Read lubukusu 2 Bab. 18 Bible Online

2 Bab. 18 - lubukusu bible

2 Bab. 18

¹Mu mwiiko kukhola khataru kwe bubwami bwa Hoshea okhwa Ela nga omwami owa Isiraeli, Hesekia okhwa Ahasi amiisibwa aba omwami owa Yuda.

²Hesekia arakikha khukhwamiia ne ali ne bukhulu bwe kimiiko kamakhumi kabili na kiraano. Amiia ne ali mu Yerusalemu khulwe kimiiko kamakhumi kabili na tisa. Maayi wewe aba Abi, omukhaana owa Sakaria.

³Akhola kaali kamalayi ebweeni wa Wele Omunyali Owa Bioosi bulayi bwene nga kukaawe Daudi ne akhola.

⁴ Aarusiao abuundu aesuta, atechula chinjeko mala arema akwiisia sifwaani sia Ashera. Lundi atonyaka mu bitonyi endemu eye kumukasa niyo Musa akhola, eyalaangwa bali Nehushitani. Khukhwola khu siise esio babaandu ba Isiraeli baba basiosiela bibiindu biiunya bulayi khundemu eyo.

⁵Hesekia eyikina mu Wele Omunyali Owa Bioosi, Wele owa Isiraeli. Se abao omwami okundi mu Yuda ebweeni wewe namwe enyuma wewe owaba nga niye tawe.

⁶Aba aria Wele Omunyali Owa Bioosi ne se amulekhakho tawe. Aliinda kamalaka niko Wele Omunyali Owa Bioosi aba ne aelesia Musa.

⁷Ne Wele Omunyali Owa Bioosi aba alala ne naye. Buli sisiindu siosi siosi nisio akhola, akhilanga. Akhola bureengu khu mwami owa Ashuru ne se amukholela tawe.

⁸Aula Bafilisiti khukhwamila khu ndeleelwa ndala khukhwola khu ngoba chisire. Abaula khukhwola lukoba lwa Kasa ne sibala sisialubotookhelesia.

⁹Kumwiiko kukhola khane kwe bubwami bwa Hesekia, kwaba kumwiiko kukhola saba kwe bubwami bwo mwami Hoshea okhwa Ela mu Isiraeli. Mu biise ebio, omwami Shalumaneseri owa Ashuru ebwaakala mala abotookhelesia Samaria.

¹⁰Enyuma we kimiiko kitaru kie khubotookhelesia, Shalumaneseri abukula Samaria. Ako kekholekha mumwiiko kukhola sita kwe bubwami bwa Hesekia ne kumwiiko kukhola tisa kwe bubwami bwa Hoshea.

¹¹Omwami owa Ashuru ayila Baisiraeli Ashuru nga baboe mala engisia balala mu nibo mu lukoba lwa Hala, balala khu ngingi che luluuchi lwa Habori ne Kosani, ne babaandi mu ngoba cha Medesi.

¹²Samaria lwakwa sikila Baisiraeli se baria Wele Omunyali Owa Bioosi, Wele wabwe tawe. Ne kakhali bafunaka endakaano niyo aba ne akhola ne nabo mala baba barengu khu malaka koosi niko Musa, omukholi owa Wele Omunyali Owa Bioosi aba ne abaelesia. Se bakarekeeresia namwe bakaria tawe.

¹³Mu mwiiko kukhola ekhumi na kine kwe bubwami bwo mwami Hesekia, Senakeribu omwami owa Ashuru ebwaakala chingoba chisire choosi cha Yuda mala achibukula.

¹⁴Nio Hesekia, omwami owa Yuda aruma burume khu Senakeribu owaba ne ali Lakishi ali, “Nakholile kamakhiikha. Nosiima lekha khukhwibwaakala khwowo. Ne endakhuruunga siosi siosi nisio wenya.” Mu likobosia omwami owa Ashuru enya khukhwama khu Hesekia bitonyi chimia chitaru bie efwesa ne bitonyi kamakhumi kataru bie esahabu.

¹⁵Ne Hesekia amuelesia efwesa yoosi eye mu Lukaangu nende eye mu libiikhilo lie mwichipi.

¹⁶Lundi Hesekia amulula esahabu khukhwama khu miliango kie Lukaangu ne esahabu niyo niye omwene aba ne amaala khu mitalaachi kie muliango mala ayilila Senakeribu yoosi.

¹⁷Omwami owa Ashuru aruma omwimeelesi owe banamae, omwimeelesi omuchili no mwimeelesi omukhulu alala ne banamae bakali boola e Yerusalemu. Bacha bema a mechi kaali angaaki, a muyila niio banabi be chingubo bakholelanga kimilimo kiabwe. Alwakha lureera kameechi khukhwama mu litiisi lie ngaaki.

¹⁸Nga ne balanga omwami Hesekia, banamae bewe bataru barura bacha khukhwakaanana ne nabo. Baba Eliakimu okhwa Hilikia, owaba omwimeelesi owe lichipi, Shebuna omuandiki ne Yoa okhwa Asafu owaba omubiikhi owe kamaandike.

¹⁹Ne Rabushake, omwimeelesi komanda owe banamae ba Ashuru ababoolela ali, “Boolela Hesekia muli, omwami omukali owa Ashuru aloma ali: Wareere lilieyikina khu siina?

²⁰Ewe wibaasia oli kamakhuwa kong'ene kanyala kaba lilirekekha ne kamaani khulwe liie? Naanu niye weyikiine nga ne okholeele Ashuru bureengu?

²¹Bona ewe weyikiine Misiri. Ne Misiri eli nga lusaala lufuniikhe. Lunyala lwauna kumukhono kwo omundu olwetilakho. Farao akholanga busa ario khu baandu boosi bamweyikinanga.”

²²“Ne waaba ne onyala waloma oli, ‘Khweyikiine Wele Omunyali Owa Bioosi Wele wefwe,’ oyo se ali niye Wele owe abuundu aesuta ne chialutare nicho Hesekia atechula ta ku? Hesekia aboolela babaandu ba Yuda ne Yerusalemu ali, ‘Mukhoya musikamile alutare ndala yong'ene mu Yerusalemu.’

²³Nono yiicha khufukiilisiane no mwami owa Ashuru. Ndakhuelesia chifarasi chielefu chibili waaba ne onyala wanyoola babaandu bachitimia.

²⁴Waama oriena nono olobe akhaba omukeekhe khu banamae bo mwami owa Ashuru mala weyikine Misiri khulwe kamakaari ke liie ne batimia chifarasi?

²⁵Khutasa khwako ewe wibaasia oli nebwakaale sibala siowo ne sendi ne buyeeti bwa Wele Omunyali Owa Bioosi tawe? Wele Omunyali Owa Bioosi omwene niye owambooleele khusiibwaakala ne khusibunia.”

²⁶Nio Eliakimu okhwa Hilikia, Shebuna ne Yoa baboolela Rabushake bali, “omwami khukhusaba, lomaloma khwifwe mu lulomo lwa Ashuru sikila khuluulila. Okhalomaloma mu Lueburania tawe, sikila babaandu boosi baali khwisiisi balaulila.”

²⁷Ne kakhali Rabushake akobosia ali, “Ewe wibaasia oli omwami andumire ese khuboola bibiindu bino khwinywe ne khu mwami wenywe mweng'ene? Se kali kario tawe. Ese ndikho ndomaloma akhaba khu baandu babekhaale khwisiisi. Bakhalie bunyaalu bwabwe ne khunywa kameenyi kabwe, bulayi bwene nga enywe ne mukhakhole.”

²⁸Nio Rabushake enyokha eema mala alaanga lukali muluheburania ali, “Ulila ko omwami omukali owa Ashuru.

²⁹Omwami aloma ali, mukhalekha Hesekia amubea tawe. Hesekia se anyala amuonia enywe khukhwama khwise tawe.

³⁰Mukhalekha Hesekia amukhola enywe mweyikina Wele Omunyali Owa Bioosi ne amuboolela ali, ‘Wele Omunyali Owa Bioosi ng'ali alakhusikula efwe, ne lukoba luno se lulaelesibwa khu mwami owa Ashuru,’ tawe.

³¹Mukharekeeresia ka Hesekia tawe. Omwami owa Ashuru aloma ali, ‘Khola kumuleembe ne nase mala mwiche khwise. Buli mulala khwinywe alalia chisabibu che kimisabibu. Lundi buli mulala alalia khukhwama khu mutuli kwewe ne khunywa kameechi khukhwama mu sebele chenywe.

³²Kakhabe kario khukhwola nga ese ne ekhakobole emuyile mu maloba kaali bulayi bwene nga kamaloba kenywe. Kamaloba ako kalimo biakhulia ne endali, engaanu, kimisabibu, kimiseituni ne bubuukhi. Nio mumenye ne se mulafwa tawe. Mukhalekha Hesekia amusilwaasia ne aloma ali Wele Omunyali Owa Bioosi alamureesia tawe.

³³Alikhoo wele khu bawele be chikholo chichiindi owaonia bibala biabwe khukhwama khu mwami owa Ashuru?

³⁴Bawele ba Hamati ne Aripoti luno bali waena? Bawele ba Sefaribaimu, Hena ne Iba bali waena? Alikhoo mulala khu beene abo owaonia Samaria?

³⁵Naanu mu bawele be bibala ebio bioosi owasikula bibala biabwe khukhwama khu mwami owa Ashuru? Nono siina sikila enywe ne mwibaasia muli Wele Omunyali Owa Bioosi anyala aonia Yerusalemu?’ ”

³⁶Ne kakhali basila busa chii. Se bamukobosia tawe. Omwami Hesekia aba ababoolela ali, “Mukhamukobosia tawe.”

³⁷Nio Eliakimu okhwa Hilikia omwimeelesi owe lichipi, Shebuna omuandiki ne Yoa omwimeelesi owe kamaandike batabula chingubo chabwe mu bubeeleli, mala bacha baboolela omwami niko omunamae omukhulu owa Ashuru aba ne aboolile.