chewe, alekha ekholo eya Yuda yong'ene.

¹⁹Ne babaandu ba Yuda bosi se baria kamalaka ka Wele Omunyali Owa Bioosi, Wele wabwe tawe. Bekelaasia khu miima nikio banyoola khukhwama khu baandu ba Isiraeli.

²⁰Nono Wele Omunyali Owa Bioosi aloba Baisiraeli boosi, abaelesia kumunaanio mala abalekhuulila banuuli mala ekhumaliilikha abarusia mumoni chewe.

²¹Enyuma wa Wele Omunyali Owa Bioosi khukhwabukhasia Isiraeli khukhwama khunju eya Daudi, Baisiraeli bamiisia Yeroboamu okhwa Nebati aaba omwami wabwe. Yeroboamu abakhola banjukha Wele Omunyali Owa Bioosi mala abaraangirira bakhola bumayaanu bukali.

²²Baisiraeli baloonda Yeroboamu mala bachiililila khukhola chingano choosi che bumayaanu nibwo niye akhola ne se balekhakho tawe.

²³Ekhumaliilikha Wele Omunyali Owa Bioosi abaana khukhwama ebweeni wewe, nga aba ne abakaania khubirira mu bakholi bewe bang'oosi ali alikhola. Nio babaandu ba Isiraeli babukulwa bayilwa mu mbaambe Ashuru niio basimenyile khukhwola luno.

²⁴Omwami owa Ashuru abukula babaandu khukhwama mu ngoba cha Babiloni, Kuta, Afa, Hamati ne Sefaribaimu. Abengisia mu ngoba cha Samaria, mu bweyaangu bwe Baisiraeli babayilwa mu mbaambe. Babukula chingoba echo chaba chichabwe mala bachimenyamo.

²⁵Mu khunyoa khwe khumenyayo khwabwe, se basaaya Wele Omunyali Owa Bioosi tawe. Nio Wele Omunyali Owa Bioosi abarumira chitalang'i mala chera balala khu nibo.

²⁶Omwami owa Ashuru aboolelwa ali wele arumire chitalang'i chilikho chiira babaandu babengisia chingoba cha Samaria sikila babaandu abo se bamanya lilaka lia wele owe sibala esio tawe.

²⁷Nio omwami owa Ashuru alaka ali, “Rumayo mulala khu basaayi baboe nibo mwareerire, mumukobosieyo[15] mala ache amenyeyo nio okesie babaandu lilaka lia wele we sibala esio.”

²⁸Nio mulala khu basaayi nibo bareera khukhwama Samaria acha mala amenya Beteli, ekesielayo babaandu nga banyala basaaya Wele Omunyali Owa Bioosi.

²⁹Ne kakhali be chikholo babengisia mu Samaria bachiililila khukhola bifwaani biabwe mala babira abuundu aesuta niio Baisiraeli ba Samaria baba ne bombakha. Buli ekholo yachiililila khukhola bifwaani bia wele wayo. Bifwaani ebio babira mu namwima che abuundu aesuta niio Baisiraeli ba Samaria bakhola. Buli ekholo yara bifwaani ebio mungoba nicho yamenyamo.

³⁰Babaandu ba Babiloni bakhola bifwaani bia wele Sukoti-Benoti, babaandu ba Kuti bakhola bifwaani bia Nerigali, babaandu ba Hamati bakhola bifwaani bia Ashima.

³¹Babaandu ba Abi nabo bakhola bifwaani bia Nibuhasi ne Taritaki, ne babaandu ba Sefaribaimu bosia babaana babwe nga chimbosio khu wele babwe Atrameleki ne Anameleki.

³²Lundi babaandu abo basaaya Wele Omunyali Owa Bioosi ne kakhali barobora babaandu khukhwama mu nibo babeene, bakhola kimilimo nga basaayi ne babaandu chingano na ngano babaana chimbosio a namwima che abuundu aesuta.

³³Nio basaaya Wele Omunyali Owa Bioosi. Ne kakhali basaaya akhaba bawele babwe khuloondekhana ne kimiima kie bibala nibio bamamo.

³⁴ Babaandu bano bachiililila ne kimiima kiabwe kie khale khukhwola luno. Se basaayanga Wele Omunyali Owa Bioosi namwe se barichanga kamalaka niko aelesia lisaaye lia Yakobo, niye atiuukha ali Isiraeli tawe.

³⁵ Wele Omunyali Owa Bioosi aba akhola endakaano ne Baisiraeli ne abalaka ali, “Mukhasaaya bawele babaandi tawe. Mukhabenamila namwe mwabakholela, namwe mwabaanila chimbosio tawe.

³⁶ Ne kakhali mularia Wele Omunyali Owa Bioosi owamurusia e Misiri ne bunyali bukali ne kamaani. Mulamwinamila niye ne khumuaanila niye chimbosio.

³⁷Buli lwosi mulikhola khuloondekhana nende kamalaka ne liilakiilisia nilio aamuandikila enywe. Mukhasikamila bawele babaandi tawe.

³⁸Ne mukhebilila endakaano niyo nakhola ne nanywe tawe.

³⁹Ne kakhali mulasaaya ese, Wele Omunyali Owa Bioosi, Wele wenywe, ne ese ndamureesia khukhwama khu basiku benywe boosi.”

⁴⁰Ne kakhaba kario, Baisiraeli se barekeeresia tawe. Bachiililila khuloonda kimiima kiabwe kie khaale.

⁴¹Nio babaandu be chikholo abo basaaya Wele Omunyali Owa Bioosi, ne lundi bakholela bifwaani. Ne lisaaye liabwe basichiililila khukhola busa bario khukhwola luno.